1 Maleekaay etokeney di elitumi kábiilak kooliyo. Nijukumi yoot yaloulomi fatiya bee di dúniyaay. Esenisen ékulumaay yati busunab básankimi babajutumi tan búkabe. 2 Yootey di ékululumi busunab bukila, fakooraf ninsi fúpurumul dó rím bututut nan fúur fáamak. Bala’ab di járusey sírimen túk. 3 Fábangund fajuupoe di fúpurumul di fakooraf fúfimenumi dúniyaay. Di fusenimi kánkum kan sire’e di kánkumak kati balankuurab bati dúniyaay. 4 Fújaatikenimi takum fukajen étuureey, úbaaraw mba muliila muceen. Bare mbi fuŋoolen fukajen bukan kabajutumi fúmanjumaf fati Atijamit di kúriiŋiil. 5 Fábangundaf fusenimi kánkum man fúsuutukeniil kuleeŋ futok babujutiil. Ban jariey yati kásuutukenak sirere di jariey yati katafak kati elankuur di an. 6 Di kuleeŋ kukila bukanak pankuñes ecetey bare leekuŋoolen kubajuyo. Pankuraano man kucet bare ecetey paneteyiil. 7 Fábangundaf fukila funokoonokoor nan sipiling sajonjoore bee ejaw futiik. Di kúkaak koolifo baloopene waanoe nan wompoŋ wati jáyiaj wati sáni, ban wuulaw woolifo ukankaan nan wuul wati bukan. 8 Walaw woolifo ukankaan nan wal wati kuseek, ban úñiiŋaw woolifo ukankaan nan wati simukoor. 9 Úsusaw woolifo ubabaj uwel nan múkaruma mati mulap. Kayelak kati ulegaaw woolifo nan kálint kati sisareet sati sipiling sajuupoe sammi di ejaay futiik. 10 Foo fubabaj kúloj katafemi nan balankuur, ban di kúlojak kooliko kubabaj kánkumak kati kásuutukenak káriiŋe muleeŋam futok. 11 Foo fubabaj áyi arungumi fo, an eenoomi maleekaay yaakumi busunab básankimi babajutumi tan búkabe. Kareesak kooliyo di kasankenak kati Kúhiburak kooneyo Abadon di kasankenak kati Kúgirikak kooneyo Apolon. 12 Búyiikab butooŋandab buwuwuuj buban, man rinomi úyiik ugaba waate ebil. 13 Maleekaay etokeney di yákoney di elitumi kábiilak kooliyo. Nijammi furim fasankenulo di wahaw unokoorumi nan usiinaw ubakiiraw wati di sígoolenas sibakiiras sati jirembaj jati sáni tan búsiifetab bati bubaliinab bukooreenimi di bújonlenab bati Atijamit. 14 Furimaf fusankenumi bee di maleekaay etokeney di yákoney di foonuyomi, “Jikaten simaleekaas sibakiiras sakokimi di falaf fáamakaf fati Efurate.” 15 Ñaa simaleekaas sibakiiras sikatenikaten, sakokeenimi sammi man sijonjooreenimi bee mati di erig uye, funakaf ufe, fuleeŋaf ufe, emitey uye man sibuj bucaab bákon di ucaabaw úfeegiiraw wati bukanak búrom baabe di dúniyaay. 16 Man ijammi eeno, wuwuuj similiyoŋ siceme sigaba sati sipilingas sitiikaas. 17 Mo’ome moo nijukumi eeno sipilingas di waaf nan sáautas súmboom. Kuteyenaak kooliso kukaanokaano múkarumaam mati úsusaw máyeme nan sambun, di mabulore, di majiilaete. Kúkaak kati sipilingas koonokoono nan kúkaak kati simukooras. Di utumaw wooliso dihi sípurenul sambun, fakoor, di godoroŋ. 18 Bucaab bákon bati ucaabaw úfeegiir wati bukanak di bubujimi ñátum di úyiik úfeegiir nan sambunas, fakooraf, di godoroŋey. 19 Mati kánkumak kati sípilingaas kooku di utumaw wooliso di kúlojak kooliso. Kúlojak kooliso koonokoono nan siyela sabaje kúkaak kabajumi kánkumak man kúsuutukenumi bukanak. 20 Karinobomi, kabujutimi ñátum di úyiikaw uwu, hani moo di kulatumi kátiiwoorak kukat bálamuk di majakutiil. Di kurulenumi kamiiceelaetak kati úgun di sínaati sajoonenimi ñátum di sáni, di gódifori, di mulap máyeme, di kúlankiin di poop ubabar, san umanjumi síjukeriit, síjameriit, mba di sijaw. 21 Kútiiwoorut kukat bálamuk majakutam man kukammi nan jabujaj, mukaana mati fáliimaetaf, káraadiak mba jákuutaj.
