TIITO 1

1Ínje Paul, aroka ati Atijamit di poop áriiŋena ati Yensa Apakenaau Áamakau, eem di eciik letaraay uye. Nimukenimuken ban kuboñom man íliŋen kafiumak kati bukanak kan Atijamit amukenumi ban niliikiteniil man kúlaul malegenam máyiiseniimi buu kootumi ejaay di wan Atijamit amaŋumi eeno. 2Malegenam ume maseneiimi fúgolumaf fati eroŋey yati bándoorey. Atijamit, ágaajooreriitumi, áligeenumi eroŋey uye bala’a fúcitumaf fati dúniyaay. 3Ban di nanan une nalegenan, Atijamit Apakenaolaal náyiisenyiisen furimaf foola kápurumul di káriiŋenak kan Atijamit abilenammi man íriiŋenufo ñátum di kájaatikenak koola. 4Letaraay uye eciikiciik bee di Tiito, an isofumi nan añoolom alegen di kafium kákon. Emitey ekaan Atijamit Ampaau di Yensa Apakenaau Áamakau Apakenaolaal aseni majakam di kásuumaayak. 5Moo kaane níkatulikat di fúrinkaf fati Kurete, mambi uŋoolen ufabel burokab boololaal barinobomi ban numuken kúfacula kati fujoj fammi di esukooesuk riiboor di kájaatikenak kúmboom. 6Anifaan anoosani ati fujoj fati kuriiba aatut ebaj kabet, aate ebaj aseek ákon pat, ban kuñoolool búrom koote ekaan kúyinena ban takum kukaan kuñiil kakuruti ban kújameriit. 7Mati anifaan ati fujoj, aakenumi burokab bati Atijamit aatut ebaj kabet. Takum akaan an apooñe, mba nawaaken kañuumul, mba takum akaan ákalia mba águuloora, mba áfekete di sígodi. 8Bare aate emaŋ kawalen kujaaburuŋ di síndo’ool nanoosani ban naate emaŋ ekaan wajake búrom. Naate kasofooro ban nakaan joon, káliroor, di kasofooro. 9Oo naate esof lit kurimak kalegenak nan man aliikitenimi, mambi aŋoolen abuntoor bukaaku ñátum di baliikitenerab balegenab ban naŋoolen áyiis bee di kalatemi ko. 10Mati babaj kajuupoe kalatumi káyenten kaliikiten kalegen, di kasanken kútiikaar ban poop kubuntaak. Mo’omu mukankaan malegen bee di káliŋenemi mati mukaanaam mati futampaf. 11Bukanak buke koote katunoor sii. Mati kaliikitenak kaŋondaak kooliil bukoo súm kooku di kayiisiken kiil kajuupoe kápurumul di malegenam. Kuliikitenaak kaanomi mo’omu kumammaŋ sígodiuul ceb. 12Ákon di bukoo, aboña ákon di kuboñaiil ati fujoj, naane, “Bukanak kati Kurete kulepoora ceb, símunduŋ, ban kúmaŋeriit burok hani jasiinkun ban kurieri máamak.” 13Káyiisenak uke kukankaan malegen. Moo kaane ninsi jimandooriil máamak manteer mbi kúliŋ di kafiumak kooliil. 14Bukoo kootut káyenten ureg wati kayayapoorak wati Kúyahuudak mba kájaatikenak kápurumulomi di bukanak kalatumi malegenam. 15Wanoosani útientien di bukanak kabajumi úyeget wátiene. Bare waaf útienut di bukanak kasikomi di káyinenutumi. Úyegetiil wo’owu di síwoonooriil woo ukañokaño. 16Koonesoon koo kumammanj Atijamit, bare kuñooseooñoos di bakaaneriil. Leekusen kúkoiil bee di akila, ban koo bukan kabajutumi fúkaw bee ekaan wajake.

will be added

X\