RÓOMA 13

1Anoosani aate esen fúko’ool bee di kurungaak kabajumi kánkum kammi di kujuumak. Bajut arunga ati fujuum an Atijamit ajuumenut. Kurungaak kati Kujuumak kabajomi Atijamit ajuumenuko. 2Moo kaane ampi alatumi kati kujuumak, oo wan Atijamit ajuumenumi nalate. Anoosani alatumi panagameni. 3Mati kakaanemi wajoone, kootut kákoli kurunga bare kakaanemi wajoonut koote kákoli. Mante numammaŋ bee epak di kákoliak di kurungaak kati kujuumak? Kaan wajoone man kusali. 4Mati koo kurokaak kati Atijamit, kasenimi man kurambeni. Bare ukaanjaat waaf wajoonut noo noote kákoli’iil, mati bukoo kubabaj bakooŋ man kuteki. Koo kurokaak kati Atijamit kaatumi etek anoosani álaputumi man kúyiisen buu Atijamit añuumulumi eeno. 5Moo kaane anau aate esen fúko’ool, kaanut mambi apak kañuumulak kati Atijamit ceb, bare poop namammanj ésigirool wan aate ekaan. 6Moo kaane muyuul joote ecaam basaaf. Kurungaak kati kujuumak koo kuroka kati Atijamit nan kukaanemi burokab booliil. 7Jicaam wanoosani wan joo’oorumi di kukila, joote ecaam basaafab banoosani bee di kulagabo, jipuño kan ceeŋumi man jipuñoiil, jisen kálebienak kan ceeŋumi man jílebieniil. 8Joote ecaam wan joo’oorumi di bukanak, rino kamaŋoorak. Mati anoosani amaŋumi alaoorool nálirenliren wan sílingaas siceeŋumi búrom. 9Kájaatikenak kati sílingaas, “Takum usang aseek mba ániine ati an, Takum ubuj an, Takum úkuut, Takum umaŋ wan ukilutumi,” ban kájaatikenak kaaku poop woo búrom unampoonampoor di ereg kájaatikenak koo eenomi, “Noote emaŋ alaoori nan man umaŋumi fúkoi eeno.” 10Kamaŋak kúkaaneriit wajoonut bee kupaal ko, moo kaane kamaŋak eenomi kálirenak kati sílingaas. 11Jíkaanum mati jimammanj nanan nírindiiŋ man jíyilo. Mati epakey yoololaal iñeme efaŋe man elofulo no’ona nan umondaami ufiumaal. 12Fukaf jaheemeen fumaale ban bala’ab boobe di erab baabe. Mbi ukataal bálamuk waaf wan anau akaanemi di érimey ban nutebaal mútiikuma bee mati futiikaf di mawuŋam. 13Mbi ugorooraal jak di kúko’olaal, nan bukan kammi di mawuŋam. Takum uja’aal di wáaningaw wati ekaaney kóji ban di kákali kanoosani, mba basang aseek mba ániine ati an di jiyenet, mba muloba di búlat. 14Mbi jikaan man Akiiyaau Yensa Apakenaau Áamakau nan mútiikuma man jikaano, ban takum jisen kúkouul man jikaan wásuumuumi di eroŋey yooluul. umuumi di eroŋey yooluul.

will be added

X\