Maarkō 6

1Kuwēērō :Yēēsu yoonēē akuureer Naasareet kōōrēēnyiin, kupa ākōō kiineetanichiich. 2Nēē mii pērēētuu Sapaatō, kiwō :Yēēsu sinakōōki akuunēētiisyō. Kiikwōngʼyō :piich tōkōl choo kiteer ngʼaleechoochēē akilē, "Kiinyōōrchi ānō :chiichi ngʼaleechu tōkōl? Ngʼoroomnyō nee :nyi /kiikiitē chiichi? Kaamuuka nee :nyi tingʼēy :chiichi nyoo muukēy ku-ir ngʼal chēpō kwōngʼuut? 3Ma kiitoongʼiin :chiichi, wēēroo Maaryaa? Ma wēēriingʼwaangʼ Chēēmis, Chōōsēp, Chuutaas ākōō Siimnyōn? Mā tiipiikwaak :chu mii yi nkōō achaan?" Kitay nyuun :pichoochēē ngʼaleepō Yēēsu. 4Kumwoochi :Yēēsu kilē, "/Kiikoonyitēy ōōrkooyoon nkōō wōltō aka tōkōl kungʼātu mu kōōrēēnyiin, ākōō wōloo mii tilyayiikwaak, ākōō katangʼwaangʼ wōloo /mākiikoonyitēē." 5Maa-ir :Yēēsu ngʼal chaa chaangʼ chēpō kwōngʼuut mu kōōroonoonēē. Kiitiingʼō :ēēruunēchiich piich choo ngʼērin kipaat choo kiimnyoonsōōt akuusoop akwaaneek. 6Kikwōngʼ :Yēēsu āmu kiimaaran :pichoochēē inyeentee. Kiwō :Yēēsu kōōrootin walak wōkuunēētiisyootō. 7Nēē mii pērēētuu aka, kukuur :Yēēsu kiineetanichiich chu kiilēē taman nkōō ārēēny, akuuyooytō kupeera ārēēny ārēēny pakwaamtaata ngʼālyoontoo Iriin. Kitoomō kupa, kuutē akwaaneek kaamuuka nyoo muukēy ku-oon toomirmiirēy chaa raacheen. 8Kumwoochi akwaaneek kilē, "Ameenamaata :chiich kir aka tōkōl paani iwēētii kungʼātu kaarya. Āmēē-āp āmiisyō, saapaa kātōōn, ntā ku rōōpiyō. 9Iraap kwēēr akumēē-āp sira aka." 10Kumwoochi akwaaneek kilē, "Nēē taakaak :chiich, apa katanyiin ātēpi ākōy apeeree yoonēē. 11Nēē mataakaak :piich akutay kuteer kiyoo āmwoorēy, āpēēchinii keey, aparta tēērit nkōō kēēlyēēkwook. Ngʼuutuuy :nyoonēē kilē tākutingʼēy pichoochēē ngʼōōkikwaak." 12Kupa :kiineetanichoochēē pākwoomchinootō piich kuwāliisyēērō rāyiityēēngʼwaangʼ nyoo kiiku-ir. 13Kii-oon toomirmiirēy chaa raacheen chaa chaangʼ, akuu-iilee mwaar piich chaa chaangʼ choo kiimnyoonsōōt akuusoop. 14Kiingʼalaala :piich chaa chaangʼ ngʼaleechu kiimii ku-irēy :Yēēsu kuti ku-it :ngʼaleechoochēē wōloo mii pāytooyiin Ērōōtē. Kiimwoorēy :piich walak kilē, "Kiikungʼeeta Chowaana Koopootiisāniin meerat nka nyi tingʼēy kaamuuka ku-ir ngʼal chēpō kwōngʼuut" 15Kimwoorēy :walak kilē, "Eliicha nyi kaakuwaraka." Kimwoorēy :walak kilē, "Ōōrkooyoontoo Iriin nyi nyoo karkeey nkōō ākoongʼo nyēpō ōōrkooy chēpō kēny." 16Paani kateer :Ērōōtē kilēē nyoonēē, kimwa kilē, "Chowaana Koopootiisāniin :nyi kyaamwaarta /keetil mētinyiin nyi /kaakeengʼeeta meerat." 17Kiikiikumwaarta :Ērōōtē kilē /keenam Chowaana /akeerat nkōō korkoreet. Ki-ir :Ērōōtē kilēē nyoonēē āmu Ērōōtya, cheepyooseetaa wēēriingʼwaangʼ nyoo /kiikukuurēē Pilip, nyoo kyoop Ērōōtē. 