RÓOMA 4

1Wei nootaale ereg mati Iburehima, oo afannaaniŋolaal fák? 2Kaaneenjaat Iburehima Atijamit nasofoosof an ajoone ñátum di wan akaanumi, nababaj wan aate katebenelenoor. Bare lee di bújonlenab bati Atijamit. 3Waa furimaf fati Atijamit furegumi? Foone, “Iburehima náyinenyinen Atijamit, ban mati kafiumak koola, Atijamit nasofoomi an ajoone.” 4An arokumi, ayabemi bacaamab boola, boo lee kawul bare kankaan ejeenaool. 5Bare Atijamit akaanumi anau amanjutoomi man asofool an ajoone mati kaanut di wan akammi bare nafiummi di oo. 6Dauda poop nan asankenumi mati anau an Atijamit asofumi ajoone, malegen jakoojak. Handeneen akaanderut man Atijamit asofool an ajoone burokool balee to. 7“Kan majakutiil Atijamit abonketumi, jakiijak, 8di poop kan Akiiyaau aatut epin majakutiil, jakiijak.” 9Mante katampimi koo ceb jakumi bee di kúkoiil, mba bee di katamputimi di búkoro? Wulaal noonaasoon Iburehima Atijamit nasofoosof an ajoone ñátum di kafiumak koola. 10Nei mo’omu mubajumi eeno? Mante bala’a atampi mba nan púrutomi? Kaanut moo bare bala’a atampi. 11Iburehima natampitamp noo, ban futampaf foola fukankaan fúmanjum fati káyiisen mati kafiumak koola, Atijamit nasofeenoosof an ajoone bala’a atampimi. Mo’omu mukammi Iburehima man akaan nan ampaau ati bukanak búrom kafiummi di Atijamit bare koo kutamputi, ban Atijamit asofiimi bukan kajoone, handeneen batamputi. 12Iburehima poop eenomi nan ampaau ati katampimi búrom, bare kubajujaat kafiumak kaanomi nan Iburehima abajeenumi bala’a atampimi. 13Báligab ban Atijamit áligeenumi Iburehima di úwoloorumaw woola mati koote eŋar dúniyaay nan bulaañab booliil. Báligab bukila bukaanuti mati Iburehima nakammi wan sílingaas siregumi, bare mati kafiumak koola di Atijamit mukaanoomi man Atijamit asofool an ajoone. 14Kaanjaat Iburehima di úwoloorumaw woola kusenisen báligab ube mati kukaaneenkaan wan élingaay eceeŋumi, kama ñaa kafiumak kooliil lee waaf, moo báligab bati Atijamit lee waaf. 15Mati sílingaas soola soo síŋareuŋar kañuumulak kati Atijamit. Bare tan élinga eleemi, majakut mulee dó. 16Moo kaane báligab bati Atijamit bujunjuum di kafiumak, manteer báligab bati Atijamit mbi boote ebaj fujuum falegenoe ñátum di majakam moola. Báligab ube kaanut bee mati úwoloorumaw wati Iburehima ceb kabajumi sílingaas. Bare boo bee mati kakammi úwoloorumaw wati Iburehima mati kubabaj kafiumak nan man akila abajumi. Iburehima oo eenomi ampaolaal búrom. 17Nan man ciikimi mati, “Ínje nikaanikaan ampaau ati mof majuupoe.” Ñaa báligab boo búlinliŋ di bújonlenab bati Atijamit, di oo Iburehima afiummi, Atijamit asenemi eroŋey bee di kacetumi ban natuuk watamburerutimi ubajo. 18Iburehima nafiunfium ban nágolum, handeneen babajut waaf wati bee ebaj fúgolum, nabilumi akaan ampaau ati bukanak kati mofam majuupoe. Nan man Atijamit aregeenoomi, “Úwoloorumaw wooli panujuupo nan bootab.” 19Kafiumak kati Iburehima kúlaamorerut, hani nan abajumi simit salofe ceme. Ban namanjumi mati moola mubamban ban aseekool Sirah bamanjut fufaan. 20Kafiumak koola kúpurut di oo, ban abajut úyeget ugaba di báligab bati Atijamit. Bare nafaŋumi man áliŋe di kafiumak koola ban nasalumi mati mákalaam mati Atijamit. 21Iburehima tíenootien mati wanoosani Atijamit áligumi panakaan. 22Mati kafiumak kati Iburehima, Atijamit asofoomi an ajoone. 23Nan man kurimak kuregumi mati, “Atijamit nasofoomi an ajoone” kurimak ko’oke kuciikuti bee mati Iburehima ceb. 24Bare kuciikiciik bee mati wulaal poop, mati wulaal kaatumi esofiey nan bakan kajoone mati kafiumak koololaal di Atijamit, ayitenulomi Akiiyaolaal Yensa Apakenaau Áamakau di kacetumi. 25Nasenisen man kubujool mati majakutolaal, ban náyitenulimi di kacetumi mambi akaanolaal ujoonaal di Atijamit.

will be added

X\