RÓOMA 11

1Ínje niceeŋuumi, mante Atijamit nabetembeten bukanool? A’a lee mo! Ínje di fúko’om Aisirael, búwoloorum bati Iburehima, ati fiilaf fati Beniamin. 2Atijamit abetenut bukanool, kan amukenumi biñoo noo di fúcitumaf. Mante jimanjut wan aboñaau Eliya asankenumi kápurumul di furimaf fati Atijamit buu nalawumi Atijamit bee mati Kuisiraelak eeno? 3“Akiiyaau, kububuj kuboñaak kooli, ban di kukajen fúsimenaf fooli. Ínje cebom irinomi, ban iñeme kooku di eñes bee ebujom poop.” 4Bare waa eenomi kulaañenak kati Atijamit bee di oo? “Niyoyof bukaaku, síwili futok di sigaba bee mati ínje imiiceelaeturerut náataay yan koonemi Baal.” 5Moo mákonam hani bee jaat, babaj bukan kupinaay karinoe, koo kumukenimi ñátum di majakam mati Atijamit. 6Atijamit namukeniimuken ñátum di majakam moola, lee ñátum di wan kukammi. Leemojaat majakam moola leemukaander majak malegen. 7Kama nootaale ereg? Bukanak kati Isirael kujukut wan kulakomi eñesey. Bare kan Atijamit amukenumi koo kupinaay kujukumi. Atijamit akammi bukaaku karinomi kújameriit mati kawonkak koola. 8Nan man ciikimi eeno, “Atijamit nakaaniimi man úyegetiil úlaamo, hani bee iñeme kootut ejuk ban kootut ejam.” 9Ban Dauda nammi, “Emitey ekaan Atijamit akaan kuñinteni ban di kusofiil di káaningak, Emitey ekaan Atijamit akaan kulo ban di kuteki! 10Emitey ekaan Atijamit akaan kúpuum takumbi kuŋoolen kujuk ban úlamukiil úrongoor bee bándoorey.” 11Ínje niceeŋumi, mante Kúyahuudak kutatagootatagoor man kulo tud? A’a lee mo! Mati majakutam mooliil, Atijamit nakammi man epakey ebajo bee di Kakaanutumi Kúyahuud man Kúyahuudak kuraanoiil. 12Kaanjaat majakutam mooliil mukammi man bukanak kati dúniyaay kubaj kawul káamak, ban majakutam mooliil mukammi man Kakaanutumi Kúyahuud kubaj kawul káamak. Kama, buu kawulak pankufaŋumi man kúkalaae bee di bukanak kati dúniyaay nampi Kúyahuudak poopiil kulaañumi bee di Atijamit. 13Iñeme ínje oomu di kasanken bee di muyuul Kakaanutumi Kúyahuud. Nan ikammi áriiŋena bee di Kakaanutumi Kúyahuud, paniteben sileekom di burokom. 14Timaa niŋooleŋŋoolen ikaan kupaalom Kúyahuud kuraano, di mo’omu mbi iŋoolen ipaken kuceen. 15Mati nan Kúyahuudak kubetenimi, bukanak kati dúniyaay di kubilumi kúlaañul man kupaalaay di Atijamit. Buu paneeno, nampi Atijamit kupaalaayimi di kukila? Kankaan nan páŋŋarul kacetumi bee di eroŋey. 16Biñoo búfatum bútiyaar bati fúmeelaf bukaanimi man búliroor ñátum di esenubo bee di Atijamit, moo eenomi fúmeelaf foo búrom fúlirooliroor. Moo mákonam, kaanjaat kufaarak kati búbaar kúlirooliroor, waanaw poop úlirooliroor. 17Bare waan uceen wati Buwoliiab bati síndeey, ucanijaat, ban bureeb bati Buwoliiwab bati karamba bunapeninapen di wo. Muyuul, Kakaanutumi Kúyahuudak jikankaan nan Buwoliiab bati karambaak jinapeninampen di Kúyahuudak. Ñaa iñeme muyuul poop jinaamoor di kawulak kan Atijamit áligumi di Kúyahuudak, nan man bureebab bati Buwoliiwab bati karambaak bunaamoorum fúsimaf fápureuumi di Buwoliiab bati síndeey. 