1 Kōōriintō 6

1Nēē kwiintoochi keey :chiich nkōō chiitō aka nyēpō Kiriistō, ku mamakaat ā-āpchi ngʼaleechoochēē piich choo mēēnkēt Iriin kuurwookwook. Makaat nyuun ā-āpchi ngʼaleechoochēē piich chēpō Kiriistō sikuchuul. 2Moonkēt :akwaan kilē piich chēpō Kiriistō :choo rwoochinii pērēētuu aka piich chēpō ngʼwēnyuuni? Nēē āpēētiiy ārwoochinii piich chēpō ngʼwēny oo, ku siirook atil ngʼal choo mēnkēēchēēn choo lēē chwēēchu? 3Moonkēt :akwaan kilē kuurwoochiniichaan malaykeen? Pō man nyuun kilē kiimuukēēchaan kēērwoochi tukun choo mēnkēēchēēn chēpō ngʼwēnyuuni. 4Ku nēē pka nyuun :ngʼala choo lēē choochēē oo, ara kwoopchinii piich choo mēēkoonyitēy :piich chēpō Kiriistō sikuchuul ngʼaleechoochēē? 5Āmwooraa kilēē nyoonēē, angʼalaaleenaak nyoo mā karaam. Āmāraa ateep kilē oo, moomii :chiich mpō ākoongʼo nkōō akwaan nyoo chikanaat nyoo nkēt kiyoo irēy nyoo muukēy kuchuul ngʼaleechoochēē? 6Āmu nee nyuun tākiwō :tuupchēēnyoon aka kukuurtoochi kōōk tuupchēēnyoon nyiinō aka akuutē piich choo toomō kuuran Iriin kuurwoochi? 7Akwaan :piich chēpō Kiriistō, nēē kuurtoochi :tuupchēēnyoon tuupchēēnyoon aka kōōk, ku kaakungʼuutu keey kilē kāmoomuukēēkwaan kir. Kaykay /kee-irwaak nyaa ra ntā /keechooreenaak tukuukwook. 8Nku :akwaan nyuun ākwoonēēk chu ā-irchinii keey nyaa ra ākoomēlmēēlēy choo ātuupchō. 9Moonkēt :akwaan kilē māchuutēy :kipngʼōōkiis Kaa Iriin? Āmoomēlmēēl keey. Māchuutēy Kaa Iriin :chiich nyoo lēē kiptakalyaan, nyoo kutunchinii kaanaamōōn, nyoo siirēy karwa, mēlmēliin 10chōōr, chēēmootiin, kipōōkitiis, choo muulootēy piich ntā ku choo sārootēērēē piich tukuukwaak. 11Kyaakarkeey :akwaan walak nkōō pichoochēē. Ku paannyēēnyi nyuun, /kikēē-isto ngʼōōkikwook /akeetapaanaak āpoyiitu Iriin. /Kikeetyaaytaak ātililiitu kupunuunō Kiptaayaan Yēēsu Kiriistō ākōō Toomirmiiryoo Iriintēēnyoon. 12Muukēy :chiich nkōō akwaan kumwa kilē, "Nku /kuchāmwoon a-ir kir aka tōkōl." Āmwoorwook nyuun kilē mā karaam :kir aka tōkōl. /Kuchāmwoon kir aka tōkōl aku māmārēy nyuun āchāmchi keey kupaytaan :tukuuchoochēē. 13Muukēy mpō :chiich kumwa kilē, "Pō :āmiisyō moo aku pō :moo āmiisyō." Man nyoonēē, aku nyuun pootēy :Iriin tukuuchoochēē tōkōl pērēētuu aka. /Maaku-ir nyuun pōōrpō chiich /sikee-ira takal. /Kiiku-ir kupāyiisyēēchi :Kiptaayaan aku riipēy :Kiptaayaan pōōr. 14Kiingʼeeta :Iriin pōōrpō Kiptaayaan meerat, akungʼēētēē mpō pōōrwēyiichooch meerat nkōō kaamuukeenyiin. 15Moonkēt :akwaan kilē pō :pōōrwēyiikwook Kiriistō? Muukēē kilē nee kēētuuyō pōōr nyēpō Kiriistō nkōō cheepyooso nyoo lēē mēlmēliin? 16Ntā moonkēt akwaan kilē chiich nyoo kāru nkōō cheepyooso nyoo lēē mēlmēliin, ku kaakulēku kir ākoongʼo nkōō cheepyoosoonoonēē? Āmwooraa kilēē nyoonēē āmu mwoorēy :siruut chēpō Iriin kilē, "Lēkuuy :pichoochēē tōkōl kir ākoongʼo." 17Ku chiich nyuun nyoo kēētuuyō keey nkōō Kiptaayaan kulēkuuy :tōkōl kir ākoongʼo nkōō Toomirmiir. 18Lēyyē, ā-istoorēē keey takal. Moomii ngʼōōki aka tōkōl nyoo irēy :chiich nyoo muukēy kungʼam pōōrpō chiich kitya kusiir nyēēnyi. Chiich nyuun nyoo ka-ir takal kukaakungʼam pōōrtanyiin. 19Ntā moonkēt :akwaan kilē pōōrpō chiich nyēpō Iriin ku kōpō Toomirmiir nyoo Tiliil? Iriin nyi kiikōōnook Toomirmiiryoonoonēē mii pōōrwēyiikwook. Mā āpookwaan keey, 20āmu kiikuwaleenaak keey :Iriin paani kiikōōnu wēēriinyiin kima akipō akwaan. Āpāyiisyēērēē nyuun pōōrwēyiikwook ku karaam /sikēēkoonyitēē Iriin.

will be added

X\