Rooma 12

1Kunyuun oo, tuupchēēnichuuch, āmu kiiriireeneech :Iriin, āsoomook kilē ātētēē keey kilēē kōrōs choo sāpyootēēn, ātiliilō ākoopāypooyēy Iriin. Nēē a-ir kilēē nyoonēē, ku āmii ā-irchinii Iriin pāyit nkōō oor nyēpō man. 2Maatuup ātēpuut chēpō ngʼwēny. Akanya kuwal :Iriin kāāpkootuutēkwook saapkaata nkōō oor nyoo rēēl. Nēē a-ir kilēē nyoonēē, āsōwu kiyoo mārēy :Iriin, kir nyaa karaam, kir nyaa chamaat ākōō kir nyēpō man. 3Kilēē paani ānkēt :akwaan kilē ki-iran :Iriin nkōō choomnyeenyiin ā-irchi pāyiisyeenyiin, āmwoochinii chiich aka tōkōl nkōō akwaan kilē mēē-āp keey im kusiir wōloo itēēnō. Iroo keey wōloo ilēē. Kiikuutē :Iriin chiich aka tōkōl pāyit nyoo irchinii kutiirēē keey inyeentee. 4Kilēē paani tingʼēy :pōōrpō chiich kāmooswook chaa chaangʼ aku-irēy :kamasta aka tōkōl pāyiisyeenyiin, 5kēēlēēchaan nyuun nyoonēē piich chēpō Kiriistō. Mpō ntā kiichaangʼ, kēēlēēchaan :tōkōl kir ākoongʼo nkōō Kiriistō kēēsāruuy keey. 6Tingʼēy :chiich aka tōkōl kaamuuka nyoo ngʼulēy nkōō nyēpō chiitō aka kilēē paani kiipēēruurēēch :Iriin. Nēē /kiikuupēēruur chiich kilēku ōōrkooyoon, kungʼalaalta kilēē paani tiirēē keey Iriin. 7Ku nēē /kiikuupēēruur kilē kuutoorēt piich, kuutoorēt, ku nēē /kikuupēēruur kuuneet piich kusōwu ngʼālyoontoo Iriin, kuunēētiisyō. 8Ku nēē /kiikuupēēruur kucheeraata piich, kucheeraata. Ku nēē /kiikuupēēruur kuutētō, kuutētō nkōō moo nyoo rēēl. Ku nēē /kiikuupēēruur kuuntōrōōrchi piich, kunāmchi keey pāyiisyōōnoonēē kukaraam. Ku nēē /kiikuupēēruur kuriira piich walak, kuriira nkōō pāypooyō. 9Akanya kilēku choomnyēēngʼwoongʼ nyēpō man. Atayee keey ngʼōōki ākookiilchi keey kir nyaa karaam. 10Āchoomnyēē kilēē piich choo tuupchō ākookoonyitēy piich walak kusiir wōloo ākoonyititooy keey. 11Ā-irchii Kiptaayaan pāyit nkōō moo ākoongʼo nyoo moochoosōōt ākoonāmchi keey Iriin. 12Āpāypāyiituu, āmu ākēnēy Kiptaayaan. Amurta nēē chōōnchook :nyaril akaatas taay āsooyēy Iriin. 13Āchārchinii piich chēpō Iriin kir aka tōkōl nyoo mārēy, ākootookēy too nkōō oor nyaa karaam. 14Nēē usook :chiich, āpēēruur nyoo kātoopānēy. 15Apaypayituu nkōō piich choo pāypāyō, ākooriirsōōt nkōō piich choo riirsōōt. 16Āmāngʼiisyō nkōō kaalya aku maalas keey. Nyoo kātoolāsēy keey, acham ātēpiisyō nkōō piich choo mātookuunoot. Aku maapkaat kilē āngʼoroomō. 17Nee irwaak :chiich ngʼal chaa raacheen, ku mooroochi rāyiityō. A-ira ngʼal choo chāmēy :piich tōkōl kilē kāroomō. 18Ku nēē muukēē, āmāngʼiisyō nkōō kaalya nkōō chiich aka tōkōl. 19Choorweeyiichuuch, nēē irwaak :chiich ngʼal chaa raacheen, ku māā-ōōchi rāyiityō, āmētii Iriin kuroochi chiichoonēē rāyiityeenyiin, āmu mwoorēy :Iriin nkōō siruut kilē "Nyaanyuun raaktaar pō mukētuut, kunyuun, ā-iraa kilēē nyoonēē." 20I-ir kilēē paani mwoorēy :siruut kilē, "Nee am :piri puunyoontēēngʼuungʼ, ipay, ku nēē am :maral, itē pēr kura. Nēē ir kilēē nyoonēē, kuu-iim ngʼaleekwaak chu kii-iruun." 21Kunyuun, meekany kuupēlin :rāyiityō, aku ipēlēē rāyiityō kāroomin.

will be added

X\