18Moo kaane, takum jitebenelenoor bee di bukanak nan waanaw wacanimi. Jikammojaat, jiwoolo mati muyuul kaanut kapebumi kufaarak, bare kufaarak kupebumi muyuul. 19Bare panoone, “Waan ucanican mambi ínje ibaj tampi inapeni.” 20Moo malegen. Waanaw ucanican mati káfiumaataak kooliwo, bare au oomu to mati nujunjuum líŋ kápurumul di kafiumak kooli. Moo kaane takum úaamakalenoor, bare ujuum lit di kákoli. 21Atijamit akatutumi ecaney waanaw wacintomi, 22Ñaa nujujaajuk buu Atijamit ajakumi di poop buu nátaañimi eeno. Man átaañimi bee di kalomi, bare najakumi bee di au, urulenujaat di káyinenak di majakam moola. Bare ukatujaat káyinenak, panacani poop ápureni. 23Kaanjaat Kúyahuudak kukila kubetenumi káfiumaataak kooliil, Atijamit panalaañ anapeniil tan kulakoeenumi. Mati Atijamit nababaj kánkum bee ekammo. 24Kaanutujaat muyuul Kakaantumi Kúyahuudak jikankaan nan waanaw wati Buwoliiwab bati karamba wacanimi, wan umanje unapimi bee di waanaw wati Buwoliiwab bati síndeey, Kúyahuudak koonokoono nan Buwoliiab ube bati síndeey, moo panfaŋ man hiilie di Atijamit, man anapen alaañen waanaw wacaneenimi tan úpurumulo. 25Kutiom, ínje imaŋut man jílaulaati mati malegenam mayofoaam, manteer takumbi jitebenelenooro man jisof jilinlolinlo. Bukan kuceen kati Isirael úyegetiil usasay, panurulen esay bee nampi Kakaanutumi Kúyahuud búrom kulaañumi bee di Atijamit. 26Ñaa moo Kuisiraelak búrom pankupak nan man ciikimi eeno, “Apakenaau pánapurumul Sion, pánapuren bújakaataab búrom di úwoloorumaw wati Yankuba.” 27“ban panikaan kasofoorak uke di kukila nampi ípurenumi majakutiil.” 28Mati Kúyahuud kajuupoe kulalat furimaf fajakaaf, kubilumi kukaan kulatooraak kati Atijamit bee mati muyuul, Kakaanutumi Kúyahuudak. Bare mati Atijamit kamukeniilak, Atijamit namaŋiimaŋ mati kajamoak kati kufannaaniŋiil. 29Mati kawulak kati Atijamit kúboteriiti ban kan awonkumi koo ájimeriiti. 30Nan man muyuul Kakaanutumi Kúyahuud, muyuul jiñooseenumi Atijamit no’ona. Bare nan Kúyahuudak kulatumi eyabey kabonketak koola, náyiisenuuyiisen kabonketak koola. 31Moo mákonam, mati kabonketak kan jiyabumi, Kúyahuudak iñeme kuñoñoos Atijamit, manteer mbi kuyab kabonketak kati Atijamit. 32Atijamit nakankaan bukanak búrom man kugaal mati eñoosey yooliil, mambi áyiisiil kabonketak koola. 33Wóoy, lee kákalaa kati fubajaf foola! Lee kásanki kati malinlaam moola di kati fumanjaf foola! Ai pánalaul wan asofumi mba ai pánalaul moola? 34Nan man furimaf fati Atijamit furegumi, “Ai amanje búyegetab bati Akiiyaau? mba ai panaŋoolen ájaatikenool? 35“Mba ai atamburer asenool waaf, manteer mbi acaamool?” 36Mati kápurumul di oo wanoosani utuukimi. Wanoosani ubajobajo mati oo ban di ulaañ bee di oo. Wulaal ootaale esal Atijamit bee bándoorey. Amen.

will be added

X\