Ngʼoongʼuut 3

1Sirchii ngʼaleechu malaykayaantaa kaaniisaa Saarti: Lōkōōy :chu choo pkoonēē wōloo mii :nyoo nāmuuy toomirmiirēyiipō Iriin tisap ākōō kookeel tisap. Ānkēt pāyiisyōōnikwook. Nēē /kuurōōtook kilēē yoo āsāpyootēēn, aku kyoomēērō. 2Achikana nyuun akaachuul kiyoo tākungʼātuunoot kitoomō kuuwoonyo. Āmu māchuulootēēn :pāyiisyōōnikwook nkōō taayuu Iriin. 3Apkaata nyuun kiyoo kyoonyōōru nkōō kiyoo kyaateer. Ākoonyit ngʼalēēchoochēē ākoowāliisyō. Aku nēē mooriip, āchōōnēy kilēē chōōriin āmoosōwuukwaan saayitiis choo āchōōnchinook. 4Aku nyuun ātingʼēy piich choo ngʼērin nkōō Saarti choo riipēy keey manam simnyoon. Āwēētootēy ākōō pichoochēē, ku /keelaak sirōōy choo reelacheen, āmu yāmēy kilēē nyoonēē. 5Chiich nyoo kēēpēliisyō, /kēēloochinii sirōōy choo reelacheen. Mookōōltooy kaarinaa chiichoonēē mu kiitapuu sopoon, aku āngʼuututooy inyeentee nkōō taayuu Paapa ākōō malaykeenichiich. 6Nyoo tingʼēy iit kuteer kiyoo mwoochinii :Toomirmiir nyoo Tiliil kaaniiseenichiich. 7Sirchii ngʼaleechu malaykayaantaa kaaniisaa Pilateelpya: Lōkōōy :chu choo pkoonēē inyeentee nyoo tiliil aku pō man nyoo tingʼēy yootēywoontoo Tāwuti. Nyoo nēē yaat ku moomii :chiich nyoo muukēy kukar, ku nēē kar ku moomii :chiich nyoo muukēy kuyaat. 8Ānkēt pāyiisyōōnikwook. Aroo kee, kyooyootwook nkōō taayuungʼwoongʼ kurkat nyoo mēēmuukēy kukar :chiich. Ānkēt kilē ātingʼēy kaamuuka nyoo miningʼ akyooriip ngʼālyoontēēnyuun, amaatayaan. 9Ā-irēy kupka taayuungʼwoongʼ akukutungʼwook :Yāwuutik chēpō Syeetaani, choo kuurēy keey kilē pō Iriin aku ngʼuur. Sōwuuy nyuun :pichoochēē kilē āchāmook. 10Āmu kyaamurta kilēē paani kyoomwoorwook, āriipook :mpō aneen nkōō pērēētuusyēpō kāātyāmuut choo pkōōnchinii ngʼwēny tōkōl akuutyam piipō ngʼwēny. 11Āchōōnēy kilē weel. Āriipō kiyoo ātingʼēy kukaraam tamasareenaak :chiich mālāktāngʼwoongʼ. 12Ā-irēy chiich nyoo kēēpēliisyō kilēku kiptālēnyuu Kōpō Iriin, amaakupēērēē kōyoonēē ākōy. Āsirchinii chiichoonēē kaarinaa Iriin ākōō kaarinaa kōōroo Iriin, Chēērusālēēm nyoo rēēl nyoo chōōnēē kipsēnkwēt wōloo mii :Paapa. Āsirchinii mpō chiichoonēē kaarineenyuun nyoo rēēl. 13Nyoo tingʼēy iit kuteer kiyoo mwoochinii :Toomirmiir nyoo Tiliil kaaniiseenichiich. 14Sirchii ngʼaleechu malaykayaantaa kaaniisaa Laawotikyaa: Lōkōōy :chu choo pkoonēē wōloo mii :inyeentee nyoo mwoorēy kilē lēē nyoonēē. Sōwiin :inyeentee nyēpō man nyoo /kiirānēy, aku toowuniin nyēpō kir aka tōkōl nyoo ki-ir :Iriin. 15Ānkēt pāyiisyōōnikwook. Māākārtitō āmoolārootēēn. Katakaykay ntā kāākārtitō ntā koolārootēēn. 16Aku, āmu ālālāngʼō, āmoolārootēēn ntā ku ākārtitō, ku lēēkit angʼuungʼtaak. 17Āmwoorēēkwaan kilē, āmōkōrō. Ākootingʼēy kir aka tōkōl nyoo āmārēy amoomii :kir nyoo mootingʼēy. Aku, moorōōtēēkwaan kilē ānyārilsōōt, akyoolēku piich choo /kuriirēē, ākōō mēēy, ākookōryootēēn akaapka kimutultiin. 18Āmwoorwook nyuun kilē a-aleenaan kōōlti nyoo /kiikiitiliilēē ma, toolēkuu mōkōrō. A-aleenaan sirōōy choo reelacheen taalaaka āmoomutuultō ālēku sōōr. A-aleenaan saakit taa-iilee koonyikwook taamarartee. 19Āpkoongʼēy ākoochuulēy piich choo āchāmēy. Achikana nyuun ākoowāliisyō. 20Aroo kee, āmii kurkat ākuursyēy. Nēē teer :chiich kuutiinyuun akiyaat kurkee, āwēētiiy kō ākēē-āmiisyō :tōkōl. 21Ātēnii inyeentee nyoo kēēpēliisyō kaamuuka kutēpō wōloo āpāytoorēē, kilēē paani kyoopēliisyō ākootēpō ākōō Paapa nkōō wōloonēē pāytoorēē. 22Nyoo tingʼēy iit kuteer kiyoo mwoochinii :Toomirmiir nyoo Tiliil kaaniiseenichiich."

will be added

X\