KAMANJENAK 16

1Nijammi furim facibuloe dóo di fukobaf fáñiiaaf man foone simaleekaas sooni futokey di sigabaas, “Jijaw bee di dúniyaay man jíyu sibiinas sooni futokey di sigabaas sati kañuumulak kati Atijamit.” 2Ñaa maleekaay étiyaarey di ejawumi éyu ebiiney yooliyo di dúniyaay. Musonta majakut mákoolenie di múpurulomi di bukanak kaakumi fúmanjumaf fati énukuruŋey yákooleniaay ekila ban di kumiiceelaetumi ebaŋootey yooliyo. 3Maleekaay egabunteney di éyumi ebiiney yooliyo di falaf fáamakaf. Mumelam di mulaañoorumi nan fúsimaf fati an acete, ban wanoosani waroŋumi dó, di ucetumi. 4Maleekaay éfeeginteney di éyumi ebiiney yooliyo di kalak di síbulaas sati mumelam, ban di mulaañoorumi fúsim. 5Nijammi maleekaay yati mumelam man yoone, “Nujonjoon di kagamenak uke kooli, au, Atijamit Álirooraau, ati iñeme di ati noo! 6Mati buku kúyuyu fúsimaf fati bukani di fati kuboñai, ban nuseniimi fúsimaf man kuraan, ban poop koo karaanaiil.” 7Nijammi furimaf fúpurumulomi di fúsimenaf man foone, “Akiiyaau Atijamit ati Kánkum! Kagamenak kooli kulegenolegeno ban kujonjoon.” 8Maleekaay ebakindeney yoo di éyumi ebiiney yooliyo di bala’ab, ban di busenimi buŋar man bubol bukanak nan sambun. 9Ebolaay yáamakey di eboliimi, biyok kunum kareesak kati Atijamit, aakumi kánkum kati úyiikaw uwu. Bare kumaŋut kútiiwoor kukat bálamuk majakutam mooliil ban di kusal mati mákalaam moola. 10Maleekaay etokeney di éyumi ebiiney yooliyo di ejunkutey yati énukuruŋey yákooleniaay, ban jáyiaj jooliyo di jírimenumi túk. Kati jáyiaj jooliyo di kutooