1 Kákoyum kei koom di ekaan Áyahuud? Mba waa futampaf fubaje fúkaw di an? 2 Jajak máamak di uruŋ wajuupoe. Di mutooŋandam, Kúyahuudak kubilenibilen di kurimak kati Atijamit. 3 Bare kaanjaat kuceen lee kufiumaay? Mante moo pammukaan man Atijamit letakaan afiumaay, mati kubajut kafium? 4 A’a moo leebajurer! Atijamit arinoe di malegenam handeneen anoosani akaane alepoora. Nan man ciikimi, “Nampi usankenumi, anoosani panajuk tíen au nujonjoon, kurimak kooli pánkuyiis malegen ban nampi kutaakenimi di bagamab, panukooŋeni.” 5 Bare kaanjaat bakaanerolaal bajakutab bufaŋ man búyiisene tíen buu Atijamit bakaanerool bujonjoon? Kama ñaa waa nootaale ereg? Mante Atijamit ceeŋut man riool mambi anagolaal mati wo? (Nisankensanken nan an) 6 Leeŋoolen kammo! Kaanjaat Atijamit ajoonut, buu panaŋoolen agamen kati dúniyaay? 7 Bare kaanjaat kagaajoorak kúmboom kuŋaruloŋar kálebien káamak bee di Atijamit ñátum di káyiisenak buu najoonumi eeno? Au mbi uceeŋ wau kaane hani bee iñeme, man Atijamit aane ínje akaana majakut? 8 Manteer mbi oonaal poop, “Letukaanaal majakut manteer mbi majake múpurumul to bukaaku kusuulenumi di eregey mo’omu moo man íriiŋenumi. Pánkufireni nan man ceeŋumi! 9 Jajak kama ñaa, mante wulaal Kúyahuudak núkoyumaale bukaaku Kakaanutumi Kúyahuudak room? A’a lee mo! Mati ínje níyiisenyiisen mati bukanak búrom manteer Kúyahuud di Kakaanutumi Kúyahuud, koo búrom kooku di kánkumak kati majakut. 10 Nan man ciikimi eeno, “Bajut ajoone, hani ákon. 11 Bajut an álaule, bajut an amaŋe eñes Atijamit. 12 Koo búrom kuŋaŋŋar buruŋiil man kujaw, bajut akaane wajake hani ákon.” 13 “Wan utumiil usankenemi úŋareuumi ecetey, kúredimpiil kubuntebunt bukanak.” “Wan utumiil usankenemi ukankaan nan úniiw wati yiifaay.” 14 “Utumiil umemmeeŋ di bunumab di karien di fuuñ.” 15 “Kuwaakenewaaken di kábuken di kubuj bukanak. 16 Banoosani kuje’e, pankukaan bukanak kukajeni ban di kulako bugaal. 17 Koo kumanjut waa eenomi buruŋab bati kásuumaay.” 18 “Kúkoliut hani Atijamit.” 19 Ñaa numanjaamanj mati wanoosani wan sílingaas siregumi, ujajaw bee di kacinumi di so. Sirereg mo’omu takum an abaj buruŋ bati fúpakum, manteer mbi kati dúniyaay búrom kugameni di bújolenab bati Atijamit. 20 Mati bajut hani an Atijamit asofumi an ajoone di bújonlenab boola ñátum di ekaaney wan sílingaas siceeŋumi. Wan sílingaas sikaanemi woo eenomi kamanjen bukanak mati majakutiil. 21 Bare ñaa iñeme Atijamit náyiisenolaayiisen buruŋ búbuto man akaanolaami ujoonaal di fúko’ool. Moo mukaanimi sílingaas balee to, handeneen man sílingaas di kuboñaak síyiisenolaami eeno. 22 Atijamit akaanolaami man ujoonaal di bújonlenab boola kápurumul di kafiumak kooliil di Yensa Apakenaau Áamakau. Atijamit nakammomi bee di kafiummi búrom di Apakenaau Áamakau, mati bajut kakatoor. 23 Mati anoosani nakankaan majakut, ban náloiyoor di mawuŋam mati Atijamit. 24 Bare Atijamit náyiisenolaayiisen majakam moola nan kawul bee di bukanak man asofolaami nan bukan kajoone di fúko’ool. Nakankaan mo’omu kápurumul di Apakenaau Áamakau Yensa, apakenolaami ñátum di kápurenak majakutolaal. 25 Mati Atijamit nakaanookaan búsimen, man akaan fúpakumaolaal manteer majakutolaal mbi mubonketi kápurumul di fúsimaf foola ñátum di kafium di oo. Atijamit nakankaan mo man áyiisen majoonam moola. No’ona Atijamit namuutemmuuten ban laañutool bo di kajiker majakut mati bukan. 26 Bare iñeme laañoolaañ bo di kajiker majakutiil manteer mbi áyiisen majoonam moola. Ban Atijamit nasof anoosani ajoone afiummi di Yensa. 27 Ñaa waa kaane nutebenelenooroaal? Hani waaf! Wau ukilumi katebenelenooroaal? Mante burokab bajakaab boololaal? A’a bare mati kafiumak. 28 Mati Atijamit asofolaami bukan kajoone kápurumi di kafiumak, lee mati ekaaney wan sílingaas siceeŋolaami. 29 Mante Atijamit oo ati Kúyahuudak cebiil room? Mante akaanut Atijamit ati Kakaanutumi Kúyahuudak poop? Éey, oo ati Kakaanutumi Kúyahuudak poop. 30 Mati Atijamit oo ákon, akila panasof katampimi bukan kajoone ñátum di bálamukab bati kafiumak kooliil. 31 Mante moo eenomi mati usofaal kafiumak koololaal man uŋoolenaal ukataal sílingaas bálamuk? Leeŋoolen kaan! Wulaal nootaale esofuso faŋ man líŋe.
