RÓOMA 1

1Ínje Paul, aroka ati Yensa Apakenaau Áamakau, emmi di eciik letaraay uye, an Atijamit awonkumi ban namukenammi man ikaan áriiŋena man íriiŋen furimaf fajakaaf foola. 2Furimaf fajakaaf ufe Atijamit áligeenumi kabiñoo noo di fúcitumaf kápurum di kuboñaool, di furimaf fálirooraaf fati Atijamit. 3Foo fúyiisenyiisen mati Añiilau oola, abilumi akaan an, kápurumul di úwoloorumaw wati Dauda. 4Ban Yensa Apakenaau Áamakau Akiiyaolaal áyiisenimi di man akaan Añiilau ati Atijamit nan Atijamit áyitenuloomi di kacetumi ñátum di karambenak kati Búyegetab Bátienaab boola. 5Kápurumul di Apakenaau Áamakau, Atijamit násenolisen majakam moola ban námukenolimi man ukaan kúriiŋenaool manteer nurungen bukanak kati dúniyaay mbi kufium ban di kukammo. 6Muyuul poop di búkoro kawonkimi man jikaan bukanak kati Yensa Apakenaau Áamakau. 7Bee di muyuul búrom kammi di Róoma kan Atijamit amaŋumi ban namukenuumi man jikaan bukanak koola. Emitey ekaan Atijamit Ampaolaal di Akiiyaau Yensa Apakenaau Áamakau kuwuluul majakam mooliil di kásuumaayak kooliil di úyegetuul. 8Kob man itooŋ isal Atijamit úmboom, kápurumul di Yensa Apakenaau Áamakau bee mati muyuul búrom, mati kafiumak kooluul kujamojamo di dúniyaay búrom. 9Mati Atijamit ceb amanje wan isankenumi ukankaan malegen, an imiiceelaetemi di ésigirom búrom ñátum di káriiŋenak furimaf fajakaaf mati Añiilau oola. Atijamit namammanj man iwoolomi muyuul di kúlawak kúmboom bayoolorerut. 10Ban nilalaw nanoosani mati súumujaat di Atijamit mbi áwambul buruŋab búmboom mambi iŋoolen ibil bujukoor di muyuul. 11Mati ínje niraanoraano máamak. Nimammaŋ unaamooraal kawulak kákonak kápurumul di Búyegetab Bátienaab. 12Wan iregumi woo eenomi, muyuul di ínje úliŋenooraal síñakon, muyuul ñátum di kafiumak kúmboom ban ínje ñátum di kafiumak kooluul. 13Kutiom, nimammaŋ man jimanj mati ñameeŋe nisofeensof bee ebil bujukoor di muyuul (bare bajebaj waliteneammi). Nimammaŋ man íñakul bukan kajuupoe man kubil kukaan kuriiba kati Apakenaau Áamakau di titooruul nan man iñakeenumi noo bukaaku poop titoorey yati Kakaanutumi Kúyahuudak karinobomi. 14Ínje eete eteb búrooko bee karamben bukanak búrom, Kúroomanak di kakaanutumi Kúroomanak, kalinloaak di kafuuriak. 15Moo kaane nibabaj fuuñ fati emaŋ máamak bee káriiŋenuul furimaf fajakaaf poop kammi Róoma. 16Moo kaane furimaf fajakaaf fukaanutom kapuñ. Foo eenomi kánkumak kati Atijamit bee kapaken anoosani afiummi, man tooŋulomi di Kúyahuudak bee di Kakaanutumi Kúyahuudak. 17Furimaf fajakaaf ufe fúyiisenumi buu Atijamit akaanolaami ujoonaal di fúko’ool. Moo mubajumi kápurumul di kafiumak káŋarum di fúcitumaf bee di fúbanumaf. Nan man ciikimi eeno, “Anau akaanimi joon di Atijamit kápurumul di kafium naate eroŋ.” 18Kañuumulak kati Atijamit kúyiiseniyiisen kápurumul di bukinab bajakaab bee di kukaana majakut búrom di kájakaatimi kan uruŋaw wooliil ujakutumi di kufaŋ man kumingene malegenam. 19Mati wan bukan kuŋoolenumi kumanj mati Atijamit uŋooleniŋoolen ujuki tíen, mati Atijamit náyiiseniiyiisen wo búrom. 20Káŋarum biñoo noo di butuukab bati dúniyaay, Atijamit an bukanak kújukeriit moo eenomi kánkumak koola kábanriitumi, bukanak kumanjumiko kápurumul di wan atuukumi. Moo kaane, leekuŋoolen kubaj buruŋ bati epak di wan kukammi. 21Handeneen kumammanj Atijamit bare kusenutool kálebienak kan Atijamit akilumi mba kúsaleriitool. Bare síwoonooriil sitiititiiti ban di úyegetiil unogetunoget. 22Kukila kusosof kulinlolinlo, bare koo sígot, 23ban koo kusofut Atijamit ati mawuŋam ban poop ati bándoorey bare di kukatumi man kumiiceelaetumi sínaati san sajoonenimi nan fumuum fati bukan, mba bánaakayita, mba sínukuruŋ mba sínukuruŋ sáfuulooremi doo búrom dacetemi. 24Mati mo’omu, Atijamit nakatiil buke man kujaw buruŋiil. Kukankaan waafaw wasikomi wan sísigiriil simaŋumi, ban di kukaanoor wapuñenie di siniiliil. 25Mati koo lee man kúyinen malegenam mati Atijamit, bare di man kúyinen kalepoor. Moo kaane, di kumiiceelaetumi butuukab bati Atijamit bare lee Atijamit Atuukaau fúko’ool aatumi esaliey bee bándoorey. 26Mati mo’omu, Atijamit nakatiimi man kuriiben emaŋey yooliil yajakutey. Hani kuseekak kúmaŋeriit búyabo man ceeŋumi eeno. 27Moo mákonam kúniinaak poop kúmaŋeriit búyabo di kuseek, di kufaŋ man kúsuumenoore koo sicebiil. Kúniine kukaanoorekaanoor mukaanaam mapuñenie, moo kaane di éŋarul kúkoiil kútekak kan ceeŋumi mati mukaanaiil mafuuriaam man kukaanemi. 28Mati bukanak kukila kulalat kákaanumak fumanj falegenoe mati Atijamit, oo nakatiimi man kuriiben emaŋey yajakutey, manteer mbi kukaan wan ceeŋutumi man kukaan. 29Kumemmeeŋ di majakut manoosani maanomi nan májakaati, máwus, búlat, kaleetoor, jabuj, futiik, jabunt, enum, jatem, 30kasuulen, kakajenoor urees, kulata kati Atijamit, kapooñe, katebenelenoor, ká’aamakalenoor, síwoonoor sati wajakut, kakobutumi wan kuwolaiil kuregumi, 31kágotet, kakaanutumi kufiumaay, kubajut káboteni, kúbonketeriit. 32Handeneen man kumanjumiñaa mati sílingaas sati Atijamit soone, kakaanemi mo’omu kucenceeŋ ebuji. Bare kúre’eriit di ekaaney mo’omu bare di kúliŋen bukaaku man kukammo poop.

will be added

X\