KAMANJENAK 18

1Nan púrutomi mo’omu, nilaañumi ijuk maleeka yiceen di éwaloul di bukinab bajakaab. Man yooke fujuum fáamak, dúniyaay búrom éwuŋenimi pasasas ñátum mawuŋam mooliyo. 2Di ecibulo máamak man yoone, “Elolo! Elolo Babilon yákalaami elolo! Di ebilumi ekaan dán úgunaw di úyegetaw wájiteniaaw, di poop dán énaakayita yanoosani yajakutey, 3Mati bukanak kati mofam búrom kurandaan wayiney yati emaŋey yooliyo yajakutey ekaan káraadiaak, kúyiak kati dúniyaay kusensen kúkoiil di yo mati kaseeketak, ban kunoomenaak kanoosani baabe di dúniyaay kukankaan kubaja káamak mati emaŋey yásuumaay yooliyo.” 4Nilaañumi ijam furim fuceen di bukinab bajakaab man foone, “Bukanom jípur di yo, takum jinaamoor di majakutam mooliyo, takum jinaamoor di úyiikaw wooliyo. 5Mati majakutam mooliyo murembenoorembenoor múriiŋ bukinab bajakaab, ban Atijamit nawoolowoolo bújakaataab booliyo. 6Kaan nan man ekammi au, galenuyo ñooni ñagaba di wan ekammi. Senuyo faŋ man tálie ñooni ñagaba wuuj wan esenimi. 7Nan man élebienooromi ñátum di eroŋey yásummi, Ñaa senuyo bugaalab di mátaañiam mákonam. Mati di búyeget booliyo boonesoon, ‘Ínje áyi di ejunkutey yúmboom, ínje lee aseekau ati ájimaau, ban letimanjurer kagamoor.’ 8Mati mo’omu, di funak fákon úyiikaw wooliyo woote éloumuyo ban di uŋoolenuyo, úsumut watipooremi, kagamoor, di bacaar báamak, mati yoote kareemeni jororor di sambun, mati Akiiyaau Atijamit ati Kánkum, panagamenuyo.” 9Kúyiak kati dúniyaay kaseeketemi ban di kumaŋ eroŋey yoola yásuumaay di fubajaf fooliyo, pánkuruuren kugamoor mati yo, nampi kujukumi fakooraf fati sambun sammi kareemenakuyo. 10Mati kákoliak, man kujuum lói di aaney, “Wow! Wow! Ésukey yáamakey, Babilon ésukey ekila yákalaami remo! Yaŋ tootooto kagamenak kati Atijamit títi di yo.” 11Kunoomenaak káamakak kati dúniyaay pánkuruuren di kugamoor bee mati yo, mati an aatut enoom mútebuma mati munoomenaam mooliyo. 12Hani an ákon letanoom mútebuma mati sáni, gódifori, búkarooruma di umaal wapincoe, wañ walegen, wañ wáñubimi ñátum di wakaayene éyem di wañ wáyeme wúk, ubabar waputemi súum, wajooneimi di úsaliŋ, wajoonenimi di ubabar wan butum burioe, mulap máyeme di bakooba bajooŋoore. 13Mútebuma mati waputemi súum nan sinaamon, etoj, ubabar, di melam maputemi súum nan sumurun di libano, wayin, túlu yati Uwoliiw, epor yalegen yati busereŋ, síbe di sisaha, sipiling di sisareet, di kumiiceel, ban di suutas sati bukanak. 14Kunoomenaak káamakak koonuyomi, “Wajakaaw búrom wan uraaneenumi máamak woo ukañokano búrom di au. Fubajaf fooli di majakam mooli fújinjim nel, letubajurer inki!” 15Kunoomenaak káamakak, kubilumi kukaan kubajaak káamakak ñátum di kanoomenak di ésukey yáamakey ekila, pankujuum lói di yo, mati kúkolikoli kanaamoor di kásuutukeniak kooliyo. Pánkuruuren di kugamoor cibulo, 16“Wow, wow, mati ésukey yáamakey yakareneimi di wañ walegen wakaayene éyem di wáyeme wúk, yákarooromi ñátum di sáni, búkarooruma, di umaal wapincoe. 17Yaŋ tootooto fubajaf ufu fákalaami remo di fújimmi meej!” Kurungaak kati usaanaaw di kujawaak búrom, di kurokaak kati dó, di károŋumemi di falaf, koo búrom di kujummi lói di yo. 18Nan kujukumi fakooraf fati sambun sammi di kareemenakuyo, pankureg, “Bajorerut ésukey yaanoe nan ésukey yáamakey uyu?” 19Di kuŋarumi mof man kufoonoor di kúkaak kooliil di kúruuren di kugamoor, man koone, “Wow, wow, mati ésukey yáamakey yákalaami yan usaanaaw wáamakaw búrom wommi di falaf fáamakaf di ebilumi ekaan ésuk yabaje. Yaŋ tootooto fubajaf ufu fákalaami remo di fújimmi meej. 20Wóoy bukinab bajakaab maayoor mati yo! Wóoy bukan kati Atijamit, di kúriiŋena, di kuboña, mati Atijamit nagamengamen yo mati wan ekaanuumi! 21Maleeka yati kánkum di eŋarumi fukooba fan siyesoor di fukooba fúnegenuma fáamak man eleebufo di falaf fáamakaf eban di yoone, “Babilon yákalaami mo’ome panebetimi jákaati eeno, ban letelaañ ejuumenderi, 22ban kayelak kati suusa di kúcima, kulita kati fuyila, di kati úbiil, leekujamurer di yo! Aroka ati burok banoosani aatut elaañ ajukureri di yo. ban kayelak kati fukoobaaf fúnegenumaaf kootut elaañ kuyelureri di yo. 23Mawuŋam mati éwuŋenuma mootut elaañ muwuŋenderi, ban furimaf fati ániine di anaare kaate kayaboor, footut elaañ fujamureri di yo, mati kunoomenaak kooliyo kukankaan bukan kabaje kánkum di dúniyaay, ban kati mofam búrom kammi di dúniyaay kubuntibunt ñátum di fáliimaetaf fooliil. 24Babilon ebabaj kútek mati fúsimaf fati kuboñaak di fati bukanak kati Atijamit fáyuimi di ésukey yáamakey ekila. Malegen, fúsimaf fati bukanak búrom kabujimi di dúniyaay uye.

will be added

X\