KAMANJENAK 3

1“Ciik letaraay bee di maleekaay yati fujojaf fati Sadis: ‘Kurimak kápurumulomi di akila aakumi Úyegetaw Wátienaaw wati Atijamit wooni futokey di ugabaaw di sootas sooni futokey di sigabaas di kañenool kúridak. “‘Ínje nimammanj burokab booluul, karees ceb jooke kati muyuul bukan karoŋe, bare muyuul wiiŋ. 2Jíyilo! Jiunkulen di kánkumak karinomi jayiinkun di muyuul, leejaat mo pankucet yos. Mati ijukut burokab booluul bajakaab di bújonlenab bati Atijamit. 3Jiwoolo wan jiliikitenumi di wan jijammi. Jijuum lit man jítiiwoor jikat bálamuk majakutuul. Jíyiloutujaat, pánijawumuluul nan ákuu ban jootut emanj nanan nei neete káloumuul bíp. 4Hani moo babaj bukan kupinaay di muyuul kammi Sadis, kamokentumi wañaw wooliil. Bukoo pambiujawoor di ínje, bakaanoer wañ wafiite, mati koo bukan kayaje mo. 5Ampi aŋoolenumi kánkumak kati Seetaanaay pambiakaano wañ wafiite lec, ban leebi’iyuuy kareesool di búkaay yati eroŋey. Panifel búyegetom man ireg moola di bújonlenab bati Ampaom di simaleekaool. 6Anoosani abajumi uwos újamuma, najam wan Búyegetab Bátienaab bommi di eregey bee di kati kujojak.’ 7“Ciik letaraay bee di maleekaay yati fujojaf fati Filadeefia: ‘Kurimak kápurumul di akila áliroore, ati malegenam, aakumi ékulumaay yati Dauda. Áwambulemi ban aceen letaŋoolen awamben, ban akulemi ban aceen letaŋoolen áwambul. 8“‘Ínje nimammanj burokab booluul. Jíyenten, ínje níwambuluuwambul butumab ban letaŋoolen awambenubo. Nimammanj mati jibabaj kánkumak bare kuyajut, iñeme jisosof furimom faregumi ban jíñooseriit kareesom. 9Jíyenten, panikaan kammi di fukobaf fati Seetaanaay man koone kukila Kúyahuud ban lee mo, bare bukoo kulepooraak. Jíyenten, pániroogeniil di úkamunuul mbi kúlaul mati kamaŋak kúmboom di muyuul kommi. 10Mati jisosof furimaf fúmboom di erum fubil di kamuuten, panikaanuul jipak di nanan nati buyinkab bábileuumi bee eyinkey bukanak kati dúniyaay búrom. 11Ínje oomu níbileul iñemeeñeme, jisof líŋ di wan jookumi, takumbi an abot bacaamab booluul. 12Ampi aŋoolenumi, ínje eete ekaanool ésaguma di fukobaf fáñiiaaf fati Atijamit úmboom, létapurer dó. Ban ínje eete eciik kareesak kati Atijamit úmboom di akila, di kareesak kati ésukey yáamakey yati Atijamit úmboom, yan eenomi Yerusalem yunkuley yápurumul di Atijamit úmboom di bukinab bajakaab, di kareesom kunkulak fúkouko. 13Anoosani abajumi uwos újamuma, najam wan Búyegetab Bátienaab bommi di eregey bee di kati kujojak.’ 14“Ciik letaraay bee di maleekaay yati fujojaf fati Laodik. Kurimak uke kápurumul di an koonemi Amen, an afiumaay di áyiisenaau alegenau, ácitaau ati wanoosani wan Atijamit atuukumi. 15“Ínje nimammanj burokab booluul. Muyuul jijinlenut mba jíboliut. Panifaŋeen man imaŋe jijinleneen mba jíbolieen! 16Bare mati muyuul jooju titoor jijinlenut mba jíboliut, ínje eete kápuulenuul di butumom. 17Mati joonesoon, ‘Ínje abaja. Ínje nifelofelo, iceeŋut hani wákon!’ Bamanjut mati muyuul bukan kábotenie, kaleke, kápuume, ban sírumpun sítiikaar. 18Moo kaane ínje neem di kagamenuul mbi jinoom sáni di ínje yan sambun sikuurene, mambi jibaj fubaj. Jinoom di ínje wañ wafiite man jikaano jífimen kapuñak kati sírumpunuul sítiikaaras takum an ajuk. Jinoom poop bubeebenab bati kúcilak man jiŋoolen jijuk tá. 19Kan imaŋumi, koo nimandooremi ban nikuriil. Moo kammi jibaj kuuñ ban di jítiiwoor jikat bálamuk majakutam mooluul. 20Jíyenten, ínje oome man ijuume di butumab mansi ikongen. Ampi ajammi furimom man áwambulom, paninoken bee di oo man iri di oo, ban poop oo nari di ínje. 21Ampi aŋoolenumi kánkumak kati Seetaanaay, ínje panisenool buruŋ man ulako tákon di ejunkutey yúmboom yati jáyiaj, nan man ínje di fúko’om iŋooleneenuyomi ban nulakomi tákon di Ampaom di ejunkutey yoola yati jáyiaj. 22Anoosani abajumi uwos újamuma, najam wan Búyegetab Bátienaab bommi di eregey bee di kati kujojak.’” egey bee di kati kujojak.’”

will be added

X\