Maarkō 14

1Kiikiingʼātu :pērēētuusyēk ārēēny ku-it tuum nyēpō Pasaka ākōō makatyaan nyoo maakuutu. Kiimii kuwāsēy :tisiik choo ēēchēēn ākōō koonēēt chēpō ngʼātuut wōloo nāmtooy Yēēsu kumēērōōtēy :piich sukuukeet. 2Kumwoochi keey kilē, "Kumaakunam chiichi nkōō pērēētuusyēchu pō tuum āmu muukēy kungʼeet :piich pooryoot." 3Kumii :Yēēsu Peetannya kwoomiisyēy nkōō kaa Siimnyōn, chiich nyoo kiikyaam :kōōnchōryoontō, kuchō :cheepyoosee aka nyoo kiitingʼoonuuy mwaar. /Kiikyoolēē mwaari rōōpiyō chaa chaangʼ. Kuryēchi :cheepyoosoonoonēē kaat pō sētoo mwaar akuroonchi Yēēsu mwaaroonēē mēt. 4Paani keero :piich walak choo kiimii kōyoonēē kiyoo ka-ir :cheepyoosoonoonēē, kunyāliisyō akuteep keey kilē, "Nee /kiiluluukeetaa mwaar nyi? 5/Kātākyooltēērēē mwaari rōōpiyō chaa chaangʼ /ākēētē rōōpiyēēk mēēy." Kunyālāchi :pichoochēē cheepyoosoonoonēē. 6Kilē :Yēēsu, "Āmētēē cheepyoosoonoonēē, koo-iimchi nee inyeentee? Kaaku-irwaan kir nyaa karaam." 7Kitas taay :Yēēsu kumwoochi pichoochēē kilē, "Āmii :akwaan nkōō mēēy pērēētuu aka tōkōl ākootoorētēy nēē āchāmēy. Wōloo nyuun moomii nkōō aneen ākōy. 8Kaaku-ir :cheepyoosoonoonēē kiyoo kēēmuukēy, akēēsip kuu-iil pōōrtanyuun kutoomō pērēētuuni /pākēētupēy. 9Ākoomwoorwook man kilē, /mākuruutyēērēē cheepyoosooni nkōō kir nyoo ka-ir nkōō ārii aka tōkōl yoo /kwoomtoorēē lōkōōy choo kāroomēēn mu ngʼwēny tōkōl." 10Nēē mii yoonēē, kiwō :Chuutaas Iskaryōōt, nyoo kii ākoongʼo nyēpō kiineetanik taman nkōō ārēēny wōloo kiimii :tisiik choo ēēchēēn kiwō ku-alta Yēēsu. 11Paani kateer :tisiichoochēē ngʼaleechoochēē pō Chuutaas, kupāypāyiituuy akuuyoomiis inyeentee rōōpiyō. Kutoowu :Chuutaas kuwas porooyin nyoo āltēērēē Yēēsu. 12Nēē mii pērēētuu nyēpō taay nyēpō tuum nyoo /kiikyoomēy makatyaan nyoo maakuutu, pērēētuuni yēēngʼēy :Yāwuutik mākool sukwaam paani katuuriit :kōōrēē, kuteepa :kiineetanik Yēēsu kilē, "Imārey kēēchēpēē ānō āmiisyoonipō Pasaka takee-ama?" 13Kuuyooytō :Yēēsu kiineetanichiich ārēēny akilēēchi, "Apee ākōy :Chēērusālēēm yoo ātuuyēērēē chiich nyoo āpēē pēr kisaapan. Atuup chiichoonēē lēt. 14Kaayi kachuut :chiichoonēē, apa ākoomwoochi chiipō kaayoonēē kilē, 'Kālē :koonēētiintēē: Mii ānō koonyuun nyēpō too nyoo ā-āmēē Pasaka ākōō kiineetanichuuch?' 15Ngʼuutwook :chiichoonēē koot aka nyēpō parak nyoo /kiikēēchēp. Āsātuunēēnēēch āmiisyō yoonēē." 