18Kiimwoochi :Chowaana Ērōōtē kilē, machamaat kwoop cheepyooseetaa wēēriingʼwaangʼ. 19Kutoowu :Ērōōtya kusas Chowaana nkōō ngʼaleechoochēē kiimwoorēy, akimar kuukeet. Wōloo nyuun kimēēmuukēy kuukeet, 20āmu kiiwārēy :Ērōōtē Chowaana. Kuriip nyuun :Ērōōtē inyeentee āmu kiinkēt kilē chiich :Chowaana nyēpō man akutiliil. Kiichāmēy kutēērēy :Ērōōtē kiyoo kiimwoorēy :Chowaana, akii-iimēy inyeentee mēt :ngʼaleechoochēē. 21Ku-it nyuun :pērēētuu nyoo kiinyōōru :Ērōōtya pārooyin. Kii-ir :Ērōōtē tuum nyoo /kiikuupkootēy pērēētuuni /kiikutuumēy inyeentee. Kikuur :Ērōōtē piichiich choo ēēchēēn. Kikuur mpō kāāntōōy chēpō lukoo pooryoot ākōō piich walak choo kii tookuunoot nkōō Kalilaaya. 22Kuchō :chēpō Ērōōtya akunyaal nkōō taayuu Ērōōtē nkōō tooyēēchiich. Kupaypayiit :Ērōōtē akumwoochi chēēpoonēē kilē, "Ichāmēy ākōōnin nee? Ākōōniin kir aka tōkōl nyoo keemar." 23Kusirpēn :Ērōōtē akumwoochi inyeentee kilē, "Kir aka tōkōl nyoo keeteep ākōōniin, mpō nēē imārēy kareeran nyēpō kōōrēēnyuun." 24Paani kateer :chēēpoonēē kilēē nyoonēē, kiwō wōloo mii :eeyeenyiin akuteepee kilē, "Amwaarta /kēēkōōnān nee?" Kuwālchi :kaamee kilē, "Mwaartee /kēēkōōnin mēt pō Chowaana Koopootiisāniin." 25Kuwaraka :chēēpoonēē wōloo mii :Ērōōtē kilē weel akilēēchi, "Āmārēy ikōōnoon mēt pō Chowaana Koopootiisāniin mu kipis kilē weel." 26Paani kamwa :chēēpoonēē kilēē nyoonēē, kwootyō :Ērōōtē nyēpō kwōngʼuut. Aku āmu kiikiikusirpēn nkōō taayuu tooyeechiich, ku maamar kisiiru ngʼālyoontēēnyiin. 27Kuuyooytō :Ērōōtē riipiinteenyiin kiwō kwoopu mēt pō Chowaana. Kiwō :riipiintoonoonēē korkoreet akutil kaat Chowaana, 28akwoopuunō mētit kipis akuutē chēēpoonēē. Kunam :chēēpoonēē mētit akuutō eeyeenyiin. 29Paani kateer :kiineetanik chēpō Chowaana kilē kaakima, kupa kimar pōōrpō Chowaana akutup. 30Paani kāwārākiisyō :kiineetanichoochēē, kumwoochi Yēēsu tōkōl choo kiipa ku-ir akuuneet. 31Āmu kiimii :piich chaa chaangʼ choo kipkoonēy akupēētii ku maanyōōru :Yēēsu ākōō kiineetanichiich pārooyin kwoomiisyō. Kilēēchi :Yēēsu kiineetanichiich, "Keepee wōloo mālēēkitēē :chiich sikēēmuungʼō nyoo miningʼ." 32Kulaangʼ mēēli akupa ākōy wōloo mālēēkitēē :chiich. 33Paani keero :piich kuwēētii :Yēēsu ākōō kiineetanichiich, kusōwu wōloo kiipēētii. Kumētō kōōrootinēēkwaak akumwēr araa kēēlyēn kutuup tapan nyēpō araaray sukuutorook :akwaaneek taay. Ku-it :piich wōli kiiwēētii :Yēēsu ākōō kiineetanichiich kutoomō ku-it :akwaaneek. 34Paani kārēkuunō :Yēēsu mēēli, akuuro pichoochēē tōkōl, kuriira akwaaneek āmu kii lēē kēēchiir choo mātingʼēy māsōwoon. Kitoowu nyuun kuuneet :Yēēsu pichoochēē ngʼal chaa chaangʼ. 