1 Tiimōti 4

1Ngʼuutuuy :Toomirmiir nyoo Tiliil kutooku nkōō pērēētuus choo pkoonēy kilē chuunnyēērēē :piich ngʼālyoon nyēpō man akutuup ngʼaleepō :toomirmiirēy chēpō ngʼuurnan ākōō koonēētuut choo pkoonēē wōloo mii toomirmiirēy chaa raacheen. 2Mēlmēēliisyēy :pichoochēē amaakuunkēt ngʼuurnan ākōō man. 3Rēētēē :pichoochēē piich kwoopiisyō. Mwoochinii piich kutaya keey kwoomēy tukun walak mpō ntā kii-irēy :Iriin āmiisyō kilē kutaak :piichiich choo nkēt man akwaam kumwoochinii inyeentee kōōnkēy. 4Āmwooraa kilēē nyoonēē, āmu karaam :kir aka tōkōl nyoo ki-ir :Iriin. Māmārēy /keetay kir mpō ākoongʼo nēē /kutookēy /kēēmwoochinii Iriin kōōnkēy, 5āmu irēy :ngʼālyoontoo Iriin ākōō saayeet :kir aka tōkōl kutililiit. 6Nēē ngʼuuti tuupchēēnichooch ngʼaleechu, ku kee-ir pāyiisyoo Yēēsu Kiriistō nkōō oor nyaa karaam. Itiirēē keey ngʼālyoon nyēpō man nyoo /kiikuuneetin nyoo ituupēy. 7Itayee keey siiyēēn chēpō sōlwoonti choo mānāmēy keey nkōō araa Iriin. Mārēy ineet keey itēpēē kilēē wōloo mārtooy :Iriin. 8Nēē ineet ichuulaata pōōrtāngʼuungʼ, kuutoorētiin nkōō ngʼwēny, ku nēē tēpēē nyuun kilēē wōloo mārtooy :Iriin, ku sāruun nkōō sopoon nyēpō ngʼwēny ākōō nyēpō kōōrēē nyoo chōōnēy. 9Pō man ngʼālyoontooni aku karaam kuuran :chiich aka tōkōl. 10Kiikiilēēchaan keey kēē-irēy pāyit kwōngʼuut ākēēnyārilsōōt kilē sikuuran piich ngʼālyoon nyēpō man. Kitiirēē keey Iriin nyoo sāpoot nyoo inyeentee ku Sāruuniin nyēpō piich tōkōl choo kiikutiirō keey inyeentee. 11Makaat ikiil ngʼaleechoochēē paani inēētiisyēy. 12Kumeekany kureengʼin :piich āmu teemanangʼ. Inyēēn nyuun nyoo mārēy kuurōōtēēniin :piich tōkōl choo kiikuuran ngʼālyoontēē, wōloo ingʼālooltooy ākōō wōloo itēptooy, wōloo ichāmtooy piich, wōloo irāntooy Iriin, ākōō tiliilin nyoo itingʼēy. 13Ipāyiisyēērēē pārooyin nyoo mii ku toomō a-itu, isōōmānchi piich ngʼālyoon, i-āmchinii akiinēētēy. 14Kimeereengʼ kaamuukaanoonēē kiikōōnin :Iriin kupunuunō kiyoo kiimwooru ōōrkooyoontō aka paani kiikōnōōriin :kāāntōōy chēpō piich chēpō Kiriistō ēēruunēkwaak. 15Itē keey tukuuchoochēē akiikiilchi keey kilē siiny sikuuro :chiich aka tōkōl wōloo itāstooy taay. 16Makaat iriip sāpoontāngʼuungʼ akiiriip ngʼal choo inēētēy. Imurtoochi ngʼaleechoochēē āmu nēē i-ir kilēē nyoonēē, inyōōruuy nkōō piich choo inēētēy sopoon nyēpō ākōy.

will be added

X\