KAMANJENAK 2

1“Ciik letaraay uye bee di maleekaay yati fujojaf fati Efes. Kurimak kápurumul di akila aakumi sootas sooni futok di sigabaas di kañenool kúridak, ban ajaatoorumi titoorey yati kújuumenumaak kati síwuŋenumaas futokey di sigabaas sajoonenimi ñátum sánaay. 2“‘Ínje nimammanj burokab booluul, burokab báamakab, di erum fubil di kamuuten kooluul. Nimammanj man jilatumi mati bukanak kajakutak ban ninsi jímeeloemi kakaanemi kúkoiil kúriiŋena bare kukaanut mo, ban jimanjumi mati koo kulepooraak. 3Nimammanj buu joom di kamuutenak di bugaalab mati bálamukom, bare jilaañut bálamuk. 4Bare wákon úsuumutammi di muyuul, woo eenomi kamaŋak kútiyaarak kan jibajeenumi noo jibetembeten ko iñeme. 5Jiwoolo kamaŋak kútiyaarak kooluul tan kulakoeenumi di jaat tan kommi. Jítiiwoor jikat bálamuk majakutam mooluul man jílaañul bee di kamaŋak kan jibajeenumi. Kaanutumojaat, panibil ban nípuren éjuumenumaay yati síwuŋenumaas sooluul tan sommi di kujojak. 6Bare babaj wákon nubaje, jilalat yém wan kuriibaak kati Nikolaiton kukammi, nan man ínje ilatuwomi eeno. 7Anoosani abajumi uwos újamuma, najam wan Búyegetab Bátienaab bommi di eregey bee di kati kujojak. Ampi aŋoolenumi kánkumak kati Seetaanaay, panisen buruŋ man ari búbaarab bati eroŋey, bammi di bukinab bajakaab bati Atijamit.’ 8“Ciik letaraay uye bee di maleekaay yati fujojaf fati Sumuruna: ‘Kurimak kápurumul di akila akammi Fúcitumaf di Fúwuŋenumaf, aceteenumi ban nálaañul bee di eroŋey. 9“‘Ínje nimammanj búyiikab ban jommi di bo, di poop bulekab booluul (bare muyuul jibabaj fubaj)! Ínje nimammanj kasuulenak kati kaanemi koo Kúyahuud bare lee ko, bare koo kukankaan nan fukob fati Seetaanaay. 10Mante jíkoliut bugaalab baatumi ébajuley iñemeeñeme. Jíyenten, Seetaanaay ejonjoojonjoor eban bee eleeb kuceen di muyuul dán bukanak kukuleimi, mambi jiyinki, ban bee wáriiŋe kunak kooni uñen joote kalako di búyiikab. Joote ekaan bukan kufiumaay handeneen di jijonkoor di ecetey, jikammojaat, pambi’isenuul bacaamab bati eroŋey. 11Anoosani abajumi uwos újamuma, najam wan Búyegetab Bátienaab bommi di eregey bee di kati kujojak. Ampi aŋoolenumi kánkumak kati Seetaanaay waaf letubajool wati ecetey egabunteney yan eenomi ecetey yati bándoorey.’ 12“Ciik letaraay uye bee di maleekaay yati fujojaf fati Peregam: ‘Kurimak kápurumulo di akila aakumi esagalaŋey yayabaay. 13“‘Ínje nimammanj ésukey yáamakey yooluul, ban Seetaanay erungumi nan áyi. Jirulenrulen di esofey kareesak kúmboom lit, ban jípurut di kafiumak kooluul di ínje, hani nan Antipas, áyiisenaom afiumaay, abujimi di ésukey yáamakey yooluul, ban Seetaanaay yommi. 14Bare uceen upinaay úsuumutammi di muyuul. Kuceen di muyuul kuriibenriiben man kukaan mukaanaam mati kaliikitenak kati Balaam, aliikitenumi Balak mampi akammi Kuisiraelak kutatagoor kulo ñátum di ekaaney man kuri muria másimenimi bee di sínaati ban ninsi kufinto di kan kuyaboorutumi. 15Moo mákonam, di bajumi kuceen di muyuul kuriibeneriiben kaliikitenak kati Nikolaiton. 16Kama jítiiwoor jikat bálamuk majakutam mooluul. Leejaat mo, ínje eete ebil ériiŋuluul iñeme nan piyout man itiikeniil ñátum di esagalaŋey yápurumulomi di butumom. 17Anoosani abajumi uwos újamuma, najam wan Búyegetab Bátienaab bommi di eregey bee di kati kujojak. Ampi aŋoolenumi kánkumak kati Seetaanaay, ínje eete esenool manna yaayu yayofimi. Di poop panisenool ekooba yátiene lec, tan karees kunkul kuciiki, kan an aatut emanj rino di ayabuyomi.’ 18“Ciik letaraay bee di maleekaay yati fujojaf fati Tuturo: ‘Kurimak kati Añiilau ati Atijamit, abajumi kúcilak kaanomi nan bújeek bati sambun, ban úkamunool waanomi ñiliñil nan mulap máyeme maposi fiit. 19“‘Ínje nimammanj burokab booluul, di kamaŋak kooluul, di kafiumak kooluul, di erum fubil di kamuuten, ban burokab bati iñeme bufaŋumi man buje’e fácul wuuj bati mútiyaaram. 20Bare wákon úsuumutammi di muyuul. Mati aseekau Yesabel jikatookat man akaan wásuumoomi, awonkooromi aboña ati Atijamit. Ñátum di kaliikitenak koola nabuntemi kurokaom man kukaan kayenetak di poop man kuri muria másimenimi bee di sínaati. 21Nisenoosen nanan man átiiwoor akat bálamuk majakutam moola, bare nalatumi yém man akammo. 22Jíyenten, pánitekumool di ekaanool man ásumut, ban bukaaku kafintoemi di oo pánitekumiil ñátum di búyiik báamak, leejaat kútiiwootiiwoor kukat bálamuk majakutam di poop fúraaraf fan kukammi di aseekau umu, 23ban ínje poop panibuj kuriibaool, moo kati kujojak búrom koote emanj mati ínje eenomi áninguloora ati sísigiras di úyegetaw wati bukanak, ban panicaamuul riiboor di wan anoosani arokumi. 24Bare ínje nisankensanken di karinomi di Tuturo, kaleemi di eriib kaliikitenak kajakutak. Ban poop jiliikenut wan bukaaku koonemi waaf wásankie wati Seetaanaay. Ínje eem di ereguul mati letirooken bugaal buceen di muyuul. 25Bare jisof líŋ wan jookumi, bee nampi ílaañuumi. 26Ampi aŋoolenumi kánkumak kati Seetaanaay ban nakaan burokab búmboom bee di fúbanumaf, panisenool kánkum kati erungey yati mof majuupoe, 27panarung mofam búrom ñátum di egol yati mulap, ban nafumiil nan mubik. Pankubaj kánkumak kákonak kan iyabumi di Ampaom. 28Ban panisenool yootey yati waradabaw. 29Anoosani abajumi uwos újamuma, najam wan Búyegetab Bátienaab bommi di eregey bee di kati kujojak.’

will be added

X\