1 Nan púrutomi, niluenumi fatiya nijukumi, butum báwambuloe di bukinab bajakaab wáay! Furimaf fútiyaaraf fan ijammi man fúsankenulammi nan yiiŋoor nan kábiil, di foonammi, “Jó’ol bee etaat man íyiiseni waatumi kabajoak fáculey.” 2 Yaŋ too galab Búyegetab Bátienaab di bookammi. Wáay, nijujuk ejunkut yati jáyiaj man ejuume típ di bukinab bajakaab, man anau alakoe to. 3 Alakomi ejunkutey yati jáyiaj nawuŋen ñiliñil nan bakooba bajooŋoore baanoe nan étuuru di báyeme wúk, funaabaf faanomi di fuŋomenuyomi nan étuuru. 4 Sijunkut siceen sati jáyiaj sooni kabanan di sibakiir silakolako siŋomen ejunkutey ekila yati jáyiaj. Di soo kunifaanak kooni kabanan di kubakiir kulakomi. Bakaanoe wañ wafiite ban di kookenumi wompoŋ wati sáni wati jáyiaj di uñeniil. 5 Di bajumi kálint kírititi kírititi di ñofen di liboor wij wij, ban káliliŋenoorak kati yentaam roo rípurumul di ejunkutey yati jáyiaj. Di bújonlenab bati ejunkutey yati jáyiaj sífitikenuma futokey di sigabaas, san eenomi Úyegetaw Wátienaaw wati Atijamit futokey di ugabaaw. 6 Di bújonlenab booliyo waanoe nan fal fati siweer sátiene, nan éjuudooruma. Di bajumi waroŋe watuukimi wooni ubakiir ubabaj kúcilak fáculey di poop bálamukab bati wo wajuume di báridab di bamayab bati ejunkutey yati jáyiaj. 7 Waroŋaaw wo’owu watuukimi útiyaaraw ukankaan nan jimukoor, ugabuntenaw ukankaan nan fúmuuna, úfeegintaw ukankaan nan buul bati an, ban ubakindenaw ukankaan nan bíibi. 8 Waroŋaaw watuukimi ubakiiraw, di do’odu dibakiirad daaraara ebabaj ulega wooni futok di kákon, ban ulegaaw wooliwo umemmeeŋ di kúcil barebare síndeneey di téeŋeraay. Fuk di balay síyooloeriit écimey. “Líroor, líroor, líroor, eenoomi Akiiyaolaal Atijamit ati Kánkum, ati noo, ati iñeme, di aatumi bee ebiley!” 9 Nanoosani waroŋaaw watuukimi ubakiiraw ulakomi esaley, di kálebienak, di eseney kasalak bee di alakomi di ejunkutey yati jáyiaj joola, aroŋumi bee bándoorey. 10 Nanan nákonan kunifaanak kooni kabananey di kubakiirak di kulomi kúfima di bújonlenab bati alakomi di ejunkutey yati jáyiaj. Nan man kumiiceelaetumi aroŋumi bee bándoorey, di kuleebumi wompoŋiil wati jáyiaj di fáculey yati ejunkutey yati jáyiaj, di écimey di yóro, 11 “Au núrindiiŋ kamiiceelaet Atijamit Akiiyaolaal, man bukanak kuregi mákalaam mooli, kúlebieni, ban di kusali mati kánkumak kooli, mati au utuukumi wanoosani búrom, ban ñátum di kamaŋak kooli wanoosani utuukituuk ban di ubajo.”
