RÓOMA 14

1An umanje kafiumak koola kúlaamolaamo, jisofool jak, bare takum kaanuul kañakoor di wan umanjumi tíen. 2Ákon abajumi kafium káamak naŋooleŋŋoolen ari muria manoosani. Bare aamu an kafiumak koola kúlaamomi etojey cebuyo nariemi. 3Anau ariemi muria manoosani, takum agamen árieriitumi ban anau ariemi muriemi muriaam mukila, takum agamen árieriitumomi. Mati Atijamit alatutool. 4Au eenomi ai aatumi bee kagamen aroka ati aceen? Akiiyaool ceb aatumi ereg manteer panawuuj mba letawuuj. Ban panawuuj mati Akiiyaau panaŋoolen akaanool man awuuj. 5Ákon nasosof funakaf ufe fufaŋe man fubaje fúkaw di funak faafu, bare aamu nasosof kunakak búrom kurere. Anoosani mbi asof líŋ wan afiummi. 6Asofemi mati funak fuceen fufaŋe man fubaje fúkaw, mbi akammo di kálebienak kati Akiiyaau. Ban ariemi muria manoosani, mbi akammo di kálebienak kati Akiiyaau, mati oo nasalesal Atijamit bala’a arimo. Árieriitemi muria manoosani, mbi akammo di kálebienak kati Akiiyaau. 7Hani an aroŋurerut di fúko’ool ban poop aceturerut di fúko’ool. 8Uroŋaajaat, nuroŋaal di Akiiyaau, ucetaajaat, nucetaal di Akiiyaau. Moo kaane manteer nuroŋaaroŋ mba nucetaacet, wulaal kati Akiiyaau. 9Apakenaau Áamakau naceteencet ban naroŋumi inki, mambi akaan Akiiyaau ati kacetumi di karoŋumi. 10Waa kaane nugamen ati’i? Mba, au waa kaane nuheelen ati’i? Mati wulaal búromolaal panujuumaal di bújonlenab bati Atijamit di bagamab boola. 11Mati ciikiciik Akiiyaau naane, “Nan man emmi man iroŋe, ban fújuul fanoofani pánfukuntaajen bee di ínje mati Atijamit. ban fúredimp fanoosani panfusal mati ínje eenomi Atijamit. 12Anoosani di wulaal naate karegooro bakaanerool bee di Atijamit. 13Moo kaane takum ugamenooraal kagamen bukaaku. Bare nootaale kawoonoor jak takum ukaanaal waaf wampi wakammi man bukaaku kulo mba ekaan apaali alo di majakut. 14Ínje nimammanj ban tíenantien di Akiiyaau Yensa mati bajut muria masikoe di fúkoumo. Bare kaanjaat an asofe mati muria muceen musikosiko man ari, moo di oo musikosiko. 15Kaanjaat ati’i pangaalenool di wan uriumi, moo au ulee di ejaw di kamaŋak. Takum umaŋ man wan urimi ukajen an umanjumi Apakenaau Áamakau nácetuncetum bee mati oo. 16Moo kaane takum umaŋ man bukaaku kusanken wájakaatie wan usofumi wajake. 17Mati jáyiaj jati Atijamit kaanut muria mba baraan, bare majoonam, di kásuumaay, di kásuumenoor. Uru búrom púrumulopurum di Búyegetab Bátienaab. 18Ban nampi amiiceelaetumi Apakenaau Áamakau ñátum di bagoroorerab ube, panukaan Atijamit súumool ban bukanak poop pánkulebieni. 19Nootaale karaagal man ulakoaal di kásuumaay ban nurambenooraal man úliŋenooraal di káyinenak koololaal. 20Takum ukajen burokab bati Atijamit mati muria. Muria manoosani mútientien, bare joonut man an ari waaf wampi wakaan man bukaaku kulo di majakut ñátum di wan arimi. 21Joonut man an ari eluw mba naraan múkaliaay mba nakaan waaf wampi wakaan man atiool atatagoor alo. 22Kafiumak kan ubajumi, usofuko titoorey yati fúkoi di Atijamit. An umanjumi abajutumi buruŋ bee kagamenooro di wan asofumi, jakoojak. 23Bare abajumi úyeget ugaba wan ariemi, arijaat Atijamit pánafirenool, mati ákaanumut ñátum di kafiumak koola. Mati wanoosani wájawumutum wájawumutumi di kafiumak woo majakut.

will be added

X\