RÓOMA 2

1Apaalom, hani buu noonoe au letubaj fúpakum nampi ugamen bukaaku, núfirenoorofirenooro. Mati ugamenjaat bukaaku manoosani, nulolo di ekaaney wákonaw wan bukaaku kukaanemi. 2Wúli numammanj mati Atijamit panagamen joon bukanak kaanomi mo’omu. 3Apaalom, bare au di fúkoi ukaanemi di waaf wo’owu wan ugamenumi bukaaku. Mante nusosof panuŋoolen upak di kagamenak kati Atijamit room? 4Au timaa nuheelenheelen mati Atijamit man ajakumi máamak di poop man átekeriit galab ban namuutemmuuten di au piyo. Mante úkaanumut? Tíenitien mati Atijamit nakaanikaan jak, mati namammaŋ man ulaañ bee di akila. 5Bare búyegeti busasay ban újameriit jáng moo mubenenumi kagamenak fúkoi faŋ man kúkalaae di funakaf fampi Atijamit áyiiseni kañuumulak koola di kagamenak koola kajoonaak. 6Mati Atijamit panagamen anoosani riiboor di wan akammi. 7Kuceen karulenemi di ekaaney wajake ban di eñesey Atijamit man aseniil mawuŋ di kálebien, di eroŋey yati bándoorey. Bee di bukoo Atijamit panaseniil eroŋey yati bándoorey. 8Bare bukan kuceen kamaŋooro ceb ban di kulatumi waaf wajoone, bee mati kariibenak wajakutaw. Atijamit kabolenak di kañuumulak koola pankulako di kukila. 9Pambaj búyiik di bugaal bee di anoosani akaanemi májakaati, kátaatumul Kúyahuudak bee di Kakaanutumi Kúyahuudak. 10Bare pambaj mawuŋ, kálebien di poop kásuumaay pánkoomi di anoosani akaanemi wajake, kátaatumul di Kúyahuudak bee di Kakaanutumi Kúyahuudak. 11Mati Atijamit oo álaañeriit di an. 12Bukanak búrom kakaanumi majakut babajut sílingaas, léekuteki ñátum di so. Bare bukanak kabajumi sílingaas ban di kukaan majakut, pankuteki ñátum di so. 13Mati Atijamit letakaan bukan man kujoon di fúko’ool mati kúyentenyenten sílingaas soola ceb. Bare nakaanekaan mo’omu nampi kukammi wan sílingaas siregumi koote ekaan. 14Nan Kakaanutumi Kúyahuudak, kabajutumi sílingaas sati Atijamit saciikimi, koo kukaanemi nan sílingaas soosu di bukoo. Handeneen kubajut sílingaas, di kusofooromi koo eenomi sílingaiil. 15Bagoroorerab booliil búyiisenyiisen mati wan sílingaas siceeŋumi woo uciikiciik di sísigiriil. Síwoonooriil poop pánsiyiisen mati moo malegen, mati niceen síwoonooriil soo sitaakeneimi mba niceen siregiil mati kukonkooŋ. 16Nan man furimaf fajakaaf fan íriiŋenumi mo’omu mootumi kaanoak, malegen funakaf pánfuriiŋ Atijamit panagamen kápurum di Yensa Apakenaau Áamakau wayofomi di úyegetaw wati bukanak. 17Bare oonjaat au Áyahuud, ban jinajoonajoor di sílingaas ban nutebenelenoor mati bapaalaab booli di Atijamit. 18Numammanj wan Atijamit amaŋumi man ukaan. Ban sílingaas siliikiteniliikiten man umuken ukaan wajoonumi. 19Tíenitien mati au apooya bee mati kápuumumi, di poop nukaan éwuŋenuma bee di kalakomi di érimey. 20Ban nusosof nuŋooleŋŋoolen ukaan ájaatikena bee mati sígotas. Tíenitien mati di sílingaas nubabaj fumanj fáriiŋe di malegen mátiene. 21Au kama aliikitenemi bukaaku, letuliikiten fúkoi room? Nan ommi kaliikitenak mati jákuutaj jakut, mante núkuutekuut waaf? 22Au noone, “Takum usang aseek mba ániine ati an”, mante úkaaneriitumo? Ban au alatumi kamiiceelaetak sínaati, mante úkuuteriit di báciinab bati kamanjutumi Atijamit? 23Au atebenelenooremi di sílingaas, mante úñooseriit Atijamit ñátum di kakajenak kati sílingaas? 24Nan man ciikimi, “Mati muyuul, kareesak kati Atijamit kusankenisanken ñíi titoorey yati Kakaanutumi Kúyahuudak.” 25Kaanjaat nukankaan wan sílingaas siregumi, futampaf fooli fubabaj fúkaw, bare uñoosujaat wan sílingaas siregumi, futampaf fooli fubajut fúkaw. 26Kaanjaat ániine Akaanutumi Áyahuud atamputimi nasofesof wan sílingaas siregumi, mante mo’omu Atijamit letapinool nan atampimi room? 27Ñaa katamputimi ban di kusof wan sílingaas siregumi, pánkufiren au atampimi mati nubabaj sílingaas saciikimi ban nukajenuso. 28An umanje an bukanak kusofumi oo Áyahuud timaa akaanut Áyahuud, mba atampimi ñátum di elibey yati eniiley, moo leemuŋoolen mukaani Áyahuud alegen. 29Akammi Áyahuud an búyegetool bujoonumi di Atijamit, futampaf fulegenaf foo eenomi wati di ésigirey, lee elibey yati eniiley bare káruŋul ésigirey yoola kápurumul di burokab bati Búyegetab Bátienaab. Kasalak koola kúpurumulomi Atijamit bare lee di an.

will be added

X\