Maarkō 11

1Kii nēē riichi :Yēēsu ākōō kiineetanichiich Chēērusālēēm, yoo kilēēkitēē Peetpaake ākōō Peetaaniya, yoo lēēkitēē Tulwoo Musēytuun, kuuyooytō kiineetanichiich ārēēny, 2akilēēchi, "Apee ākōy kēēstoonichu ātoopēnēy. Āmii āchuutēy, ānyōōruuy moorpō sikiryō kurataat akutoomō kukasan chiich pērēētuu aka. Atyaak sikiryoonoonēē ākoorēēwu. 3Nēē teepaak :chiich kilē, 'Āmu nee saa-ira kilēē nyi?' āmwoochi kilē, 'Mārēy Kiptaayaan akuu-ōōkuuy yēēnyi kilē weel.' " 4Kipa :kiineetanichoochēē akupa kunyōōru mooroonēē pō sikiryō kākirāti kurkat saangʼ, akuutyaak. 5Kumii kuutyookēy, kuteepee :piich walak choo kiimii yoonēē kiineetanichoochēē kilē, "Kālē nee saatyaaka moortaa sikiryō?" 6Kuwālchi :kiineetanichoochēē kilēē paani kimwoochinii :Yēēsu. Kuchāmchi :pichoochēē kwoop mooroonēē. 7Kuurēētō ākōy yi kiimii :Yēēsu, akuukārkoorchi sirooy pataruu sikiryēē. Kutēpēērō :Yēēsu sikiryēē. 8Kuukārkoorchi :piich chaa chaangʼ sirōōkwaak aree, kuukārkoorchi :walak sāk choo kiiyāpēē paraatin. 9Kituumchinootō :piich choo kiimii taayuunyiin nkōō choo kituupēy lēt kilē, "Ōōsaana! Pēēruuroot :chiich nyoo chōōnēy nkōō kaarinaa Iriin. 10Pēēruuroot pāyuunātoo paapēēnyoon Tāwuti nyi mii kuchōōnēy. Ōōsana mu kipsēnkwēt!" 11Ku-it :Yēēsu Chēērusālēēm akiwō kuchuut piriiruu Kōpō Iriin. Kuuro wōloo kiilēē :kir aka tōkōl. Āmu kiikiikutuuriit :kōōrēē kiwō :Yēēsu nkōō kiineetanichiich taman nkōō ārēēny Peetannya. 12Pērēētuu nyi kiituupēy, kupēērēē :Yēēsu ākōō kiineetanichiich Peetannya, kwaam :piri Yēēsu. 13Nēē tākumii kupēētii, kuurōōti :Yēēsu mookāngʼwō wōloo lōōw nyoo kiituk sāk. Kiwō :Yēēsu kuuro nēē muukēy kunyōōrchi lokoryoon aka tōkōl. Nēē it mookāngʼwēē, kunyōōru kilē sāk kipaat, āmu kiimā pērēētuus choochēē choo kiiyēēy :maakany lokor. 14Kumwoochi mookāngʼwoonoonēē kilē, "Kima-ameeniin :chiich lokor ākōy." Kiteer :kiineetanichiich ngʼaleechoochēē. 15Kii nēē it :Yēēsu ākōō kiineetanichiich Chēērusālēēm, kuchuut :Yēēsu piriiruu Kōpō Iriin akutoowu ku-oon piich choo kyooltooy ākōō choo kyooliisyēy, akumilta meeseen chēpō piich choo kiiwāltooy rōōpiyō ākōō ngʼachareen chēpō piich choo kyooltooy chēēptuukēēn. 16Kiimaachāmchi :Yēēsu chiich aka tōkōl nyoo kiitingʼootēy kir aka tōkōl nyoo kyooltooy kupuntoorō piriiruu Kōpō Iriin. 17Kuuneet :Yēēsu pichoochēē kilē, "Masiraat kilē, '/Kukuurēē koonyuun kōpō saayeet nyēpō piich chēpō kōōrootin tōkōl'? Nku kyaa-ir :akwaan kilēku 'kēpēnoo chōōr.' " 18Paani kateer :tisiik choo ēēchēēn ākōō koonēēt chēpō ngʼātuut kiyoo kii-ir :Yēēsu, kutuurchi :moo akutoowu kuwas wōloo pārtooy Yēēsu. Kiiwārēy :pichu Yēēsu āmu kiikwōngʼyō :piich tōkōl nkōō wōloo kiinēētitooy. 19Kii nēē tuuriit :kōōrēē, kuureer :Yēēsu ākōō kiineetanichiich Peetannya. 20Paani kāwo kuyyeech :kōōrēē, kuureer :Yēēsu ākōō kiineetanichiich Chēērusālēēm. Kumii kupēētii, kuurō mookāngʼwooni kiipānēy :Yēēsu kiiyaam. 21Kuupkaat :Pēētērō akilēēchi Yēēsu, "Koonēētiin, roo kee! Kiiyaam :mookāngʼwēē nyi kēēpānēy." 22Kuwālchi :Yēēsu kiineetanichiich kilē, "Arana Iriin. 23Āmwoorwook man kilē chiich aka tōkōl nyoo mwoochinii tulwooni kilē, 'Ngʼeeta akiiwēēwiirchi keey araaray,' akuuran nkōō moonyiin kilē irēē kiyoo kamwa, ku-irēē kilēē nyoonēē. 24Āmwoorwook nyuun kilē kir aka tōkōl nyoo koosoom nkōō soowuut, aran kilē koonyōōru, kukōōnook nyuun :Iriin. 25Nēē āsooyēy Iriin, akimii :kiyoo ra nyoo kiiku-irwaak :chiich aka, ānyōōchi kaat kupōk sukunyōōwook kaat mpō :Paapēēngʼwoongʼ Iriin nyoo mii kipsēnkwēt. [ 26Nēē moonyōōchi piich walak kaat, kumānyōōwook kaat :Paapēēngʼwoongʼ nyoo mii :kipsēnkwēt ngʼōōkiikwook.]" 27Kuureer kuwaraka :Yēēsu nkōō kiineetanichiich Chēērusālēēm. Paani mii kumānēē piriiruu Kōpō Iriin kupka tisiik choo ēēchēēn nkōō koonēēt chēpō ngʼātuut nkōō kāāntōōy, 28akuteepee kilē, "Itingʼēē kaamuuka nee i-ir ngʼaleechu? Ntā ngʼoo nyi kiikōōnin kaamuuka nyoo i-irēy ngʼaleechoochēē?" 29Kuwālchi :Yēēsu pichoochēē kilē, "Ātēēpēēnook tēēpuut aku nēē āwālwoon, āmwoorwook nyoo kiikōōnān kaamuuka a-ir ngʼaleechu. 30Āmwoorwoon! Kiichōōnēē :kaamuukaa Chowaana kuupootiisāniisyēy wōloo mii :Iriin, ntā wōloo mii :piich?" 31Kuteepee keey pichoochēē kilē, "Nēē kumwaa kilē, 'Kiichōōnēē wōloo mii :Iriin,' kuteepeeneech kilē, 'Āmu nee nyuun simaaran inyeentee?' 32Ku nēē kimwaa kilē, 'Kiichōōnēē wōloo mii :piich.' " (Kiiwar piich āmu kii rānēy :piich tōkōl kilē kii ōōrkooyoontoo Iriin :Chowaana.) 33Kuwālchi nyuun :pichoochēē Yēēsu kilē, "Mākuunkēt." Kilēēchi :Yēēsu pichoochēē, "Moomwoorwook nyuun mpō nyoo kiikōōnān kaamuuka a-ir ngʼaleechu."

will be added

X\