RÓOMA 12

1Moo kaane, kutiom, nilawuulaw máamak mati kabonketak kati Atijamit man jisen kúkouul nan búsimen baroŋe, báliroore ban di búsuum Atijamit. Moo eenomi kamiiceelaetak kalegenak kan joote esenool. 2Kutiom, takum jiriiben mukaanaam mati dúniyaay uye, bare jikat man Atijamit mbi áruŋul man aunkulen sísigiruul ñátum di man jiwoonooremi eeno. Moo panjimanj wan Atijamit amaŋumi man jikaan, wajakumi, di wásuumoomi di wáliroorumi. 3Ban mati kápurumul di majakam mati Atijamit, moo kammi ínje eem di ereg anoosani titooruul. Takum an asofooro tan áriiŋutumi. Bare mbi awoonooro ríiŋ man asof re di kafiumak kan Atijamit asenoomi. 4Eniiley ebabaj upan wajuupoe, bare kapan kanoosani kubabaj burokuko. 5Moo mákonam, handeneen man ujuupoaañaa, wulaal búromolaal kákon di Apakenaau Áamakau. Anoosani nababaj burokool, ban nucilooraaciloor. 6Moo mákonam di wulaal. Atijamit nasensen anoosani kawulak kanaamut riiboor di majakam man Atijamit asenolaami, mbi úroketumaal ko. Kaanjaat kawulak kukaanolaami káriiŋenak mati furimaf fati Atijamit, ootaale ekaanuko riiboor di kafiumak koololaal. 7Kaanjaat kawulak kukaanolaami kamiiceelaet bukaaku, ootaale kamiiceelaet. Kaanjaat kawulak kukaanolaami kaliikitenak, ootaale kaliikiten. 8Kaanjaat kawulak kukaanolaami káliŋen bukaaku, ootaale káliŋen. Kaanjaat kawulak kukaanolaami esen, ootaale esen tíen. Kaanjaat kawulak kukaanolaami erung, ootaale erung tíen. Kaanjaat kawulak kukaanolaami kabonket, ootaale ekaan di kásuumaay. 9Jikat man kamaŋak kooluul koote kalegeno ríiŋ. Jilat wajakutumi, jisof líŋ wajakumi. 10Jimaŋoor nan aamu di atiool mba áliinool, ban di jílebien máamak bukaaku wuuj kúkouul. 11Takum jílaamo bare jikaan burok balite. Jimeeŋ mawuŋ mati Búyegetab Bátienaab. Jimiiceelaet Akiiyaau. 12Jimaayoor di fúgolumaf fooluul. Jimuuten di bugaalab, ban takum jiyoolo elawey. 13Jiwul wan jibajumi bukanak kati Atijamit kan ceeŋumi, ban ninsi jiwalen kujaaburuŋak di sísindouul. 14Jilaw Atijamit man asen kásuumaay bee mati kásuutukeneuumi. Jilaw Atijamit man aseniil kásuumaayak, takum anumiil. 15Jimaayoor di kammi kamaayoorak, jilok di kammi di búlokab. 16Jicinoor di kásuumaay di bukaaku, takum jitebenelenooro, bare mbi jinaamoor di kasofutimi di waaf, takum jisofooro nan jilinlolinlo. 17Takum ugalen majakut bee di majakut. Bare mbi jiliik ekaan wan bukanak búrom kusofumi ujajak. 18Kaanjaat paŋŋoolen kaan, jiraagal búrom man jicin di kásuumaay di anoosani. 19Kupaalom, takum jigalender. Jikat man Atijamit agalen. Mati ciikiciik Atijamit naane, “Ínje eenomi agalenaau, ban panigalen.” 20Bare furimaf fati Atijamit di fulaañumi fommi, “Kaanjaat alatoori acaarete, senool man ari. Kaanjaat baraanab busofool, senool man araan. Mati ukammojaat panupuñenool.” 21Takum umaŋ man majakutam muŋooleni, bare mbi uŋoolenumo ñátum di majakam.

will be added

X\