TIITO 2

1Bare mati au Tiito, noote kaliikiten waaf riiboor di baliikitenerab balegenab ceb. 2Liikiten kúniinaak kunifaanak man takum kukaan kabaje fuuñ, kusofooro kúkoiil, takum kukaan kufiila, manteer mbi kúlebieni, ban koote ebaj kafiumak káliŋaak di emeeŋ di kamaŋak di kamuutenak. 3Liikiten poop kuseekak kunifaanak manteer mbi kúlebieni di bagoroorerab booliil, takum kukaan kusuulena mba kukaan kúkalia. Bare koote kaliikiten bukaaku wajake, 4ban koote kaliikiten kuseekak kuñiilak man kumaŋ kutaiil di poop kuñooliil, 5di ebaj úyeget watote di wajoone, di kacookoor sísindoiil di ekaan wajake, di poop mbi kukob kutaiil, manteer furimaf fati Atijamit takum fukajeni. 6Moo mákonam buntoor kúpuraak kúniinaak man kasofooro kúkoiil. 7Au di fúkoi oote ekaan káyiisen kajake bee di kukila ñátum di mukaana majake manoosani. Nampi ommi di kaliikitenak di nujoon ban nusof lit. 8Sen kasankenak kooli kajoone kan an aatut kaŋoolen añoos. Kaan mo’omu kalatimi mbi kupuño máamak leekuŋoolen kusanken waaf wajakut mati wulaal. 9Reg kumiiceel koote esen kúkoiil bee di kurungaiil ban di yeiil di wanoosani wan kukammi. Takum koote kalaañen, 10mba ékuut di kukila. Bare koote káyiisen kúkoiil kalegenoe di kajake. Kammojaat anoosani pánayiisen kálebienak káamakak mati waliikitenimi mati Atijamit Apakenaolaal. 11Mati Atijamit náyiisenolaayiisen majakam moola bee kapaken bukanak búrom. 12Majakam mukila mújaatikenolaajaatiken takum ukaanaal nan kamanjutumi Atijamit, takum uriibenaal emaŋey ejakutey, ban ootaale ebaj eroŋey yati kasofooroak di poop yajoonaay di dúniyaay uye. 13Wulaal nukobaakob di kágolumak mati Funakaf fáriiŋumi síwoonoor, nampi Atijamit Áamakau di Apakenaolaal Yensa Apakenaau Áamakau, pánarajuli di mákalaam moola. 14Nasensen fúko’ool bee mati wulaal man apakenolaal di majakut manoosani ban nakaanolaal útienaal ekaan bukanool ceb ban nubajaal fuuñ fati emaŋ wajoonumi ceb. 15Liikiten uru nubuntoor bukanuul man kukammo, di poop umandooriil nan ceeŋumi. Nubabaj fujuum fati ekammo, ñaa takum umaŋ man an aheeleni.

will be added

X\