35Ku paanta kutuuriit :kōōrēē, kupēēchi Yēēsu :kiineetanichiich akilēēchi, "Kaakutuuriit :kōōrēē aku kōōrooni ku suur kwēēn. 36Ngʼuntee pichu kupa kēēstoonichu lēēkitēē yēēnyi kupa kwaalaata kiyoo āmēy." 37Kuwālchi :Yēēsu kilē, "Ātēē kir nyoo āmēy." Kilē :kiineetanichiich, "Kupa kee-al makatiin choo yāmēy kwaam :pichu tōkōl? Nku chaangʼ :rōōpiyēēchoochēē." 38Kuteepee :Yēēsu kilē, "Ātingʼēy makatiin ata? Apee kee aroo." Paani kaakuuro, kumwoochi kilē, "Kitingʼēy makatiin muut ākōō kaaraak ārēēny." 39Kumwoochi :Yēēsu kiineetanichiich kumwoochi piich kuururuuk keey akutēpi ngʼwēny yoo mii suusō. 40Kuupuur :piich kupeeraateera konom konom. 41Kunam :Yēēsu makatiinachoochēē muut ākōō kaaraakik ārēēny, kuuro parak akumwoochi Iriin kōōnkēy, kupuutil makatiinak, akuutē kiineetanichiich kuchārchinootō piich. Kuchar mpō kaaraakichoochēē ārēēny akuutē piich. 42Kyoomiisyō :piich tōkōl kuti piryoonchō. 43/Keerum kiituukaan chēpō makatiin, kunyir kitaseen taman nkōō ārēēny ākōō chēpō kaaraak. 44Piich :choo kyaam makatiinak ku murēn ēlup muut. 45Paanoonēē kumwoochi :Yēēsu kiineetanichiich kulaangʼ mēēli kusip kuuntoroor kutilta araaray kupa kamasta nyiinō aka pō Peetsaayta, kuta kuuyoomiisēy keey :inyeentee nkōō piich. 46Paani kaakuuyoomiistō :Yēēsu pichoochēē, kuwēēchi keey tul kiwō kusa. 47Kii nēē kaakutuuriit, ku kiikiiku-it :mēēlii araaray kwēēn, akutā kumii :Yēēsu tul. 48Kuuro :Yēēsu kilē kānyikisiit yoomēē nkōō wōloo mii kiineetanichiich nēē mārēy kukwaangʼkwaangʼ pērēēk āmu kiimii yoomēt nyoo nyikiis nyoo kiichōōnēē taayuungʼwaangʼ. Paani kāwōkuurir :kōōrēē, kuwēērēē :Yēēsu pēr parak ākōy wōloo kiimii :kiineetanichiich. Kii paanta kusiirtō akwaaneek, 49kii nēē ro :kiineetanik kumānēē :Yēēsu pēr parak, kuunchōōyō kukuurēē iilat. 50Kiiwāriisyō :kiineetanik tōkōl paani keero Yēēsu. Kumwoochi nyuun :Yēēsu akwaaneek kilē, "Āmoowāriisyō! Aneen :nyēēnyi." 51Paani kalaangʼ :Yēēsu mēēlii, kusiis :yoomēē. Kikwōngʼyō :kiineetanik nyēpō kwōngʼuut, 52āmu kitoomō kusōwu kiyoo ngʼutuuy paywaanoonēē kii pō piich ēlup muut. Kutōkōliituuy mētēwēyiikwaak. 53Paani kaakutilta :Yēēsu ākōō kiineetanichiich araarayta, kupa kuuryoongʼō yoo /kiikukuurēē Keeneesareet, akurāti mēēlii tapanpō araaray. 54Kii nēē rēkuunēē mēēlii, kusōwu :piich Yēēsu kilē weel. 55Kumwērootō :piich nkōō kōōroonoonēē tōkōl akukālāpuunō piich choo mnyoonsōōt kiptaraancheen kupa wōltō aka tōkōl wōloo kateer kilē mii :Yēēsu. 56Ārii aka tōkōl yoo kiiwō, kilēē kōōrootin ākōō kēēstoon, ku kiimuti :piich piich choo kiimnyoonchootēēn kupka yoo kiikutuuyēēchinii. Kusoom :pichoochēē kiimnyoonchootēēn kutiingʼ tapanuu siraa :Yēēsu. Kisop :chiich aka tōkōl nyoo kiitiingʼ tapanuu siree.

will be added

X\