Maarkō 8

1Kiimii pērēētuu aka nyoo kiireer kuurumchi keey :piich chaa chaangʼ Yēēsu, aku kiimoomii :kiyoo tākwoomēy. Kukuur :Yēēsu kiineetanichiich akilēēchi, 2"Man kaariiree pichu. Kaakēētēpi nkōō akwaaneek pērēētuus sōmōk āmoomii :kir nyoo ka-am. 3Pkoonēē :pichu walak wōloo lōōw. Nēē āmwoochi kupēēchi keey kaaw kwoomēy :piri kuumuukēy kumistō nkōō aree." 4Kumwa :kiineetanichiich kilē, "Kōōrooni ku suur kwēēn. /Kunyōōrchinii ānō āmiisyō nyoo yāmēy piich choo tēēnō chu tōkōl?" 5Kuteepee :Yēēsu kiineetanichiich kilē, "Ātingʼēy makatiin ata?" Kuwālchi kilē, "Kitingʼēy choo lēē tisap." 6Kumwoochi :Yēēsu kiineetanichiich kumwoochi piich kutēpi ngʼwēny. Kunam makatiinachoochēē lēē tisap akumwoochi Iriin kōōnkēy. Kupuutil akuutē kiineetanik kuchārchinootō piich. 7Kiitingʼēy mpō :kiineetanik kaaraak choo ngʼērin choo mēnkēēchēēn. Kunam :Yēēsu kaaraakik, kumwoochi Iriin kōōnkēy akuutē kiineetanichiich kicharta. 8Kyoomiisyō :piich kupiryoonchō. Kuurum :kiineetanik kiituukaan kuunyiriit kitaseen tisap. 9Kii-itēy piichoochēē kiimii yoonēē ēlup angʼwan. 10Kumwoochi nyuun :Yēēsu piich kupēēchi keey akuulaangʼ :inyeentee mēēli ākōō kiineetanichiich akupa ākōy kōōroo Talmanuuta. 11Kiipkoonchi :Parisaay Yēēsu choo kiimārēy kuutyam inyeentee. Kilēēchi ku-ir ngʼālyoon nyoo ngʼuutuuy kilē tingʼēy :Yēēsu kaamuuka nyoo chōōnēē wōloo mii :Iriin. 12Kiinyita :Yēēsu akilē, "Āmu nee sukumārēy :piich walak ngʼālyoon nyēpō kwōngʼuut? Koomwoorwook man kilē, moomii :kir nyoo ngʼuutinii :Iriin piich choo lēē chu." 13Kumētō :Yēēsu pichoochēē akulaangʼ mēēlii nkōō kiineetanichiich akutilta araaray kuureer kamasta aka. 14Kiiruutyēērō :kiineetanik kwoop makatiin nkōō wōloo kipkoonēē. Kiitingʼēy makatyaan ākoongʼo kipaat nkōō mēēlii. 15Kumwoochi :Yēēsu kiineetanichiich kilē, "Āriip keey, sōō kimeereepō Parisaay ākōō chēpō Ērōōtē." 16Kungʼalaala :kiineetanichoochēē ngʼaleechoochēē akumwoochi keey kilē, "Kamwa kilēē nyoonēē āmu mākitingʼēy makatiin." 17Āmu kiinkēt :Yēēsu kiyoo kingʼāloolēē :kiineetanichiich, kuteepa kilē, "Āmu nee soongʼāloolēy kilē mootingʼēy makatiin? Moosōwu ngʼaleechu? Tōkōōlō :mētēwēyiikwook? 18Ātingʼēy koonyin āmoosōwuuy? Ātingʼēy iitin, āmootēērēē? Moopkootēy :akwaan mpō? 19Paani kyoopuutulēy makatiin muut /sikeepayee piich choo lēē ēlup muut oo, kyaarum :akwaan kitaseen choo lēē ata choo kiingʼātu?" Kilē :kiineetanik, "Kitaseen choo lēē taman nkōō ārēēny." 20Kuteepee :Yēēsu kuureer kilē, "Ki paani kyoopuutulēy makatiin tisap /sikeepayee piich choo lēē ēlup angʼwan oo, kyaarum :akwaan kitaseen choo lēē ata choo kiingʼātu?" Kilē :kiineetanik, "Kitaseen choo lēē tisap." 