16Kingʼēētyō :kiineetanik akupa ākōy Chēērusālēēm. Kupa kunyōōru tukun tōkōl kilēē wōloo kāmwoochintō :Yēēsu, akichēp āmiisyō nyēpō Pasaka. 17Paani kāwō kutuuriit kōōrēē, kuchō :Yēēsu ākōō kiineetanichiich taman nkōō ārēēny ākōy kōyoonēē. 18Kimii :Yēēsu kwoomiisyēy ākōō kiineetanichiich, kumwoochi akwaaneek kilē, "Āmwoorwook man kilē, mii :akoongʼo nkōō akwaan nyoo wēētii ku-āltooyoon, inyeentee nyoo ā-āmiisyēy tōkōl." 19Kutoowu kuu-iim keey :kiineetanik akuteepee :aka tōkōl kilē, "Ara aneen?" 20Kuwālchi :Yēēsu kilē, "Ākoongʼo nkōō akwaan nyoo kimii kēēnōnōōkēē :tōkōl makatyaan mōōnkwēē ākoongʼo. 21Mēērēy :Wēēroo Chiich kilēē paani /kiikeesir mu siruut. Aku rāyiituuy nyuun kitya nkōō chiich nyoo āltooy. Kiitakaykay ntā /kiimakunam chiichoonēē." 22Paani mii kwoomiisyēy, kunam :Yēēsu makatyaan akumwoochi Iriin kōōnkēy. Kupuutil akuutē kiineetanichiich, akilē, "Pōōrtanyuun :nyi, aama." 23Kunam kikoompee nyoo kiimii :tiipaay, kumwoochi Iriin kōōnkēy, kuutē kiineetanichiich, kura :chii tōkōl. 24Kumwoochi :Yēēsu kilē, "Kērētiichuuch :chu chēpō miis nyoo rēēl choo /kitārtooy akipō piich chaa chaangʼ. 25Āmwoorwook man kilē moorēēy kuureer tiipaay ākōy pērēētuuni āwoorēēy chaa reelacheen mu kaa Iriin." 26Paani keewaangʼ kutuumēy tuum kupa kuutangʼ kamas pō Tulwoo Musēytuun. 27Kumii kupēētii, kumwoochi :Yēēsu kiineetanichiich kilē, "Āryētooy :tōkōl ākoomētoon, kilēē paani /kiikusir kilē, 'Āpārēy māsowoontēē akusarat :kēēchiirēk.' 28Aku nyuun, paani /kaakeengʼeeteenaan meerat, āntōrōōrtoorēēnook āwō Kalilaaya." 29Kumwoochi :Pēētērō Yēēsu kilē, "Mpō tāmwēr :piich tōkōl ku moomētooyiin." 30Kilēēchi :Yēēsu Pēētērō, "Āmwooruun man kilē kutoomō kuchār :kipsōōywō nyēpō ārēēny langʼatuuni, itayēy āsip sōmōk kilē mēēnkētoon." 31Kilē :Pēētērō, "Mpō ntā meerat ku mootāyēy kilē moonkētiin." Kumwa mpō :kiineetanik tōkōl kilēē nyoonēē. 32Kiwō :Yēēsu ākōō kiineetanichiich ākōy yoo /kiikuurēē Keetseemaani. Paani ka-it kilēēchi :Yēēsu akwaaneek, "Ātēpii yēēnyi āwō asa." 33Kuumut :Yēēsu Pēētērō, Chēēmis ākōō Chowaana kupa nkōō inyeentee. Nkōō yoonēē, kuchōōnchi :ngʼwoonin Yēēsu akuu-iim keey. 34Kilēēchi :Yēēsu kiineetanichoochēē, "Ngʼwaanaa moo nyoo paanta āmēērēy, āngʼētuunēē yi, ākoochikēnchō." 