KAMANJENAK 6

1Ñaa nijukumi Jisahaaj di jínapul bunapen bákon di unapenaw futokey di ugabaaw, ban nijammi wákon di waroŋaaw watuukimi ubakiiraw di wammi furim facibuloe nan kapajaak, “Bil!” 2Nijikerumi nijukumi epiling étumpaay pul. Ateyenaau ooliyo man aakene fuŋaajen, naloopenimi bompoŋ bati jáyiaj. Nateyenuyomi ápur man ajaw nan érimbaan man aŋoolen futiik fanoosani. 3Nan Jisahaaj jínapulumi bunapenab bugabuntenab, nijammi waroŋaaw watuukimi ugabuntenaw di woonaam, “Bil!” 4Epiling yiceen yáyeme pús di épurul fús. Ateyenaau ooliyo asenimi kánkumak kati kayiten futiik baabe di dúniyaay, man bukanak kubujoor. Nasenimi jilibaaj jabaakaaj. 5Nan Jisahaaj jínapulumi bunapenab búfeegintenab, nijammi waroŋaaw watuukimi úfeegintenaw waanammi, “Bil!” Ban nijukumi epiling yalaene tir. Ateyenaau ooliyo man aakene múyinkuma di kañenool. 6Nijammi wayesoore nan furim kápurumul di titoorey yati waroŋaaw watuukimi ubakiir waane, “Ekilo yákon yati emaanaay panjicaam edenaari yákon, di sikilo sífeegiir sati bálutab panjicaam edenaari yákon bare takum jikajen butum burioe túleey yati úbaar Uwoliiw di wayiney yati Ureseŋ.” 7Ñaa jisahaaj di jilaañ jínapul bunapenab bubakindenab, nijammi furimaf fati waroŋaaw watuukimi ubakindenaw man woonaam, “Bil!” 8Jíyenten, nijukumi epiling éfumpaŋ ban ateyenayo nasenimi kareesak koo eenomi Ecetey, di Esuney di eriibenoomi bálamukool. Sibabaj kánkum kati ebujey bucaab bákon di ucaabaw ubakiiraw wati dúniyaay, ñátum di jiliba jabaake, di bacaar, di kásumut kátipooremi, di sínukuruŋ sákoolenie sati karambaak kati dúniyaay uye. 9Nan Jisahaaj jínapulumi bunapenab butokenab jiban, nijukumi di fátaamaf fati fúsimenaf káraamuleenimi mati káriiŋenak kati furimaf fati Atijamit ban di kurulen ekaan kúyiisena kufiumaay. 10Di kucibulomi man koone, “Akiiyaau ati Kánkum, Áliroorumi ban nulegeno. Noonei nuje’e bee kagamen bukanak kati dúniyaay ban nutek kábujolimi?” 11Ñaa anoosani di bukoo nasenimi kaloaay káamak kafiite púl ban di kújaatikenimi mati kukob jayiinkun, bee nampi kúlirenumi butumab bati kupaaliil kurokaak di kuriibaak kuti’iil kan koote ebuji, nan man kubujeenimi. 12Nan Jisahaaj jínapulumi bunapenab futokey di bákonab. Jíyenten, nijukumi di bajumi káliliŋenoor kati yentaamey káamak. Nijukumi bala’ab di bubilumi boono nan furookal falaene tir, fuleeŋaf fubilumi fúyem foono nan fúsim. 13Bootab insi búloul pálalal nan muñiil mati búbaar moom di kayoŋo nan fárusaf funage ñaa fútutut. 14Fatiya di éjimmi meej nan kayit kabooñimi. Ban fúlankiin di fúrink fanoofani sípureni di tan silako. 15Kúyiak kati dúniyaay, bukanak káamakak, kurungaak kutiikaak, kubajaak, di kabajumi kánkumak, di karinomi búrom, kumiiceel di kakaanutumi kumiiceel, di kuyofomi di úhorahor wati kúlankiin. 16Ban di kucibulomi kúlankiinak di kukoobaak, “Jíloul títi di wúli ban di jíyofoli di anau ammi di ejunkutey, ban jíyofoli di kañuumulak kati Jisahaaj. 17Mati funakaf fáamakaf fati kañuumulak kooliil fúrindiiŋ. Ai aate kapeeto bee ejuum di bújonlenab bati Atijamit di Jisahaaj?”

will be added

X\