Rooma 8

1Maakumii nyuun paannyēēnyi :chiich nyēpō Yēēsu Kiriistō nyoo /tākēētilchinii kiirwook. 2Kiikuutyaayteech :Toomirmiir nyoo Tiliil kungʼeetee wōloo mii :ngʼōōki choo kiipayteech akwoopu meerat. Kiikēēnyōōru nyuun sopoon nyoo rēēl kupunuunō Yēēsu Kiriistō. 3Kiimātingʼēy :ngʼātuut chēpō Muusa kaamuuka kuupēl ngʼōōki choo kiikiikupayteech. Ku kiimuuk nyuun :Iriin inyeentee ngʼōōki paani kiiyooku Wēēriinyiin kichō ngʼwēny kimāngʼiisyō kilēē achaan choo kilēē kipngʼōōkiin. /Kiikuukarkaat Yēēsu nkōō kimurtooyoon /sikēēnyoowēēch kaat ngʼōōkiichooch. /Keemuuk nyuun ngʼōōki. 4Ki-ir :Iriin kilēē nyoonēē sikeemuuka kee-ira man kilēē wōloo mārtooy :ngʼātuut chēpō Muusa nēē kutuup Toomirmiir nyoo Tiliil amakutuup ātēpuut chēpō ngʼōōki. 5Piich choo tākutuupēy ātēpuut chēpō ngʼōōki kupāytooy :ātēpuutēchoochēē kāāpkootuutēkwaak. Ku piich choo tuupēy Toomirmiir kupāyuuy :Toomirmiir kāāpkootuutēkwaak. 6Chiich nyoo pāyuuy :ngʼōōki kāāpkootuutēchiich, kunyōōruuy meerat. Ku chiich nyoo pāyuuy :Toomirmiir kāāpkootuutēchiich, kunyōōruuy :chiichoonēē sopoon ākōō kaalya. 7Kunyuun nēē tākupāyuuy :ngʼōōki kāāpkootuut chēpō chiich, ku puunyoontoo Iriin :chiichoonēē. Māmārēy :chiichoonēē ku-ir kiyoo mārēy :Iriin aku man mēēmuukēy ku-ir. 8Piich choo tākupāytooy :ngʼōōki, kumēēmuukēy :pichoochēē kuupaypaay Iriin. 9Akwaan nyuun ku maakupāytooyook :ngʼōōki. Pāytooyook :Toomirmiir nyoo Tiliil, āmu ātingʼēēkwaan Toomirmiiryoonoonēē. Ku nēē mātingʼēy nyuun :chiich Toomirmiiryoo Kiriistō, ku mā pō :chiichoonēē Kiriistō. 10Āmu kii-ir :Aatam ngʼōōki akwoopu meerat kuchō kōōrooni, ku ākōy kurook :piich tōkōl nkōō ngʼwēnyuuni. Ku nēē ātingʼēy Kiriistō nkōō sopoonwēkwook, ku kōōnook :Toomirmiiryeenyiin sopoon āmu kiikuchamaak :Iriin kilē ātiliilō. 11Āmu ātingʼēēkwaan Toomirmiir nyoo Tiliil nyoo kiingʼeeta Yēēsu meerat, kuungʼēētēēnook mpō :Toomirmiiryoonoonēē meerat akukōōnook sopoon nyēpō ākōy. 12Kunyuun oo, tuupchēēnichuuch, mii :ngʼālyoon nyoo mārēy kee-ira akuutoorētēēch :Toomirmiir nyoo Tiliil. Makaat kēēmētēē tukun chaa raacheen choo kiicham kēē-irēy. Chiich nyoo tuupēy ātēpuutēchoochēē pō taay, kumēērēy. Ku choo tuupēy Toomirmiir nyoo Tiliil ku sāpsōōt. 14Piich choo ntōrōōrchinii :Toomirmiir nyoo Tiliil, ku laakōōpō Iriin :choochēē. 15Mēēlē kyoonyōōruukwaan Toomirmiir nyoo ki-iraak ālēku ōōtwook ākoowāriisyō. Acha, kyoonyōōruukwaan Toomirmiir nyoo ki-iraak ālēku laakōōpō Iriin. Toomirmiiryoonoonēē nyoo irēēch kēēkuurēē Iriin 'Apoo.' 16Toomirmiir nyoo Tiliil nyoo ngʼuutwēēch kilē man kichaan laakōōpō Iriin. 17Āmu kichaan laakōōpō Iriin, kēērāmtooy ākōō Kiriistō tukun choo tingʼēy Paapaan. Nee kunyaril kilēē Kiriistō, kēētōrōōrēēch kilēē inyeentee. 18Āpkootaa kilē /mākuumuukēy /keekarkeeyiita nyarili kumii kēēnyōōruuy pērēētuusyēchu tōrōōrin nyoo kipa kēēnyōōruuy lētuun. 19Mii kukānyēy :kir aka tōkōl nkōō kōōrēē pērēētuu nyoo irēy :Iriin kutooku man kilē ngʼoo laakōōchiich. 20Kiikiitaamparaar :kir aka tōkōl nkōō ngʼwēny aku mēēlē āmu kiikumārēy kilēē nyōōnēē, kiitē :Iriin siitāt paani kiimaateer inyeentee. /Akēēkēnēy nyuun kilē wēētii kukārāmiituuy nkōō lētuun. 