21Kumwoochi :Yēēsu kiineetanichiich kilē, "Toomō āsōwu mpō ngʼaleechoochēē?" 22Nēē mii pērēētuu aka, ku-it :Yēēsu ākōō kiineetanichiich Peetsaayta. Nkōō yoonēē, kuumuti :piich walak Yēēsu chiich aka nyoo kii koroot. Kisoom :pichoochēē Yēēsu kilē kutiingʼēē ēēruunyiin chiichoonēē sukusop. 23Kunam :Yēēsu ēēruu chiichoonēē kii koroot akuurēētō kiwō wōloo kimālēēkitēē :chiich. Nēē it, kungʼuti koonyiipō chiichoonēē akutiingʼēē ēēruunēchiich akuteepee kilē, "Irōōtēy kir aka tōkōl?" 24Kitoowu :chiichoonēē kimararta akilē, "Ārōōtēy piich aku lēē keet choo pēētootēy." 25Kuureer kutiingʼēē :Yēēsu ēēruunēchiich koonyiipō chiichoonēē. Kusopyō akimararta kukaraam. 26Kumwoochi :Yēēsu chiichoonēē kilē, "Wiyō kaaw ameeweemwaartaata kiyoo kaa-iruun." 27Nēē mii pērēētuu aka, kiwō :Yēēsu ākōō kiineetanichiich kōōrootin choo mii Kayisareeya Pilipi. Kumii aree kupēētii, kuteepee :Yēēsu kiineetanichiich kilē, "Mwoorēy :piich kilē aneen :ngʼoo?" 28Kuwālchi :kiineetanichiich kilē, "Mwoorēy :piich walak kilē inyēēn Koopootiisāniin Chowaana, kumwoorēy :walak kilē inyēēn Eliicha, kumwoorēy walak kilē inyēēn ākoongʼo nyēpō ōōrkooyiipō Iriin." 29Kuureer kuteepa :Yēēsu kiineetanichiich kilē, "Aa akwaan, āmwoorēy kilē aneen ngʼoo?" Kuwālchi Pēētērō kilē, "Inyēēn Meesaaya." 30Kikir :Yēēsu kiineetanichiich mamwaarta kilē Meesaaya inyeentee. 31Kutoowu kuuneet :Yēēsu kiineetanichiich kilē nyōōruuy :Wēēroo Chiich nyāriluut chaa chaangʼ, akutāyēy :kāāntōōy, tisiik choo ēēchēēn ākōō koonēēt chēpō ngʼātuut. /Kupārēy aku nēē mii pērēētuu nyēpō sōmōk kungʼeetee meerat. 32Kumwoochi :Yēēsu akwaaneek ngʼaleechoochēē nyoo maa-ungʼee. Kii nēē teer Pēētērō ngʼaleechoochēē, kuumut tapan Yēēsu akukar koongʼ nkōō ngʼaleechoochēē kāmwoorēy. 33Kuwarak keey :Yēēsu akuuro kiineetanik, akukar koongʼ Pēētērō kilē, "Istoorēēnoon keey :Syeetaani! Ipkootēy kilēē wōloo pkootitooy :piich mā wōloo pkootitooy :Iriin." 34Nkōō yoonēē, kukuur :Yēēsu piich choo kiimii yoonēē ākōō kiineetanichiich, akumwoochi kilē, "Chiich aka tōkōl nyoo mārēy kutuup ngʼaleechuuch, kutay keey, akicham /keenyariil akipō aneen, akichō kutuupkaan. 35Chiich aka tōkōl nyoo mārēy kusāru sāpoontanyiin, kuupootēy, ku nyoo kēētētō sāpoontanyiin akipō aneen ākōō lōkōōy choo kāroomēēn, kusāruuy. 36Kāroomin nee nyoo nyōōruuy :chiich nēē rumchi keey tukun tōkōl nkōō ngʼwēny, akuupoot sāpoontanyiin nyēpō ākōy? 37Ntā nee nyoo muukēy kuwala :chiich sāpoontanyiin? 38Chiich aka tōkōl nyoo māmārēy kumwaartaareenaan keey akutay ngʼaleechuuch mu kōōrooni pō ngʼōōki nyoo tāyēy :piich Iriin, ātāyēy :mpō Wēēroo Chiich, pērēētuuni āchōōnēy ākōō malaykeen choo tiliilēēn nkōō lēpooyin nyēpō Apoonyuun."

will be added

X\