Maarkō 12

1Kumwoochi :Yēēsu kāāntōōyichoochēē nkōō kārkēēyin kilē, "Kiimii :chiich aka kēny nyoo kiitoot sapiipuun pareenyiin akukar. Kupal kēpēn sukupēēchi :pērēēpō sapiipuun paani kākupir. Kuteek kasar nyoo /kuriipēē paree. Kii nēē waangʼ, kuutē piich walak kipa kuriipchi paree akuwēēchi keey kōōrēē aka. 2Nēē mii paani kāruryō :sapiipuunēk, kuuyooytō :chiichoonēē pō paree kipāyityoonteenyiin kiwō wōloo kiimii :pichu kiiriipēy paraanoonēē kiwō kwoopchi lokoreechiich. 3Paani ka-it :kipāyityoontoonoonēē wōloonēē, kunam :pichoochēē akulap, aku-oon kilēēn. 4Kuuyooytō :chiichoonēē kipāyityoonteenyiin aka. Kunam :pichoochēē akulap mēt, akumuul. 5Kuureer kuuyooytō :chiichoonēē pō paree kipāyityoonteenyiin nyēpō sōmōk. Paani ka-it /keekeet. Kuureer kuuyooytō kipāyitiinēk walak kutuup keey. Nēē itēy wōloonēē /kēēlāpēy walak /kēēkēētēy walak. 6Kiitākitingʼēy :chiichoonēē chiich ākoongʼo nyoo muukēy kuuyooytō, wēēriinyiin nyoo kiichāmēy. Nyēpō lēt, kuuyooytō wēēroonēē kiwō wōloo mii :pichoochēē, kuupkootēy kilē, 'Koonyitēy wēēriinyuun' kuuyooytō nyuun kiwō. 7Paani ka-it :wēēroonēē wōloonēē, kukuur keey :pichoochēē akilē, 'Murēchu, ānyi nyoo pāyituuy paree! Apkaana keekeeta sikupāyitwēēch :paraani.' 8Kunam wēēroonēē akuukeet akuwiirchi pōōrtō paree saangʼ." 9Kuteep :Yēēsu pichoochēē kilē, "Irēy nee nyuun :chiipō paree? Āmārēy āmwoorwook kiyoo irēy. Chōōnēy akuukeet pichoochēē tōkōl akuutē piich walak kuriipchi paree." 10Kilēēchi :Yēēsu pichoochēē, "Ānkēt :akwaan man kilē mwoorēy siruut chēpō Iriin kilē, 'Kor nyoo kiitay :tēēkik :nyi kiilēku tēlēkuutaa koot. 11Iriin ākityōōn nyoo kii-ir ngʼaleechu. Akipō kwōngʼuut nēē /kuuro.' " 12Kiisōwu :kāāntōōyichoochēē kilē mii :Yēēsu kungʼāloolēē akwaaneek nkōō kārkēēyinoonēē. Kiimārēy kunam Yēēsu, wōloo nyuun kiiwar piich. Kimētō akupēēchi keey. 13Nēē mii lētuun, kuuyooytō :kāāntōōyichoochēē Parisaayik walak ākōō piipō Ērōōtē pakuutyam Yēēsu sukunam akipō ngʼaleechiich. 14Paani ka-it wōloo mii :Yēēsu, kilēēchi, "Koonēētiin, kiinkēt kilē imwoorēy man, amēēwārēy piich kilē ngʼoo :ngʼoo. Akiinēētēy ngʼal chēpō man ākōō kiyoo mārēy :Iriin kee-ir. Mwoorwēēch nyuun, chamaat /kēēkwārchi Kayisaari kōōti ntā machamaat?" 15Paani kateepee :pichoochēē Yēēsu kilēē nyoonēē, kusōwu ngʼuurnaneengʼwaangʼ nyoo kiipkootēy. Kumwoochi kilē, "Āmu nee saatyamaan? Āpkoon rōōpiyoon aro." 16Kwoopchi rōōpiyoon. Kuteep :Yēēsu pichoochēē kilē, "Pō ngʼoo :itōōni mii rōōpiyoontooni, ākōō kaarinee nyi kiikusirchi? Kuwālchi :pichoochēē kilē, 'Pō Kayisaari.' " 17Nkōō yoonēē, kilēēchi :Yēēsu, "Ātēē Kayisaari chaachiich, ātē Iriin chaachiich." Kikwōngʼyō :pichoochēē nkōō kiyoo kiimwa :Yēēsu. 18Nēē mii yoonēē, kupkoonchi Yēēsu :Satukaay walak. Kiirānēy :pichoochēē kilē /mākungʼēētēē piich meerat. Kuteepa :pichoochēē tēēpuut Yēēsu kilē, 19"Koonēētiin, kiisirweech :Muusa ngʼātuut nyoo mwoorēy kilē 'Nēē ma :chiich akumētō cheepyooseenyiin kitoomō kunāmchi laakwa, kumilēy :wēēriingʼwaangʼ, akunāmchi laakōōy choo /kukuurtēērēē wēēriingʼwaangʼ :nyi kiima.' 20Kiimii nyuun :chiitō aka kēny nyoo kiitingʼēy wēēchiichiich tisap. Kwoopiisyō :kipooreet akima kimaanam laakwa. 21Kumil :wēērii nyēpō ārēēny cheepyoosoonoonēē, kima amaanam laakwa. Kutuup :wēērii nyēpō sōmōk, akima mpō ama laakwa. 22Ku-ira kilēē nyoonēē ākōy ku-it wēērii nyēpō tisap. Kirook :pichoochēē tōkōl ama laakwa. Nēē mii lētuun, kima :cheepyoosoonoonēē. 23Mwoorwēēch kee, poyiituuy ngʼoo :cheepyoosoonoonēē paani kāngʼēētyēērō :pichoochēē tōkōl meerat, āmu pō man kilē, kiikwoop :pichoochēē tōkōl cheepyoosoonoonēē?" 24Kuwālchi :Yēēsu kilē, "Lēēluut nyoongʼwoongʼ ku nyi moonkēt :akwaan wōloo lēē :siruut chēpō Iriin, aku moonkēt mpō kaamuuka nyēpō Iriin. 25Paani kaakungʼēētyēērō :piich meerat, ku mēēlē tākwoopiisyēy ntā /kēē-āp, māngʼiisyēy kilēē malaykeen choo mii kipsēnkwēt. 26Akipō nyuun ngʼeetat nyēpō piich choo kiikumēērō oo, toomō asooman :akwaan nkōō kiitapuu Muusa, akipō saamuurta nyoo kiimii ma akimalar, kiyoo kiimwoochi :Iriin Muusa kilē, 'Aneen Iriintoo Apraam, Isaka ākōō Chaakōp?' 27Mā Iriintoo piich choo kiikumēērō, aku pō choo sāpyootēēn. Kyoochuunnyēēkwaan." 28Kiimii yoonēē :koonēētiin aka nyēpō ngʼātuut nyoo kiimii kutēērēy kiyoo kiimii kungʼāloolēē :Yēēsu ākōō Satukaay. Paani keewaangʼ :Yēēsu kumwa ngʼaleechoochēē, kuuro :koonēētiintoonoonēē pō ngʼātuut kilē kiiwālchi :Yēēsu pichoochēē nkōō oor nyaa karaam. Kuteep :chiichoonēē Yēēsu kilē, "Nkōō ngʼātuut tōkōl choo kiikōōnēēch :Iriin, nyōō nyi ōōw nkōō tōkōl?" 29Kuwālchi :Yēēsu kilē, "Ngʼātuutyēē nyoo ōōw ku nyi: 'Israayeel, ateertee! Kiptaayaanteenyoon Iriin ku ākoongʼo. 30Icham Iriin Kiptaayaanteengʼuungʼ nkōō moongʼuungʼ tōkōl nkōō sāpoontāngʼuungʼ tōkōl, nkōō kaapkootuutēkuuk tōkōl, ākōō nkōō kaamuukēēngʼuungʼ tōkōl.' 31Aka nyoo ōōw nyēpō ārēēny ku nyi: 'Icham piich walak kilēē wōloo ichāmtooy keey.' Moomii ngʼātuut walak choo ēēchēēn choo siirēy chu." 32Paani keewaangʼ :Yēēsu kumwoorēy kilēē nyoonēē, kilēēchi :koonēētiintoonoonēē pō ngʼātuut, "Kōōnkēy koonēētiin, keemwaa man kilē Kiptaayaanteenyoon Iriin ku ākoongʼo. 33Karaam nyuun nēē cham :chiich aka tōkōl Iriin nkōō moonyiin tōkōl, nkōō kaapkootuutēchiich tōkōl, nkōō kaamuukeenyiin tōkōl, akicham piich walak kilēē wōloo chāmtooy keey. Karaam /keetuup ngʼaleechu kusiir /keepeel kōrōs nkōō Kōpō Iriin." 34Paani keero :Yēēsu kilē kāwālu :chiichoonēē nyaa karaam, kumwoochi kilē, "Mēēnyēēn lōōw mu pāyuunāt nyēpō kaa Iriin" Kungʼeetee yoonēē, ku moomii :chiich nyoo kiitakuteep Yēēsu ngʼālyoon aka tōkōl. 35Kii nēē mii :Yēēsu kuunēētēy piich mu piriiruu Kōpō Iriin, kuteep kilē, "Muukēē kilē nee kumwa :koonēēt chēpō ngʼātuut kilē chōōnēē :Meesaaya kōpō Tāwuti? 36Kiimwoochi :Toomirmiir nyoo Tiliil Tāwuti kumwa kilē, 'Kiimwoochi :Kiptaayaan Kiptaayaanteenyuun kilē: Tēpēē ēēruunyuun kamas pō taay ākōy āpēluun puunikuuk.' 37Kunyuun oo, nēē kuurēē :Tāwuti inyeentee 'Kiptaayaanteenyuun,' kilēkuuntooy ānō wēēriinyiin?" Kiipāypāchi :piich tōkōl kiyoo kiimwa :Yēēsu. 38Kitas taay :Yēēsu kunēētiisyō kilē, "Āriipēē keey koonēēt chēpō ngʼātuut. Chāmēy :pichu kuulookēy sirōōy choo koorēēn akumārēy /kēētookwēēsēy nkōō koonyit nkōō siirēēn. 39Chāmēy :pichu kulēwēnēy ngʼachareen chēpō taay mu sinakōōkiin aku mwērchinii :pichu ngʼachareen chēpō koonyit mu kaaptuum. 40Mēlmēēlēy :pichu chēēpyōōsōōy choo lēē mōsōōk takusaree tukuukwaak, aku sooyēy ku-irtooy keey kilē kāroomō. Tilchinii :Iriin kiirwook pichu nyaa ngʼwaan kusiir nyēpō chiich aka tōkōl." 41Kimii :Yēēsu kutēpēē ngʼwēny mu Kōpō Iriin yoo kilēēkitēē saapōōy choo /kiikuutēnii kōōnuunēy chēpō pāyiisyoo Iriin. Nkōō yoonēē, kuuro :Yēēsu wōloo kiitēntooy :piich kōōnuunēy saapōōchoochēē. Kiitēnii :piich choo lēē mōkōrō rōōpiyō chaa chaangʼ saapōōchoochēē. 42Nēē mii yoonēē, kuchō :cheepyooso nyoo kii mōsōk aku mēēywoon, akuutē rōōpiyō choo ngʼērin choo kiitingʼēy saapaanoonēē. 43Kukuur :Yēēsu kiineetanichiich akumwoochi kilē, "Āmwoorwook man kilē, cheepyoosooni lēē mōsōk nyi kākōōnu kōōnuunēy chaa chaangʼ kusiir chiich aka tōkōl nyoo kēētē kir saapaani. 44Kākoonu :pichu tōkōl kir nyoo miningʼ nkōō chaa chaangʼ choo tingʼēy, ku cheepyoosooni, lēē mēēywoon kilēē wōli lēē, ku kākōōnu chaachiich tōkōl choo kāriipēē keey."


Copyright
Learn More

will be added

X\