Maarkō 2

1Nēē mii pērēētuu aka, kuureer :Yēēsu Kaaparnaam. Nyoo matyaan, kuteer :piich kilē mii kaaw. 2Kipka :piich chaa chaangʼ akuurumchi keey kō ākōy ku-it saangʼ kuti moomii wōloo puntoorēē :chiich nkōō kurkat. Kwoomchi :Yēēsu pichoochēē ngʼālyoontoo Iriin. 3Kutākwoomchinii :Yēēsu piich lōkōōyichoochēē, kuumuti :piich choo lēē angʼwan chiich nyoo kiimeertaaraat pōōr kuusoop. 4Āmu kiichaangʼ :piich ku maanyōōru :pichoochēē pārooyin kupa wōloo mii :Yēēsu. Kulaangʼ nyuun koot kēsyēp akupilpil yoo kiitāngʼēy yoo kiimii :Yēēsu. Kuurēēytēērēē chiichoonēē kiptaraancha ākōy yi kiimii :Yēēsu. 5Kii nēē rō :Yēēsu kilē kiiran :pichoochēē inyeentee, kumwoochi chiichoonēē kiimeertaaraat pōōr kilē, "Wēēriinyuun, /kaakēēnyōōwuun kaat ngʼōōkiikuuk." 6Kiimii yoonēē :koonēēt walak chēpō ngʼātuut. Kukit kilē, 7"Āmu nee sikungʼāloolēy :chiichi kilēē nyi? Kā-āp keey im kilēē yoo Iriin inyeentee sōō? Ngʼoo :nyoo muukēy kunyōōchi piich kaat ngʼōōkikwaak nēē mā Iriin ākityōōn?" 8Nkōō yoonēē, kusōwu :Yēēsu nkōō toomirmiiryēēnyiin kiyoo kiimii kuupkootēy :koonēētichoochēē, akumwoochi kilē, "Āmu nee saapkaata tukun choo lēē choochēē? 9Kuskus /kēēmwoochi chiichi mnyoonēy kilē, '/Kaakēēnyōōwuun kaat ngʼōōkikuuk' ntā /keemwa kilē, 'Ngʼeeta, āpō kiptaraancheengʼuungʼ akiiwō'? 10Āngʼuutwook nyuun kilē tingʼēy :Wēēroo Chiich, kaamuuka mu ngʼwēny kunyōōchi piich kaat ngʼōōkikwaak." 11Kumwoochi nyuun :Yēēsu chiichoonēē kiimeerta pōōr kilē, "Ngʼeeta, āpō kiptaraancheengʼuungʼ, akiiwēēchi keey kaaw." 12Kungʼeet :chiichoonēē kilē weel, kwoop kiptaraancheenyiin, akuwēēchi keey, kuurōōtēy :piich tōkōl. Kiikwōngʼyō :piich tōkōl akuuloosu Iriin kumwoorēy kilē, "Kitoomō keero tukun choo lēē chu." 13Kiwō :Yēēsu kimanaateera tapan nyēpō araaray pō Kalilaaya. Kiirumchi keey :piich chaa chaangʼ wōli kiimii :inyeentee. Kuuneet :Yēēsu pichoochēē ngʼālyoontoo Iriin. 14Kimii kuwēētiiy :Yēēsu, kuuro chiich nyoo kiimii kutēpēē koot aka nyoo kii kukwārēē kōōti. /Kiikukuurēē chiichoonēē Laawi wēēroo Alpaayō. Kumwoochi :Yēēsu chiichoonēē kilē, "Tuupaan." Kungʼeet :Laawi akutuup Yēēsu. 15Kii nēē mii :Yēēsu ākōō kiineetanichiich kwoomiisyēy mu kaa Laawi, ku kiitēpiisōōt :piich chaa chaangʼ choo kiikwārēy kōōti ākōō kipngʼōōkiis kipootō Yēēsu ākōō kiineetanichiich, āmu kiikatuup :piich chaa chaangʼ Yēēsu. 16Kii nēē ro :Parisaayik walak choo kiilēē koonēēt chēpō ngʼātuut kilē mii :Yēēsu kwoomiisyēy nkōō :kwāriipō kōōti ākōō kipngʼōōkiis, kuteepee kiineetanichiich kilē, "Āmu nee sukwoomiisyēy :chiichi ākōō kwāriipō kōōti kipootō kipngʼōōkiis?" 17Kii nēē teer :Yēēsu kilēē nyoonēē, kuwālchi kilē, "Wāsootēy :piich choo mnyoonchootēēn cheepsaakityaan. Māwāsootēy :choo kāroomō pōōrwēy. Kyoochōōn akuur kipngʼōōkiis, amēēlē chēpō man." 18Nkōō pērēētuusyēchoochēē, kiimii :pērēētuusyēk choo kiirukuut keey :kiineetanipō Chowaana Koopootiisāniin ākōō Parisaayiik. Kupkoonchi :piich Yēēsu akuteepee kilē, "Āmu nee sukuurukuutēy keey :kiineetanipō Chowaana ākōō chēpō Parisaay kumēērukuutēy keey :kiineetanikuuk?" 19Kuwālchi :Yēēsu kilē, "Mēērukuutēy keey :choorwaayiipō saantaa laakwa kitakimii ākōō saanteetaa laakwa. 20Itēy :pērēētuu nyoo kwoopēy santeetaa laakwa kurukuutyō nyuun :choorwayiichiich." 21Kumwoochi :Yēēsu kilē, "Moomii :chiich nyoo rārēy sira nyoo rēēl akiraakee siree nyoo kiikuroosiit. Nēē ir kilēē nyoonēē kupoolēy rookēywoontēē siree kirayiit kitya. 22/Mākuroonchinii tiipaay choo /kātākēēryākēy tokol nyoo kiikuroosiit. Nēē /ku-ir kilēē nyoonēē, kuryēēy :tokoltō akuraanta keey :tiipaayiik. /Kuroonchinii tiipaay choo /kātākēēryākēy tokol nyoo rēēl." 23Nēē mii pērēētuu aka nyēpō Sapaatō, kupuntoorō :mpō Yēēsu paraa nkaanu. Paani mii kupēētii, kwaam :piri kiineetanichiich. Kutoowu kupaak mēsiisēpō nkaanu akwaam. 24Paani keero :Parisaay ku-irēy kilēē nyoonēē, kumwoochi Yēēsu kilē, "Roo kee, āmu nee taku-irēy :kiineetanikuuk kir nyoo tāyēy :ngʼātuut /kee-ir mu pērēētuu Sapaatō?" 25Kuwālchi :Yēēsu kilē, "Toomō asooman kir nyoo kii-ir :Tāwuti kii nēē am :piri inyeentee ākōō piichiich chu kiimii tōkōl? 26Kiiwō :Tāwuti Kōpō Iriin akunyōōru Tisiintēē aka nyoo Ōōw nyoo /kiikukuurēē Apiyaatar. Kisoom :Tāwuti /kēētē makatiin. Kuutē :tisiintoonoonēē makatiin choo kiikuchāmchinii :tisiik ākityōōn kwaam. Kwaam :Tāwuti akuutō mpō piichiich." 27Kumwoochi nyuun :Yēēsu pichoochēē kilē, "/Kiiku-irēy Sapaatō akipō chiich, /amaaki-ir chiich akipō Sapaatō. 28Kunyuun, pāyuy :Wēēroo Chiich pērēētuu Sapaatō."

will be added

X\