RÓOMA 16

1Ínje nimammaŋ kasanken mati áliinolaal ariiba Febe, arambena ati di fukobaf fati Kenkurea, 2mbi jiwalenool jak nan man ceeŋumi man bukanak kati Atijamit koote kawaleni, jisenool karambenak kan ceeŋumi man abaj di muyuul, mati nakankaan karamben káamak bee di bukan kajuupoe di ínje di fuko’om poop. 3Jisaafom Pirisika di Akula, kupaalom kuroka di burokab bati Apakenaau Áamakau Yensa. 4Bukoo kunennen síñunduiil bee mati eroŋey yúmboom. Reut di ínje cebom aseniimi kasalak, bare di poop kujojak búrom kati Kakaanutumi Kúyahuud. 5Jisaafom poop kati kujojak kabilemi di síñunduiil. Jisaafom poop Epeneto an imaŋumi máamak, an eenomi ariiba átiyaar ati Apakenaau Áamakau di kapanak kati Asia búrom. 6Jisaafom Mariyaama arokumi máamak titooruul di muyuul. 7Jisaafom poop Anduroniko di Yunia, Kúyahuudak kuciloorom kan kupaalom kakuli ulako’oorumi dán bukanak kukuleimi. Kukila kúlebienilebien máamak titoorey yati kúriiŋenaak, ban kubilumi kukaan kuriiba kati Apakenaau Áamakau bala’a ínje. 8Jisaafom Ampiliato, an imaŋumi máamak di Akiiyaau. 9Jisaafom Orubano, árokooroli di Apakenaau Áamakau, ban Sutaku an imaŋumi máamak poop. 10Jisaafom Apenle, an umanje aroka afiumaay ati Apakenaau Áamakau. Jisaafom Arisitobulo di fiilaf foola. 11Jisaafom Herodion akammi akiloorom. Jisaafom Narikis di bukaaku kammi di fiilaf foola, kabajumi kafiumak di Akiiyaau. 12Jisaafom Turofena di Turofosa, kammi burok báamak bee mati Akiiyaau. Jisaafom Perisida, ápaalumom áamak, arokemi máamak poop di Apakenaau Áamakau. 13Jisaafom Roufo, aroka ábutoe ati Akiiyaau, ban jisaafom iñaayool akammi nan iñaayom. 14Jisaafom Asunkurito, Felegonta, Hereme, Pataroba, Herema, di poop di kúpaaloli kuriibaak kan kombomi. 15Jisaafom Filologon, Yulia, Nerea di áliinool, di Olumpa, di bukanak búrom kati Atijamit kalakobomi di kukila. 16Jisaafoor kasaafoor kásuume ñaj. Kati kujojak búrom kati Apakenaau Áamakau kúsaafuluul. 17Kutiom, ínje nilawuulaw máamak, mbi jíkaanum kakaanemi kápajuloorak man bukanak kúpur di buruŋab booliil ñátum di kaliikitenak kanaamutumi di kafiumak kooliil. Jiteyiil máamak. 18Mati bukanak kaanomi mo’omu koo kulee di kamiiceelaetumi Akiiyaolaal Apakenaau Áamakau, kukila kooku di kamiiceelaetumi mbi kubaj wan kumaŋumi, ñátum di kasankenak súum di ebuntey úyegetaw wati bukanak kañuloutumi. 19Súumansuum mati anoosani namammanj tíen buu jisofumi lit furimaf fajakaaf. Bare nimammaŋ man jílaul wajoonumi ban takum jimaŋ man jinaamoor di wajoonutumi. 20Atijamit ati kásuumaayak iñeme panafum fúkaaf fati Seetaanaay man alakenuyo fátaam fati úkamunuul. Majakam mati Akiiyaolaal Yensa Apakenaau Áamakau móomi di muyuul. 21Timoti, arokoorom, ásaafuluul, di poop kukiloorom kuriiba, Lukio, di Yason, di Sosopatoro. 22Ínje, Teritus, akammi arambena eciikey letaraay uye, nisaafuusaaf poop nan apaaluul ariibaau ati Akiiyaau. 23Gayos nasaafuusaaf poop, awalenumi ínje Paul síndo’ool oo di kati fujojaf búrom. Erasutos, anau acookooremi bágodaab bati ésukey yáamakey yoololaal, di poop Kouaruto, atiolaal an umaŋaami máamak, kúsaafuluul poop. 24Emitey ekaan majakam mati Akiiyaolaal Yensa Apakenaau Áamakau móomi di muyuul búrom. Amen. 25Usalaal Atijamit! Akila aŋoolenumi akaanuul jíliŋ di kafiumak kooluul, riiboor di furimaf fajakaaf fan íriiŋenuumi mati Yensa Apakenaau Áamakau, riiboor di káyiisenak kati malegenam mayofoaam mati Atijamit biñoo di fúcitumaf. 26Bare iñeme malegenam mukila múyiiseniyiisen bee di kati dúniyaay búrom kápurumul di baciikerab bati kuboñaak. Ban di kájaatikenak kati Atijamit ati bándoorey moo mumanjenimanjen bee di kati dúniyaay búrom, manteer bukanak mbi kufium ban di kukaan. 27Wulaal ootaale esal Atijamit ákonau, abajumi malinlaam málirooraam búrom, mati Yensa Apakenaau Áamakau. Amen.

will be added

X\