RÓOMA 10

1Kutiom, man súumeenom wan ilawemi di búyegetom búrom woo eenomi man bukanom búrom mbi kupakeni. 2Ínje nimammanj tíen mati kumammaŋ máamak bee kamiiceelaet Atijamit bare kúlauleriit jak. 3Mati kúlaulut man Atijamit asofemi bukan kajoone bee di fúko’ool. Bare kooku bo eñes buruŋab booliil mambi Atijamit asofiil bukan kajoone. Ñaa di kulatumi esen kúkoiil bee di majoonam mati Atijamit. 4Mati Apakenaau Áamakau oo álirenumi sílingaas, manteer anoosani abajumi kafiumak mbi Atijamit asofool an ajoone. 5Muusa naciciik mambi Atijamit asof an ajoone, ñátum di kariiben wan sílingaas siregumi búrom. 6Bare wan furimaf fati Atijamit furegumi mambi Atijamit asof an ajoone ñátum di kafium woo eenomi, “Au ootut kaceeŋooro, Ai panajaw bee di bukinab bajakaab?” (yoo eenomi, áwalenul Apakenaau Áamakau). 7“Mba ootut kaceeŋooro, Ai panajaw bee di busunab básankimi babajutumi tan búkabe?” (yoo eenomi, man áyitenul Apakenaau Áamakau di kacetumi). 8Bare ñaa waa yíisenumi? Furimaf fulofilof, foofu di butumi di foofu di ésigiri (foo eenomi, furimaf fati kafiumak fan úriiŋenaalemi). 9Ufelujaat búyegeti man ureg di butumi mati Yensa eenomi Akiiyaau ban nufium di ésigiri mati Atijamit náyitenulooyiten di kacetumi, panubaj epak. 10Mati anau náyineneyinen di ésigirool man Atijamit asofool an ajoone, ban nafelumi búyegetool man aregumo di butumool, moo napakenipaken. 11Mati furimaf fati Atijamit foone, “Ampi afiummi di oo letapuñeni.” 12Bajut búpajuloor titoorey yati Kúyahuud di Kakaanutumi Kúyahuud. Mati Akiiyaau ákonau eenomi Akiiyaau ati anoosani di wanoosani búrom, ban nasenesen yaj bee di anoosani alawoomi. 13Mati, “Anoosani awonkumi kareesak kati Akiiyaau an akila panapak.” 14Bare buu pankuŋoolen kuwonkool man apakeniil leejaat kúyinenyinen di oo? Buu pankuŋoolen kúyinen di oo kaanjaat koo kujamurerut moola? Buu pankuŋoolen kujam moola kaanjaat bajut áriiŋena bee di bukoo? 15Buu pan bukanak kuŋoolen kúriiŋen leejaat kuboñiboñ? Mati ciikiciik, “Lee majak bee di bukanak kájeetumeuumi furimaf fajakaaf!” 16Bare kaanut bukanak búrom kusofe furimaf fajakaaf, mati aboñaau Yesaaya narereg man aane, “Akiiyaau, ai afiume wan ajammi di wúli?” 17Moo kaane, kafiumak kubajoebajo kápurumul di wan ujammi di furimaf fajakaaf, furimaf fajakaaf mati Apakenaau Áamakau. 18Bare mante ínje neene koo kujamut? Malegen kujanjam, mati nan man furimaf fati Atijamit foone, “Kurimak mati Atijamit kuyiisooyiisoor di dúniyaay búrom, ban poop kurimak kukila kufefet ban dúniyaay ereulomi.” 19Ínje nilaañ iceeŋuul, mante pipi bukanak kati Isirael kúlaulaul? Di mútiyaam, Muusa di fúko’ool nalaañenlaañen kúceeŋak uke di wan Atijamit aregumi, “Panikaanuul jiraano ñátum di koo kan umanje karees kati mof ceb kubaje bare kuyajut ekaan mof, ban panikaanuul kuuñuul kuri ñátum di bukanak kálaulutumi hani waaf mati Atijamit.” 20Ban niceen Yesaaya nasankensanken di kapeeto di wan Akiiyaau aregumi man aane, “Ínje bukanak kañesutammi kuraŋenanraŋen. Ínje níyiisenooroyiisenooro bee di bukanak kañesutammi.” 21Bare mati Kuyisiraelak, Atijamit nammi, “Di funakaf búrom ínje oomu man ifeke uñenom bee di bukanak kañoosammi ban di kulatammi.”

will be added

X\