35Kiwō :Yēēsu taay nyoo matyaan kukutungʼ akusa kilē nēē muukēē kusiirtoorēē :pērēētuunoonēē pō ngʼwoonin inyeentee. 36Kumwa kilē, "Apoo! Muukiisōōt :tukun tōkōl nkōō wōloo imii, naayteereenaan nyarili, Aku nyuun, amee-ir kilēē wōloo āmārtooy, i-ir kilēē wōloo imārtooy." 37Paani kawaraka, kinyōōru kiineetanichiich chu lēē sōmōk kumii rwoon. Kumwoochi Pēētērō kilē, "Siimnyōn, kēēruu? Mēēmuukēy mpō ichikan saayit ākoongʼo? 38Āchikānchēē akaasaa simooputyō nēē /kuutyamaak. Chāmēy :mēē, wōloo nyuun moomii :kaamuukee." 39Kuureer kiwō kusa kilēē taay. 40Paani kawaraka :Yēēsu, kiwō kunyōōru kineetanichoochēē mii rwoon, āmu kiitingʼēy rwoon nyoo nyikiis. Kipēti :kiineetanik kiyoo mwoochinii Yēēsu. 41Paani kawaraka :Yēēsu nyēpō sōmōk, kilēēchi kiineetanichiich, "Toomii āruusōōt ākoomuungʼēy? Kaakuyam! Kaaku-it :saayit nyoo kwooltooy Wēēroo Chiich kiwō ēēruunēpō kipngʼōōkiin. 42Āngʼēētyēē keepee. Aroo kee anyi kaaku-itu :chiichi āltooyoon." 43Paani kiitākumii :Yēēsu kungʼāloolēy, ku-itu :Chuutaas nyoo kii ākoongʼo nyēpō kiineetanichiich taman nkōō ārēēny. Kiitāsoonuuy piich chaa chaangʼ choo kiitingʼēy chōōkoon ākōō ruunkuus. Kiiyooku pichoochēē :tisiik choo ēēchēēn, koonēēt chēpō ngʼātuut ākōō kāāntōōy. 44Kiikiikumwoochi :Chuutaas pichoochēē kilē, "Chiich nyoo ātēnii aasak ku nyoonēē, anam ākooriipootō." 45Paani ka-it :Chuutaas, kiwō kilē weel yoo kiimii :Yēēsu akuutaakwees kilē, "Aasak, koonēētiin." 46Kunam :pichoochēē Yēēsu. 47Wōloo nyuun kingʼeet :akoongʼo nyēpō pichu kiiryoonchēērēē yoonēē, kungʼusu chōōkeenyiin akichwan iitpō kipāyityoontoo Tisiintēē nyi Ōōw kuchinta. 48Kumwoochi :Yēēsu pichoochēē kilē, "Āmu nee soo-āpuu chōōkoon ākōō ruunkuus apaanamaan kilēē aneen pāriin? 49Nku kyoomii nkōō akwaan pērēētuu aka tōkōl, ānēētiisyēy mu piriiruu Kōpō Iriin amaanamaan? Wōloo nyuun, akanya kuusilta :siruut." 50Kimētō Yēēsu :kiineetanichiich akuryata kupēēchi keey. 51Kiimii :narana nyoo kiikiilaak anka nyoo kituupēy Yēēsu, /keenam, 52kungʼusta ankee akuurip kimutul. 53/Keemut Yēēsu ākōy kaa Tisiintēē nyoo Ōōw wōloo kiikiirumchi keey :tisiik choo ēēchēēn, koonēēt chēpō ngʼātuut ākōō kāāntōōy. 54Kiituup :Pēētērō Yēēsu nkōō ripaarip. Kiwō ākōy ku-it piriiruu kaa Tisiintēē nyi Ōōw. Kumii wōloonēē, kutēpō ngʼwēny ākōō piich choo kiiriipēy kaayoonēē akuyu ma. 55Kiiwas :tisiik choo ēēchēēn ākōō kōōkwoo Yāwuutik tōkōl ngʼal choo toomchinii Yēēsu /sikeekeet, kumākunyōōru nyuun ngʼālyoon aka tōkōl. 