Ēpēēsō 6

1Laakōōchu, ākoonyitō sikiikwook, āmu ngʼālyoon nyoonēē nyoo mārwook :Iriin. 2Mwoorēy :siruut kilē, "Koonyitō apoongʼuungʼ ākōō eeyēēngʼuungʼ." Ngʼātuut :nyēēnyi nyēpō taay nyoo tingʼēy kāāyoomiisō, kitas taay :Iriin kumwa kilē, 3"Tēēmāngʼiisyēē nyaa karaam mu ngʼwēny ākōy iril." 4Siikiichu, moo-usēy laakōōkwook, aku ānēētēy ātēpuut chēpō Kiptaayaan. 5Ōōtwook, ākoonyitō mōkōrēēkwook. Ākoonyitēy nkōō moo ākoongʼo kilēē wōloo ākoonyitēy Kiriistō. 6Mookiilchi keey pāyit kipaat nēē rōōtook mōkōrēēkwook kilē sikuchamaak, aku a-ira kilēē yoo ā-irchinii Kiriistō. A-ira kiyoo mārēy :Iriin nkōō moo ākoongʼo. 7Ā-irēy nkōō moo ākoongʼo kilēē yoo āmii ā-irchinii Kiptaayaan pāyiisyōōnoonēē amaapkaat kilē āmii āpāyiisyēēchinii piich. 8Āmwoorēy kilēē nyoonēē, āmu ānkēt kilē tēnii :Iriin chiich aka tōkōl mālāk akipō kāroomin aka tōkōl nyoo ka-ir, nēē ōōtwookiin, ntā mā ōōtwōōkiin. 9Mōkōrēēchu, āriipō ōōtwookiikwook nkōō oor nyaa karaam. Āmoo-ārāsi āmu ānkēt kilē Kiptaayaanteengʼwaangʼ ku Kiptaayaantēēngʼwoongʼ mpō aku mii inyeentee kipsēnkwēt. Amēēsyookēy chiich. 10Ngʼālyoontēē aka nyoo āmwoorwook ku nyi, kanya kikōōnook :Kiptaayaan kaamuuka tookiilyēē. 11Alaaka kariipō pooryoot chēpō Iriin taamuuka akarta ngʼuurnan ākōō ngʼoroomnyō tōkōl nyēpō Syeetaani. 12Mā kupoorsōōt nkōō piich. Aku kumii kēēpoorsōōt nkōō paytaar ākōō koomuukēy chaa raacheen nkōō ngʼwēnyuuni pō tuurin, kipootō kaamuukaa toomirmiirēy chaa raacheen choo mii parak. 13Alaaka nyuun kariipō pooryoot chēpō Iriin kukaraam, taamuuka akarta puunyoontee nkōō pēērēētuu rāyiityō, tānēērook pooryoot, ku tookiilootēēn. 14Ākārmēnēē keey man, kilēē paani rātēy keey :chiich nyēpō luk nēē mārēy kiwō pooryoot. Āmāngʼiisyō nkōō māngʼoot nyaa chuulaat saakartaaree keey kilēē paani kārtoorēē :chiich takat karin nēē wēētii pooryoot. 15Akaalaak mpō lōkōōy choo kāroomēēn choo āpuuy kaalya sookilyēē kilēē chiich nyoo keelaak kwēēr choo nāmēy ngʼwēny. 16Anama kaarana kilēku loongʼ nyoo ātēēktoorēē kootin tōkōl choo uutuuy :Syeetaani. 17Āriipēē mētēwēyiikwook sāruuno kilēē paani riipeey :chiich nyēpō luk mētinyiin loongʼoo pooryoot. Akaanam chōōkoo Toomirmiir nyoo ngʼālyoontoo Iriin. 18Ā-irēy ngʼaleechu tōkōl asaa Iriin kuutoorētook. Āsooyēy sayit aka tōkōl nkōō kaamuuka nyēpō Toomirmiir. Ālēkuu choo āchēpootēēn pērēētuus tōkōl aku moochoosyō. Ākoosoochinii piipō Kiriistō tōkōl. 19Āsoowoon mpō ānyōōru ngʼal choo āmwoorēy saamuuk āngʼuutu lōkōōy choo kāroomēēn choo kii-ungʼootēēn nyoo moowāriisyēy. 20Arataat āmu kyaa-amta lōkōōyichoochēē kāroomēēn. Asoowoon amwaarta ngʼalēēchoochēē kilēē wōloo maraat nyoo moowāriisyēy. 21Āmii āyookuuy Tukiikō kuchō wōloo āmiikwaan. Tuupchēē :inyeentee nyoo chamaat aku nyoo /kiirānēy akipō pāyiisyoo Kiptaayaan. Mwoorwook lōkōōy tōkōl akipō aneen soonkēt :mpō akwaan wōloo ālaanēēn ākōō kiyoo ā-irēy akumwoorwook wōloo kilēēchaan tōkōl akuukiilook. 23Kuutoorētook :Paapa Iriin ākōō Kiptaayaan Yēēsu Kiriistō soochoomnyēē, akaaran inyeentee, ākootēpō nkōō kaalya. 24Kuupēēruuriisyō tōkōl choo chāmēy Kiptaayaantēēnyoon Yēēsu Kiriistō nkōō choomnyot nyoo matilēē.

will be added

X\