21Kipa /kēētyooytoorēē piich pērēētuu aka kaamuuka nyēpō meerat, aku nyōōru :piich ōōwin nyēpō laakōōpō Iriin. 22Kiinkēt kilē miitō kungʼwoonchinii kir aka tōkōl nyoo miitō kōōrēē kungʼeetee kēny ākōy ātyēē kilēē paani ngʼwoonchinii :cheepyooso nyoo tuumēy laakwa. 23Kumiichaan mpō kēēnyārilēy choo /kikēēkōōnēēch Toomirmiir nyēpō Iriin sikeechamchama wōloo lēē tōrōōrin nyoo chōōnēy lētuun. Kumiichaan kēēkēnēy nkōō ngʼwoonin /kēēkōōnēēch pōōrwēy chaa reelacheen ākēēnyōōru kir aka tōkōl nyoo mārēy :Iriin kuutē laakōōchiich. 24Kii nēē /kusārwēēch, kēētoowu kēēkēn kiyi kipa kēēnyōōruuy nkōō pērēētuunoonēē. Nēē kiikunyōōru :chiich kir nyoo kiikēnēy, ku maakuukēnēy kiyoonēē kuureer. 25Ku nēē kuukēn kir nyoo mākutingʼēy, kēēmurtooy kēēkēnēy. 26Toorētēēch mpō :Toomirmiir nyoo Tiliil āmu kiikuskusō amākuunkēt wōloo kusooytooy nkōō oor nyaa karaam. Soowēēch nyuun :Toomirmiir nyoo Tiliil nkōō oor nyoo mākuumuukēy /keemwa nkōō kuutuwayiichooch. 27Āmu Iriin nyi syookēy mukuliiriichooch, kuunkēt nyuun :inyeentee kiyoo pkootēy :Toomirmiir, āmu soochinii :Toomirmiir piich chēpō Kiriistō kilēē wōloo mārtooy :Iriin. 28Kiinkēt kilē nkōō kir aka tōkōl, ku-irēy :Iriin ngʼal choo kāroomēēn nkōō wōloo mii :choo chāmēy inyeentee, choo kiikukuur :Iriin kilēē wōloo kiichēptō :inyeentee. 29Piich choo kiisip kusōwu :Iriin, ku kiitapaan kukarkeeyiit nkōō Wēēriinyiin sikulēku :Wēēriinyiin Kipooreet nyēpō tuupchēēnik chaa chaangʼ. 30Aku choochēē kiisip kuutapaan, kukuur akwaaneek. Ku choochēē kikuurēy, ku-ir kutililiituuy. Ku choochēē ki-irēy kutililiituuy, kuutōrōōr. 31Ara, kumwoorēy nee nyuun? Nēē nyoonyoon Iriin, kuupēlēēch :ngʼoo? 32Nēē kiikōōnu :Iriin Wēēriinyiin akipō achaan oo, kuumuukēy kilē nee ku mākōōnēēch kir aka tōkōl nkōō choomnyeenyiin? 33Ngʼoo :nyoo muukēy kutil kilē raacha :piich choo kiikukwar :Iriin? Iriin ākityōōn nyoo tilēy kilē pō man :chiich. 34Kunyuun oo, ngʼoo :nyoo muukēy kuurwookwēēch? Moomii :chiich, āmu kiima :Yēēsu Kiriistō akipō achaan, kungʼeetee meerat akutēpō ēēruu taay nyēpō Iriin akusoowēēch. 35Ara, mii :chiich nyoo muukēy kuupēēsyēēch nkōō choomnyoot nyoo tingʼēēnēēch :Kiriistō? Nēē kākinyārilyō ntā nēē kinyōōru ngʼal choo nyikiisēēn ntā /kēē-usēēch ntā kāchō :piri ntā nēē mākutingʼēy sirōōy ntā nēē kimii yaa ra ntā nēē chō :meerat, ku mēēpēēsyēēch nkōō Kiriistō mpō kiitēēn! 36Mwoorēy :siruut chēpō Iriin kilē, "/Kupārēēch pērēētuu aka tōkōl akipō inyēēn. Kukarkeey :achaan nkōō kēēchiir choo /kuyēēngʼēy." 37Mpō ntā mii :tukuuchoochēē tōkōl, kēēpēliisyēy kupunuunō inyeentee nyoo kiichameech. 38Ānkēt man kilē nēē kā meerat ntā kā sopoon, ntā ku malaykeen ntā toomirmiirēy chaa raacheen, ntā tukun chēpō aniinee ntā ku chēpō pērēētuus choo pkoonēy ntā ku kaamuuka aka tōkōl, 39nēē kā kir nyoo mii im ntā ku nyoo mii ngʼwēny ntā kā kir aka tōkōl nyoo ki-ir :Iriin, ku mēēmuukēy :tukuuchoochēē tōkōl kuupēēsyēēch nkōō choomnyoo Iriin kupunuunō Yēēsu Kiriistō nyoo Kiptaayaantēēnyoon.

will be added

X\