Ēpēēsō 1

1Aneen :nyi Paawulō nyoo kilēwēnān :Iriin ālēku kāāyooytooyiintoo Yēēsu Kiriistō. Āsirwook lōkōōyichu akwaan piipō Iriin chēpō Ēpēēsō choo /kiirānook ākootuupēy Yēēsu Kiriistō. 2Kuupēēruurook :Paapaan Iriin ākoonyōōru kaalya nkōō wōloo mii :inyeentee nkōō Kiptaayaan Yēēsu Kiriistō. 3Kuuloosuuy Iriin nyoo Paapaa Kiptaayaantēēnyoon Yēēsu Kiriistō nyoo kiikukōōnēēch pēēruur aka tōkōl nyēpō sopoonpō Toomirmiir kupunuunō Kiriistō. 4Kiisip kulēwēnēēch :Iriin kutoomō /kēētoowu ngʼwēny sikēētililiituu nyoo mākutingʼēy rāyiityō aka tōkōl nkōō taayuunyiin kupunuunō :Kiriistō. 5Kiisip kutil :Iriin nkōō choomnyēēnyiin kilē kēēlēkuuchaan laakōōchiich kupunuunō Yēēsu Kiriistō. Kuupaypaay nyoonēē inyeentee kitya. 6Kuutōrōōrēy Iriin akipō pēēruuroonēē ōōw nyoo kiikukōōnēēch kupunuunō wēēriinyiin nyoo chāmēy :inyeentee. 7Kiikutyaakeeneech :Kiriistō kērētiichiich choo kiitarta, /akiikēēnyōōwēēch kaat ngʼōōkiichooch. Chāmēēch :Iriin nyaa tyaan kēny! 8Nkōō chamataani ōōw, ku kiingʼoongʼwēēch :Iriin chēpētēēnyiin nyoo kii-ungʼaat. Kikōōnēēch ngʼoroomnyēēnyiin aku-ireech kēēsōwuu kiyoo kiimārēy ku-ir kupunuunō Kiriistō. Kiitil ku-ir kilēē nyoonēē āmu kiirō :inyeentee kilē kii karaam. 10Kir nyoo kiikuchēp :Iriin ku nyi: nēē iti :pērēētuus choo yāmootēēn ku-isu tukun tōkōl choo mii parak ākōō ngʼwēny kuuryoonchi :Kiriistō. 11Iriisōōt tukun tōkōl kutuup keey nkōō chēpuut chēpō Iriin. Kilēē wōloo kiimārtooy inyeentee nkōō taay, /kēēsip /kēēlēwēnēēch kēēlēkuu piichiich kipunuunō Kiriistō. 12Kunyuun, kuuloosuuy Iriin akipō ōōwintanyiin achaan Yāwuutik choo kiikuusip keekanyaanu :Meesaaya kitoomō kuchō. 13Kyaateer :akwaan mpō ngʼālyoontoo man, lōkōōy choo kāroomēēn chēpō sāruunō. Kii nēē aran :akwaan Kiriistō /kēēkōōnook Toomirmiir nyoo Tiliil nyoo /kiikiiyoomiis kēny, /sikēēnkētēēnook kilē akwaan chaachiich. 14Paani /kiikukōōnēēch Toomirmiir, ku toowunō :nyoonēē nyēpō tukun choo kupa kēēnyōōruuy mu pērēētuu nyēpō lēt nyoo /kiityooktēēch choo kipō Iriin. Kuuloosuuy nyuun Iriin akipō ōōwintanyiin. 15Kyaateeraa kilē ārānēēkwaan Kiptaayaan Yēēsu ākoochāmēy piipō Iriin kitya. 16Moochoosaa nyuun āmwoochinii Iriin kōōnkēy nēē āsoowook. Āsoowook pērēētuus tōkōl, 17āsooyēy ākōy Iriin nyoo tōrōōr aku paapaa Kiptaayaantēēnyoon Yēēsu Kiriistō kilē kukōōnook ngʼoroomnyō nyēpō Toomirmiir akungʼoongʼwook āsowuu wōloo lēē :inyeentee. 18Āsooyēy kuureer kilē kuyootiisyō :mētēwēyiikwook soosowuu ōōwinpō kiyoo kiikuuyoomiiswook :Iriin kilē kōōnook akaaroo mpō wōloo tēēnō :pēēruur nyoo ānyōōruukwaan kupootō piipō Iriin tōkōl. 19Ākoosooyēy mpō āsowuukwaan wōloo tēēnō :nyikiisinpō kaamuuka nyoo mii kupāyiisyēērēē :Iriin nkōō wōloo kumiichaan choo kiikeeran inyeentee. Moomii :kiyoo kiitēēnēē kaamuukaanyēēnyi. 20Kiipāyiisyēērō :Iriin kaamuukaanoonēē, paani kiingʼeeta Kiriistō meerat aku-ir kutēpō ēēruunyiin nyēpō taay mu kipsēnkwēt. 21Pāyuuy :Kiriistō pāytooyiin aka tōkōl ākōō piich tōkōl choo tingʼēy kaamuuka kipootō mōkōrō tōkōl. Inyeentee nyēpō kaamuuka nyoo ōōw kisiir walak tōkōl nkōō kōōrooni nkōō mpō kōōrēē nyoo chōōnēy. 22Kiikuutē :Iriin Kiriistō kupayta kir aka tōkōl aku-ir inyeentee kuryoontō kaaniiseenyiin, 23nyoo pōōrpō Kiriistō. Inyeentee nyoo irēy tukun tōkōl kukēchi keey nkōō oor aka tōkōl. Nēē iti :kaaniisaa Kiriistō wōloo mārtooy inyeentee, kupaypayiit.

will be added

X\