KAMANJENAK 22

1Maleekaay di éyiisenammi falaf fati mumelam masenemi eroŋey, mátiene nan weer, di múteyul kápurumul di fátaamenaaf fati ejunkutey yati Atijamit di poop yati Jisahaaj. 2Di mutey di titoorey yati buruŋab báamakab bati ésukey yáamakey ekila. Kapanookapan kati falaf kubabaj búbaarab bati eroŋey buwolewol ñooni uñen di ñagaba di emit, jileeŋoojileeŋ buwol ñákon. Etojey yoolibo panekaan bubeeben bati kiilak búrom. 3Bunumab bati Atijamit bootut bee kabajorer dó. Ejunkutey yati Atijamit di yati Jisahaaj sootumi kalako’oorak di ésukey, ban kurokaak koola pankumiiceelaetool. 4Pankujuudoor kúcil kubakiir, ban kareesool pankuciiki di kúriiŋiil. 5Fuk leefubajorer, inki kuceeŋut mawuŋam mati éwuŋenuma mba mawuŋam mati bala’ab. Akiiyaau Atijamit aatumi ekaaney mawuŋam mooliil. Ban buku pankurungubo nan kúyi bee bándoorey. 6Maleekaay di yoonammi, “Kurimak uke kuyayaj kafium ban kukankaan malegen. Ban Akiiyaau Atijamit asenemi Búyegetab Bátienaab boola bee di kuboñaak, oo aboñumi maleekaool man éyiisen kurokaool waa woote kabajoak iñemeeñeme.” 7Yensa nammi, “Jíyenten, ínje oomu nílaañeul iñemeeñeme! Ampi asofumi mati kurimak kati kamanjenak wan kuregumi di búkaay uye, jakoojak!” 8Ínje, Yohan, ajammi ban nijukumi uru búrom. Nan ijamuwomi ban nijukuwomi, nilomi kúfima di úkamunaw wati maleekaay di úkamunaw wati maleekaay éyiisammi uruñaa, 9bare di yoonammi, “Takumbi ukammo! Ínje poop apaali aroka ati Atijamit ceb nan man au di kuti’i kuboñaak, ban kasofumi kurimak kati búkaay uye. Miiceelaet Atijamit!” 10Di elaañumi yoonammi, “Takum uyof kurimak kati kamanjenak di búkaay uye, mati nanan nilolof nan mo’omu búrom eetumi kabajoak. 11Akammi búlaput katool man arulen di bo. Abajumi búyeget bamokene katool man arulen di bo. Akammi an alegen katool man arulen di bo. Ampi áliroorumi, katool man arulen di mo.” 12“Jíyenten, ínje oomu nílaañeul iñemeeñeme! Búgalenab boo neekumi, ban panigalen anoosani di wan akammi. 13Ínje eenomi Fúcitumaf di Fúwuŋenumaf, átiyaarau di álamukaau. 14Kaposumi tíen uloaiil wáamakaw, mbi kubaj buruŋab bee di búbaarab bati eroŋey ban di kuŋoolen poop kújawumum di kúlamutak bee di ésukey. 15Bare téeŋeraay karinobomi koo eenomi siyen, kakaanemi fáliimaet, kayenet, kubuja, kamiiceelaetemi sínaati, kamaŋumi ninsi kukaan mukaanaam mati kagaajoor. 16“Ínje, Yensa, aboñulomi maleekaay yúmboom man eregen káyiisenak uke muyuul bee di kujojak. Ínje eenomi fufaaraf ban búwolumab bati Dauda. Ínje eenomi yootey yarajulomi di waradabaw.” 17Búyegetab Bátienaab di Ámajira aatumi kayabo koone, “Bil!” Anoosani ajamemi nareg kajamutumi, “Jibil.” Anoosani baraanab busofumi nabil. Ban anoosani súmmi, naŋar mumelam mati eroŋey di butum batiitie. 18Ínje, Yohan, igameññaa ajammi kurimak kati kamanjenak di búkaay uye. Ampi abenentomi furim, Atijamit panabenen kútekak koola ñátum di úyiikaw wáyiisenimi di búkaay uye. 19Ban ampi agumbulumi kurimak kati kamanjenak kápurumul di búkaay uye, Atijamit pánagumbul bucaabab boola di búbaarab bati eroŋey di ésukey yálirooraay, wáyiisenimi di búkaay uye. 20Ampi áyiisenumi uru búrom mbi aane, “Éey, Ínje oomu nílaañeul iñemeeñeme.” Amen. Láañul, Akiiyaau Yensa! 21Emit ekaan majakam mati Akiiyaau Yensa móomi di bukanak kati Atijamit búrom. Amen.

will be added

X\