RÓOMA 6

1Waa nootaale ereg? Mante nootaale karulen di ekaaney majakut manteer mbi majakam mati Atijamit mufaŋ man mubenenoe di wulaal room? 2A’a leeŋoolen kaan! Nucetaacet di majakut, buu nootaale karulen eroŋ di mo? 3Mante muyuul jimanjut mati nan wulaal búrom kátiigulenimi unaamooraal dákon di Yensa Apakenaau Áamakau, nútiigulenaalimi unaamooraal dákon di ecetey yoola? 4Ñátum di kátiigulenak kukila, wulaal nufokaalifok di oo síñakon ban nunaamooraami di ecetey yoola. Nan man Apakenaau Áamakau áyitenulimi di kacetumi ñátum di mákalaam mati Ampaau, iñeme wulaal poop mbi ucinaal di eroŋey yunkuley. 5Unaamooraajaat di ecetey yati Yensa ñátum di ebajey kátiigulenak, nootaale káyitouliak di kacetumi dákon di akila. 6Wulaal numanjaamanj eroŋey yoololaal yafanlenaay efaaŋenoorifaaŋenoor di oo. Mo’omu mukaanikaan, man kánkumak kati siniilas sakammi majakutam mbi sikaño, ban mbi letukaanaal kumiiceel bee di majakutam. 7Mati nan anau acetumi di Apakenaau Áamakau, napapak di kánkumak kati majakut. 8Nan ucetaami di Apakenaau Áamakau, numammanj poop wulaal nootaale kanaamooraal di eroŋey yoola yunkuley. 9Mati numanjaamanj mati Apakenaau Áamakau man ayitenuloñaa, oo letalaañ aceturer. Ecetey yoo letebaj kánkum di oo. 10Ecetey yan acetumi ekankaan ecetey yati majakut, ñákon ban kare. Bare iñeme eroŋey yan aroŋumi yoo yati Atijamit. 11Moo mákonam, muyuul joote kasofooro nan bukan kacete di kánkumak kati majakut, ban man jiroŋ bee mati mawuŋam mati Atijamit kápurumul di Apakenaau Áamakau Yensa. 12Moo kaane takum jimaŋ man kánkumak kati majakutam kookenuul man kurung siniiluul saatumi bee ecet. Ñaa jikaan wan siniiluul simaŋumi. 13Takum jisen hani kapan kati siniiluul man kukaan majakut nan múrokuma mati kájakaatie. Bare jisen kúkouul búrom bee di Atijamit, nan káyitenulimi di kacetumi bee di eroŋey yunkuley, ban jisen kapan kanoosani kati kunkuul bee di Atijamit nan múrokuma mati majoonam. 14Majakut mootut ekaan arungauul, mati muyuul jilee di kánkumak kati sílingaas, bare di kánkumak kati majakam. 15Kama buuma? Mante nootaale ekaan majakut, mati uletaal di kánkumak kati sílingaas bare di kánkumak kati majakam room? A’a, lee mo! 16Jimammanj tíen mati jisenujaat kúkouul bee di aceen nan kumiiceel, muyuul malegen kumiiceelak kati arungaau an jisenumi kúkouul? Jiŋooleŋŋoolen jikaan kumiiceel kati majakut ban di jicet, mba jiŋooleŋŋoolen jikaan kumiiceel kati Atijamit, ban di jisofi bukan kajoone. 17Kasalak kooku di Atijamit! Handeneen muyuul noo kakammi kumiiceel kati majakut, bare iñeme jisensen kúkouul búrom di sísigiruul di esofey kaliikitenak kunkulak kan Atijamit asenuumi. 18Iñemeñaa jipapak di majakut ban di jibilumi jikaan kumiiceel kati majoonam. 19Ínje eem di kasankenuul di kurimak kan jiŋoolenumi jílaul, mati kálirooraataak kati anau. Mati nan man jisenumi kapan kanaamutumi kati siniiluul man kukaan kumiiceel kati kawoonooruul kasikomi, di majakut mufaŋ man mújakaatie. Bare iñemeñaa jisen kapanookapan kati siniiluul man kurok bee mati Atijamit, manteer mbi jibil jikaan bukan káliroore kati Atijamit. 20Nan jikaaneenumi kumiiceel kati majakut, noo jilakoeenut hani jayiinkun di majoonam. 21Bare búgalen bei jibaje di mukaanaam umu man jipuñoñaa iñeme? Fúbanumaf fati do’odu búrom woo eenomi ecetey. 22Bare iñemeñaa man jipakeniñaa di majakut ban di jibil jikaan kumiiceel kati Atijamit. Wan jíbajudomi woo eenomi káliroorak di fúbanumaf fati ko, foo eenomi eroŋey yati bándoorey. 23Mati bacaamab bati majakutam boo eenomi ecetey, bare kawulak kati Atijamit koo eenomi eroŋey yati bándoorey kápurumul di Akiiyaolaal Apakenaau Áamakau Yensa.

will be added

X\