1 Kōōriintō 4

1Kunyuun oo, maraat kuurōōtēēch :piich kilē kichaan ōōtwook chēpō Kiriistō choo /kiikēētē kuuryoonto ngʼal chēpō Iriin choo ki-ungʼootēēn. 2Makaat :piich choo /kiikuutē kuuryoontō ngʼal, ku piich choo /kuurānēy. 3Moopkootaa kilē kir nyoo ōōw nēē akwaan ntā ku piich walak choo kēērwookwaa nkōō kōōkwō. Moorwoochinaa keey mpō :aneentee ākityōōn. 4Mpō ntā āpkootaa kilē toomō a-ir :aneen kir nyaa ra, ku māngʼuutuuy :nyoonēē kilē maaleel :aneen, Kiptaayaan ākityōōn nyoo nkēt nēē kyaaleel :aneen. 5Āmootilchi nyuun chiich aka tōkōl kiirwook ākōy :pērēētuu nyoo wārākēē :Kiptaayaan. Inyeentee nyoo chōōnēy kungʼoongʼuuy tukun choo kii-ungʼootēēn aku syooru kaapkootuut chēpō piich kupka saangʼ, akunyōōrchi nyuun :chiich aka tōkōl kāāloosuneenyiin wōloo mii :Iriin. 6Kunyuun oo, tuupchēēnichuuch, koopāyiisyēēraa keey ākōō Āpōōlō āngʼuutuunēēnook ngʼaleechu toosōwuu kiyoo mwoorēy ngʼaleechu mwoorēy kilē, "Kikirēy, mēēsiiru kir nyoo /kiikeetil." Kimalasa keey nyuun :chiich chiitō aka kusiir aka. 7Ngʼoo :nyoo mwoorēy kilē karaam :chiitō aka kusiir aka? Mā :Iriin nyi kiikōōnin tukuuchu itingʼēy? Ntā nēē koo /kiikukōōnin oo, kwaamin nee teelasa keey kilēē yoo /kiimaakukōōnin tukuuchoochēē? 8Āpkootēēkwaan kilē kyoonyōōru kir aka tōkōl nyoo āmārēy? Ara kyoolēkuukwaan sōō mōkōrō? Ntā kyoolēku pāytooyiik kutoomō kēēlēkuuchaan? Ntā kiikyoolēkuukwaan man pāytooyiik, ntā kākipāytooy :tōkōl. 9Kutuup keey nkōō wōloo rōōtitooyēēch :piich, ku kiikarkeey :achaan chu lēē kāāyooytooyiik nkōō piich choo rātootēēn choo /kiikēētilchi meerat. /Kikēēngʼuutitooyēēch kuurooteech :malaykeen nkōō piich. 10Kichaan sālwēy akipō Kiriistō āngʼōrōōmō :akwaan. Kiichaan tāwārārō ātingʼēēkwaan kaamuuka. /Kuukoonyitook, ku /mākiikoonyitēēch. 11Ākōy paannyēēnyi, kēētingʼēy piri akwoomēēch :maral ākēēlookēy sirōōy choo lēē cheemaratōōy. Mii /kēēnyāriilēēch amākutingʼēy kēēstoon. 12Ku-irēy pāyit kwōngʼuut kēēpāyiisyēērēē ēēruunēchooch. Ku nēē /kupaneech, kēēsooyēy Iriin kuupēēruur nyoo kapaneech, ntā nēē /ku-usēēch, kēēmurtooy. 13Nēē /kumwaartaareeneech tukun chaa raacheen, keewalta muutyō. Kiikēēlēkuuchaan kaamōōrir pō piich chēpō ngʼwēny. 14Moosiraa ngʼaleechu kilē sookōōnook sōōrnān, āmii :aneen ātukoonook kilēē laakōōchuuch choo āchāmēy. 15Mpō ntā āmuukēy ānyōōru koonēēt chaa chaangʼ choo nēētook akipō araa Kiriistō, ku ātingʼēēkwaan paapa ākoongʼo. Āmwooraa kilēē nyoonēē, āmu kyoo-āmwook lōkōōy choo kāroomēēn chēpō araa Yēēsu Kiriistō akyoolēku paapēēngʼwoongʼ. 16Āmwoorwook nyuun kilē a-ir kilēē paani ā-iraa. 17Kiyoonēē :nyi ka-iran āyookwook Tiimōti nyoo kiikulēku laakweenyuun nyoo āchāmēy aku inyeentee nyoo /kutiirēē keey nkōō Kiptaayaan. Chōōnēy kuupkootwook wōloo ānēētaa piich chēpō Kiriistō akipō araa Yēēsu Kiriistō nkōō kaaniisa aka tōkōl. 18Ānkētaa kilē kiikulas keey :piich walak nkōō akwaan āmu kiipkootēy :akwaaneek kilē moochōōnaa wōloonēē. 19Ku nee cham nyuun :Kiptaayaan, ku lēēkit āchō wōloonēē, si nēē ityō aroot :aneen wōloo tēēnō :kaamuukaa pichoochēē lāsēy keey, mā kiyi mwoorēy kipaat. 20Āmwooraa kilēē nyoonēē āmu Pāyuunātoo Kaa Iriin ku mā pō ngʼal ākityōōn, pō nyuun kēēmāngʼiisyō nkōō kaamuuka nyēpō Iriin. 21Kunyuun oo, āchāmēy nyōōnō, ā-āpkook ngʼwoonin, ntā ā-āpkook choomnyoot ākōō tāloosyō?

will be added

X\