Ngʼoongʼuut 22

1Akiingʼuutwoon :malayka ēēmpō sopoon nyoo lēē kiiyōōy nyoo /kiimuukēy /keemararee keey. Kiirōōtuunō :pērēēchoochēē ngʼacharaa pāyuunāt nyēpō :Iriin nkōō Waawaa keecha, 2akuuweer aree nyoo ōōw nyēpō kōōroonoonēē. Kiipiita :keetiipō sopoon kāmōōs tōkōl chēpō ēēnoonēē choo yyēy lokor taman nkōō ārēēny. Kiiyyēy lokor kilēē paani lēē araawa aka tōkōl, akiikiisoopēē :sākēēchiich piich. 3Maakumii :pana wōloonēē, āmu mii ngʼacharaa pāyuunāt nyēpō Iriin ākōō Waawaa keecha aku kutunchinii :kipāyitiinēchiich. 4Rōōtēy :pichoochēē Iriin tokoch, /akēēsirchinii kaarineenyiin tōkōōchikwaak. 5Amaakumii :tuurin wōloonēē. /Maakēēmārēy taayitiis ntā ku asiis, āmu :Kiptaayaan Iriin ākityōōn nyoo lēē lēpooyintangʼwaangʼ, aku pāytooy :pichoochēē ākōy nkōō ākōy. 6Kimwoorwoon :malayka kilē, "Pō man :ngʼaleechu /ākēērānēy. Kiptaayaan Iriin nyoo kiimwoochinii ōōrkooyichiich ngʼal choo mwoorēy nyoo kiiyookwoon aneen malaykayaanteenyiin āchoongʼuuti kipāyitiinēchiich kiyoo irēē kilēēkit. 7Mwoorēy :Yēēsu kilē 'Ateera kee! Āchōōnēy kilēēkit. Pēēruurootēēn :piich choo riipēy ngʼoongʼuutēchu mii kiitapuuni.' " 8Aneen :nyēēnyi Chowaana nyoo kyaaroo akaateer ngʼaleechu. Kii nēē aroo akaateer ngʼalēēchoochēē, āputi taayuu kēēlyēēpō malaykayaantaanoonēē kiingʼuutwoon ngʼalēēchoochēē kilē ākutunchi. 9Aku, kimwoorwoon :malaykayaantaanoonēē kilē, "Amee-ir kilēē nyoonēē! Āchō kipāyityoontoo Iriin kilēē inyēēn ākōō mpō choo ātuupchō, ōōrkooyichiich ākōō piich tōkōl choo riipēy ngʼaleepō kiitapuuni. Kutunchii Iriin ākityōōn!" 10Kumwoorwoon kilē, "Mee-ungʼ ngʼoongʼuut choo mii kiitapuuni, āmu kiikuriiku :pērēētuus. 11Chiich nyoo irēy ngʼal chaa raacheen, kitas taay nkōō rāyiityō, ku nyoo irēy ngʼōōki, kitas taay nkōō ngʼōōki. Ku chiich nyoo irēy ngʼal chēpō man, kitas taay nkōō man, ku nyoo tiliil, kitas taay kutililiit. 12Mwoorēy :Yēēsu kilē, 'Āchōōnēy āchookuuy! Ākootingʼoonuuy mālāk. Ātēnii chiich aka tōkōl kutuup keey ākōō kiyoo kii-ir. 13Aneen Alpa ākōō Omeeka, aneen nyēpō taay ākōō nyēpō lēt, ātoowuuy ākoowoongʼuuy.' 14Pēēruurootēēn :piich choo kēē-uun keey kilēku choo tiliilēēn, āmu michinii kwaam lokoreepō keetpō sopoon, aku chuutēy kōōroonoonēē kupuntēērēē koopoortiinēchoochēē. 15Ngʼātuunēē saangʼ :piich choo lēē sukoyēy ākōō kipaniis, ākōō kiptakaliis, ākōō choo rumiisyēy, ākōō choo kutunchinii kāānoomoon ākōō tōkōl choo chāmēy akumwoorēy ngʼuurnan." 16Mwoorēy :Yēēsu kilē, "Kooyooku malaykayaanteenyuun kumwoochi kaaniiseen tōkōl ngʼaleechu. Kyaasiluuna Tāwuti ākoochō kaapooriinteenyiin ākoochō kookeelyaantaa kitokwoorō nyoo lārēy kitya." 17Mwoorēy :Toomirmiir nyoo Tiliil ākōō cheeroosyaanoonēē kilē, "Chōōnō!" Ku chiich aka tōkōl nyoo tēērēy ngʼaleechu kumwa kilē "Chōōnō!" Ku nyoo āmēy maral, kuchō. Ku nēē mārēy :chiich, kura pērēēpō sopoon choo /kuutētooy kilēēn. 18Āmwoochinii chiich aka tōkōl nyoo tēērēy ngʼoongʼuutēchu pō kiitapuuni kilē chiich nyoo kātāsi ngʼaleechiich ngʼoongʼuutēchu, kutāsinii :Iriin inyeentee kōōrōōytiinēchu /kiikumwa mu kiitapuuni. 19Ku chiich nyoo kangʼusu ngʼoongʼuut aka tōkōl nkōō kiitapuuni, kusārēē :Iriin chiichoonēē lokoreepō keetpō sopoon, amāwēētii kōōroonoonēē tiliil, nyoo /kiikungʼuutu mu kiitapuuni. 20Mwoorēy :chiichi kiimwoorēy ngʼaleechu tōkōl kilē, "Ēē, āchōōnēy āchookuuy." Lēē nyoonēē! Chōōnō, Kiptaayaan Yēēsu. 21Kuupēēruurook akwaan tōkōl :Kiptaayaan Yēēsu. Lēē nyoonēē.

will be added

X\