Rooma 2

1Moomii kir nyoo yēētēē keey :chiich nyoo tilchinii piich walak ngʼal āmu nēē ir kilēē nyoonēē pērēētuus tōkōl, ku miitō kuurwoochinii keey āmu irēy mpō :inyeentee ngʼal choo lēē chu mwoorēy kilē irēy :piich. 2Kiinkēt :achaan Yāwuutik kilē nēē tilchinii :Iriin chiich kiirwook nkōō tukun choo lēē choochēē, kuuryoongʼēē man. 3Ipkootēēnyēēn man kilē rwoochinii :Iriin piich walak akutilchinii akwaaneek kiirwook amēērwookuun nēēmii itāsēy taay i-irēy ngʼaleechoochēē? 4Ntā irēēngʼēy rēēlin pō moo nyoo ōōw nkōō riirana nyoo riirēēnook Iriin? Mēēnkēt sōō kilē kōōniin pārooyin :rēēlintoonoonēē pō moo nyēpō Iriin iwalee? 5Āmu nyikiis mētingʼuungʼ aku keetay iwalee ku ngʼwoonchiniin pērēētuunoonēē rwoochinii :Iriin piich. 6Tilchinii :Iriin chiich aka tōkōl ngʼal kutuup keey nkōō kiyoo kiiku-ir. 7Tēnii sopoon nyēpō ākōy piich choo tāsēy taay ku-irēy tukun choo kāroomēēn, choo wāsēy lēpkēēyoo Iriin ākōō koonyit mu taayuu Iriin akumārēy kunyōōru sopoontonoonēē pō ākōy. 8Ku chiich aka tōkōl nyoo chāmēy keey ākityōōn akutay ngʼālyoontoo man akutuup oortin chēpō ngʼōōki kunyōōruuy ngʼwoonin nyoo chōōnēē wōloo mii :Iriin. 9Nyārilēy :chiich aka tōkōl nyoo irēy ngʼōōki akungʼwoonchi :chiichoonēē kwōngʼuut. Toowuunēē keey :ngʼaleechoochēē wōloo mii Yāwuutik kupōk sikutuup piich walak choo mā Yāwuutik. 10Kutōrōriit nyuun :chiich aka tōkōl nyoo irēy tukun choo kāroomēēn akuukoonyitō akunyōōru kaalya, kutoowuunō Yāwuutik kupōk sikutuup piich walak choo mā Yāwuutik. 11Āmwoorēy kilēē nyoonēē āmu mēēngʼuulēy :Iriin piich kilē anum nyi ku anum nyiinō. 12Nēē ir :chiich ngʼōōki nyoo mēēnkēt kiyoo mwoorēy :ngʼātuut chēpō Iriin, /kumākuurwoochinii kutuup keey nkōō ngʼātuutēchoochēē, akunyōōruuy nyuun siiteenyiin. Ku nēē ir ngʼōōki :chiich nyoo nkēt ngʼātuut, /kēērwoochinii kutuup keey nkōō ngʼātuutēchoochēē. 13Kumēēlē piich choo tēērēy kiyoo mwoorēy :ngʼātuut choo /kutilchinii kilē pēērēy keey nkōō taayuu Iriin. Piich choo /kutilchinii kilē pēērēy keey ku choo irēy kiyoo mwoorēy :ngʼātuut. 14Mēēnkēt :piich choo mā Yāwuutik ngʼātuut chēpō Iriin. Mpō ntā lēē nyoonēē, ku nēē ir tukun kilēē wōli mārtooy ngʼātuut, kungʼuutuuy kilē sirootēēn :ngʼātuutēchoochēē nkōō mētēwēyiikwaak. Inkēt kir nyaa karaam ākōō nyaa ra. Mwoochinii :kaapkootuutēkwaak kilē karaam :nyi ku ra :nyoon 16nkōō pērēētuuni pō lēt. Pkoonēy :piich tōkōl pērēētuunoonēē taayuu Iriin sikuurwoochi :Yēēsu Kiriistō kutuup keey nkōō ngʼaleekwaak choo ungʼootēēn kilēē wōli mwoortooy :lōkōōyichu ā-āmtooy. 17Inyēēn Yāwuutyoon nyoo ipkootēy kilē karaam kir aka tōkōl āmu inkēt ngʼātuut chēpō Iriin, ākiilāsēy keey kilē ipō Iriin. 18Inkēt :inyēēn kir nyoo māruun :Iriin i-ir akiiteeree ngʼātuut kir nyēpō man nyoo maraat i-ir. 19Ipkootēy kilē itingʼēy man kilē inyēēn nyoo i-ārōōrchinii piich choo kōryootēēn oor akiitēnii lēpkēēyō piich choo mii tuurin. 20Inēētēēnyēēn piich choo lēē sālwēy nkōō laakōōy choo mēēnkēt kir āmu ipkootēy kilē inkēt ngʼal tōkōl chēpō man choo mii ngʼātuut. 21Kunyuun oo, nēē inēētēy piich walak kumēēnēētēy keey mpō? Ku nēē imwoochinii nyuun piich walak kutaya keey chōōrsyō oo, kwaamin :nee siichōōrsyēē? 22Imwoorēy kilē ra nēē ir :chiich takal nkōō cheepyooso nyoo mā cheepyooseenyiin, akii-irēy :inyēēntēē? Irēēngʼēy piich choo kutunchinii kaanaamōōn, ākichōōrsyēy nkōō wōli /kukutunchinii kaanaamōōnichoochēē? 23Ilāsēy keey kilē ituupēy ngʼātuut, ara mēērēēngʼēy Iriin nēē siiru ngʼātuutēchoochēē? 24/Kikusir kilē "Mwoortoorēē :piich choo mā Yāwuutik ngʼal chaa raacheen kaarinaa Iriin akipō akwaan." 25Karaam ichō Yāwuutyoon akiinkēt ngʼātuut, nēē tuupēy ngʼātuutēchoochēē. Ku nēē siiru ngʼātuutēchoochēē, ku ilēēnyēēn chiich nyoo mēēnkēt ngʼātuut. 26Ku nēē tuup :piich choo ma Yāwuutik ngʼātuut chēpō Iriin oo, mā-āpēy :Iriin pichoochēē kilēē piichiich? 27Chiich nyoo mā Yāwuutyoon aku-irēy kiyoo mwoorēy :ngʼātuut, kuurwookuun nēē siiru ngʼātuut mpō ntēēnkēt ngʼātuut choo sirootēēn. 28Mēēlēēnyēēn Yāwuutyoon nyēpō man āmu /kikunamin ichō Yāwuutyoon, ntā ku āmu /kiikuyaatin murwoo Yāwuutik. 29Yāwuutyoon nyēpō man ku nyoo chāmēy Iriin nkōō moonyiin. Nyōōruuy :chiich murwō nyēpō man nēē ir :Toomirmiir nyoo Tiliil kuwala kilēku chiipō Iriin amēēlē nēē tyam kutuup kiyoo mwoorēy :ngʼātuut choo sirootēēn. Nyōōruuy :chiichoonēē kāāloosuunō kuchōōnēē wōloo mii :Iriin mā wōloo mii :piich.

will be added

X\