KAMANJENAK 7

1Nan mo’omu múpurutomi, nijukumi simaleeka sibakiir yanooyani man ejuume di égoolen yákon yati sígoolenas sibakiiras sati dúniyaay. Soo di silookumi járusey yati sígoolenas sibakiiras sati dúniyaay, takumbi járusey enag di dúniyaay mba di fal mba hani búbaar bákon. 2Nilaañumi ijuk maleeka yiceen man eyitoulo fús ban búrabumemi man yookenulo bunapenab bati Atijamit aroŋaau. Ban di ecibulomi ewonk simaleekaas sibakiiras saseneenimi kánkum kati kakajen yantaamey di falaf. 3Man yoonso, “Takum jikajen dúniyaay, falaf, mba úbaaraw, bee nampi wúli ukammi fúmanjum di kúriiŋak kati kurokaak kati Atijamit óololi.” 4Nijammi butumab bati kakaanimi kúmanjumak di kúriiŋiil. Koo kooni síwili sooni ceme di bukan kugaba di kubakiir kápurumulomi di kiilak uñeney di kugabaak kati Isirael, 5síwili uñen di sigaba kápurumulomi di fiilaf fati Yúda, síwili uñen di sigaba kápurumulomi di fiilaf fati Ruben, síwili uñen di sigaba kápurumulomi di fiilaf fati Gad, 6síwili uñen di sigaba kápurumulomi di fiilaf fati Aser, síwili uñen di sigaba kápurumulomi di fiilaf fati Nefutali, síwili uñen di sigaba kápurumulomi di fiilaf fati Manase, 7síwili uñen di sigaba kápurumulomi di fiilaf fati Simeon, síwili uñen di sigaba kápurumulomi di fiilaf fati Lewi, síwili uñen di sigaba kápurumulomi di fiilaf fati Yesakar, 8síwili uñen di sigaba kápurumulomi di fiilaf fati Sabulon, síwili uñen di sigaba kápurumulomi di fiilaf fati Esufa, di síwili uñen di sigaba kápurumulomi di fiilaf fati Beniamin, 9Nan mo’omu múpurutomi nijukumi, jameeŋ yati bukan, yan an amanjut buu ere’e, bukoo kápurumulomi di mofoomof, di fiiloofiil, di bukanoobukan, di kasankenookasanken, bajuume kujonlen fáculey yati ejunkutey yati jáyiaj di Jisahaaj. Bukoo man kukaanoe uloaay wafiite púl, anoosani man átuke kóot. 10Ban di kucibulo máamak di aaney, “Kapakenak di Atijamit oololaal kúpurumulo alakomi di ejunkutey yati jáyiaj, di poop kúpurumulo di Jisahaaj!” 11Simaleekaas búrom di sijummi siŋomenumi ejunkutey yati jáyiaj, di kunifaanak, di waroŋaaw watuukimi ubakiiraw. Kunifaanak búrom di kulo kúfima di bújonlenab bati ejunkutey yati jáyiaj man kumiiceelaet Atijamit, moo poop simaleekaas di waroŋaaw watuukimi sikammi. 12Di aaney, “Amen! Kasalak, mawuŋam, malinlaam, esaley, kálebienak, kánkumak di kákalaak búrom kooku di Atijamit oololaal bee bándoorey! Amen.” 13Ákon di kunifaanak kukila naceeŋammi, “Buku bukei, kakaanoñaa uloa wafiite púl? Boobei kúpurumulo?” 14Ínje neenoomi, “Arungaom, au numammanj.” Naanammi, “Buku koo eenomi kápurumulomi di búyiikab báamakab. Kupopos uloaiil útien púl ñátum di fúsimaf fati Jisahaaj. 15Moo kaane di kujummi di fáculey yati ejunkutey yati Atijamit, ninsi kumiiceelaetoomi nan kúsimena fuk di balay di fukobaf fáñiiaaf foola, ban ampi alakomi di ejunkutey yati jáyiaj aate epooyiil di bújonlenool. 16Bacaar mba baraan leebusofureriil, bala’ab leebuyahureriil mba ebola yáamak poop letegorureriil. 17Mati Jisahaaj jammi di titoorey yati ejunkutey yati jáyiaj, panjikaan amataiil, ban panjirungiil bee di síbula sasenemi eroŋey, ban Atijamit panayuuy jikul janoojani jammi di kúciliil.”

will be added

X\