Chuuta 1

1Aneen :nyi Chuuta, wēēriingʼwaangʼ Chēēmis, nyoo ā-irēy pāyiisyoo Yēēsu Kiriistō. Āsirwookwaan piich choo kiikuurook akichāmook :Paapaan Iriin, akuriipook :Yēēsu Kiriistō. 2Kuriireenaak :Iriin kitya akukōōnook kaalya ākōō choomnyoot. 3Choo kituupchō, koomārēy kitya asirwaak akipō sopoon nyoo rēēl nyoo kirāmtooy :tōkōl, aku kaaroo kilē karaam asirwaak ākiilook tooriipō koonēētuutēchoochēē kyaaran choo kiitē :Iriin piichiich asip ākoongʼo kipaat. 4Kiikuulēēpu keey :piich walak choo chuunsōōt chamataa Iriin kilē kichāmwēēch kee-ira takal kilēē wōloo kimārtooy, akutay Yēēsu Kiriistō nyoo :inyeentee ākityōōn Kiptaayaanteenyoon nyoo pāyuuy kir aka tōkōl. /Kiikēēsip keesir kēny kilē /kuurwoochinii piich choo lēē choochēē. 5Amārēy āpkootwook kilē mpō ntā kiisāru :Iriin piichiich kupeera Miisiri, ku kiingʼam piich lētuun choo maaran inyeentee. 6Apkaata kee malaykeen choo kiisiiru kaamuuka nyoo /kiikuutē, akumētō wōloo kiimangʼēy. Kiitē :Iriin malaykeenichoochēē wōloo tuur akurātootēēn nkōō āngʼōōy ākōy pērēētuunoonēē ōōw pō kiirwook. 7Aroo kee mpō kiyoo kii-ira mu Sotom, Komoora ākōō kōōrootinēēchu kiilēēkitēē yoonēē. Kiitakalaan :mpō piipō kōōrootinēēchoochēē kitya. Kiikungʼama kōōrootinēēchoochēē ma, akungʼuutwēēch :nyoonēē kilē nyōōruuy siitoo ma nyēpō ākōy piich choo ka-ir ngʼal choo lēē choochēē. 8Nkōō oor nyoo lēē nyoonēē, ku nyēērēē :koonēētichoochēē ruchinii pōōrwēēyiikwaak nkōō ngʼōōki choo irēy. Rēēngʼēy :pichoochēē kaamuukaa Iriin akumuulēy toomirmiirēy choo tingʼēy kaamuuka. 9Mpō kupoorsōōt :Mikayeel, malaykayaantaanoonēē ōōw, ākōō Kipngʼōōkiyoon akipō muusyoontoo Muusa, ku kiiwar kumuul Kipngʼōōkiyoontoonoonēē. Kimwoochi kilē, "Pkoongʼin :Iriin." 10Aku nyuun muulēy :pichoochēē mpō tukun choo mēēnkēt. Irēy ngʼāl kilēē tyoongʼin choo mātingʼēy sōwuunō. Mii kungʼāmēy keey pichoochēē. 11Ōchēy :pichoochēē! Āmu kiituup araa Kaayin. Kyoop :kimoopō rōōpiyō kilēē Palaam. Kiikuchuunnyō :pichoochēē kilēē Koora akēēngʼāmēy mpō akwaaneek kilēē Koora. 12Piich :pichoochēē choo mānyooluuy nkōō tuumwēyiikwook chēpō choomnyoot, nēē ā-āmiisyēy :tōkōl kuuntuulchinii keey āmiisyō nyoo mēēwāriisyēy. Lēē :pichoochēē pool choo mātingʼēy roop choo āpēy :yoomēt. Lēē keet choo mātingʼēy lokor mpō nēē pērēētuus choo nāmēy lokor, aku nyuun /kupāluuy kipootō iriinēkwaak. Mēērsōōt kunyil ārēēny. 13Lēē :pichoochēē kipirti nyēpō araaray nyoo wiirchinii tapan tukun tōkōl chaa raacheen. Lēē :pichoochēē kookeel choo rōōmrōōmānootēy choo kiikuchēpchi :Iriin tuurin nyoo ōōw nyēpō ākōy. 14Kiingʼoor :Eenok, nyoo kiipō āpēn pō tisap kungʼeetee Aatam, ngʼaleepō pichu. Kimwooru kilē, "Aroo kee! Chōōnēy :Kiptaayaan ākōō lukoo piichiich chaa chaangʼ kitya. 15Chōōnēy kurwoochinii chiich aka tōkōl akipō ngʼal choo kiiku-ir. Tilchinii kiirwook piich tōkōl choo mā pō Iriin akipō ngʼōōkiikwaak choo kiiku-ir, ākōō ngʼal tōkōl choo raacheen choo kiikumwaarteera :pichoochēē Iriin." 16Nyinyēēy akukwiintoonēy :pichu. Tuupēy :akwaaneek kimootangʼwaangʼ nyaa ra. Lāsootēy keey akungʼoolēē piich walak tākusāpō yoonēē. 17Aku oo, chamanichuuch, mooruutyēērēē kiyoo kiisip kumwooru :kāāyooytooyiipō Kiptaayaantēēnyoon Yēēsu Kiriistō. 18Kiimwoorwook :pichoochēē kilē, "Nkōō pērēētuusyēpō lēt kupkoonēy :piich choo muulsyēy, kupāyuuy :mākuut chaa raacheen chēpō pōōrwēyiikwaak." 19Piich choo lēē chu choo āpuuy pēēsyoot. Tuupēy :pichoochēē ātēpuutēpō piipō ngʼwēny, piich choo mātingʼēy Toomirmiir nyoo Tiliil. 20Aku nyuun akwaan chamanichuuch, acheera keey nkōō kaaraneengʼwoongʼ nyoo tiliil ākoosooyēy nkōō Toomirmiir nyoo Tiliil. 21Āriipō keey akaanam choomnyoo Iriin āmii ākānyēy pērēētuunoonēē chōōnēy :Kiptaayaantēēnyoon Yēēsu Kiriistō nyoo riirēēnook akichō kukōōnook sopoon nyēpō ākōy. 22Ariiree piich choo toomtoomēnsōōt nkōō kaaraneengʼwaangʼ. 23Āsāruu choo mii kupēētii ma. Ariiree ākooriipēē keey piich choo irēy ngʼōōki akaasas ātēpuutēkwaak chaa raacheen. 24Kutōrōriit :Iriin nyoo muukēy kuriipook simooputyō, akuumutaak apa taayuunyiin āpēērēy keey ākoopāypāyō kitya. 25Kutōrōriit :inyeentee nyoo Iriin ākityōōn nyoo kiisārwēēch kupunuunō Yēēsu Kiriistō Kiptaayaantēēnyoon. Ōōw Iriin aku tingʼēy :inyeentee kaamuuka tōkōl. Aku nyaanyiin pāyuunātō. Kiipāyuuy :inyeentee tukun tōkōl kēny, aku pāyuuy aniin ākōō mpō ākōy. Lēē nyoonēē.

will be added

X\