56Kiimwa :piich chaa chaangʼ ngʼal chēpō ngʼuurnan kuutoomchi Yēēsu, wōloo nyuun, maachoomnyō :ngʼaleekwaak. 57Kiiryoonchō :piich walak akuutoomchi Yēēsu ngʼal chēpō ngʼuurnan kilē, 58"Kiikuteer kumwoorēy :chiichi kilē, 'Āmilēy Kōyi pō Iriin nyi kiitēēkēy :piich, akaateek aka nkōō pērēētuus sōmōk nyoo mātēēkēy :chiich.' " 59Kimaakichoomnyō :ngʼaleepō pichoochēē. 60Kuuryoongʼ :Tisiintēē nyoo Ōōw nkōō kōōkwoo pichoochēē tōkōl akuteep Yēēsu kilē, "Mēētingʼēy ngʼālyoon nyoo imwoorēy akipō ngʼaleechu kamwa :pichu akipō inyēēn?" 61Kusiisi keey :Yēēsu amaawalta ngʼālyoon. Kuureer kuteep :Tisiintoonoonēē Ōōw Yēēsu kilē, "Inyēēn Meesaaya, Wēēroo inyeentee nyoo Pēēruuroot?" 62Kilēēchi :Yēēsu, "Aneen nyoonēē, ākoorōōtēy Wēēroo Chiich, kutēpēē ēēruu taay nyēpō Iriin nyēpō kaamuuka tōkōl, ākoorōōtēy kuchōōnēē pool chēpō parak." 63Paani kateer :Tisiintoonoonēē Ōōw kiyi kamwa :Yēēsu kupaal sirōōchiich akimwa kilē, "Tākēēmārēy sōwi chēpō nee? 64Kaateer :akwaan wōloo muultooy :chiichi Iriin. Āmwoorēy nee nyuun?" Kutil tōkōl kilē yāmēy /keekeet. 65Kitoowu :walak kungʼuti Yēēsu, akurat koonyin, akulap, akumwoochinii kilē, "Mwoorwēēch, ngʼoo :nyi kalapin?" Kunam :riipiik akuurapaak. 66Kimii :Pēētērō piriiruunoonēē pō Tisiintoonoonēē Ōōw, kuchō :chēētō aka nyoo kii kipāyityoontoo tisiin, akuuweer yoonēē kiimii :Pēētērō. 67Paani keero :chēēpoonēē Pēētērō mii kuywēē ma, kuuro akilē, "Kēēmii :inyēēn mpō ākōō Yēēsu nyēpō Naasareet." 68Kitay :Pēētērō akilē, "Moonkēt :aneen amaasōwu mpō kiyoo ingʼāloolēē." Kuunaayta kiwō kurkat nyēpō piriiruu kaayoonēē. Nkōō yoonēē, kuchār :kipsōōywō. 69Kuuro :chēēpoonēē akumwoochi piich choo kiimii yoonēē kilē, "Kiineetanee aka nyēpō Yēēsu :chiichi." 70Kuureer kitay :Pēētērō. Nyoo matyaan, kumwoochi :pichoochēē Pēētērō kilē, "Man, inyēēn :akoongʼo nyēpō pichu, āmu ichōōnēē mpō Kalilaaya." 71Kusirpēn :Pēētērō kilē, "Moonkēt chiichi āmii :akwaan āngʼāloolēē." 72Nkōō yoonēē, kuchār :kipsōōywō nyēpō ārēēny. Kuupkaat nyuun :Pēētērō ngʼaleechu kiimwoochinii :Yēēsu kilē, "Kutoomō kuchār :kipsōōywō kunyil ārēēny itāyēy āsip sōmōk kilē mēēnkētoon." Nkōō yoonēē, kuriir :Pēētērō.

will be added

X\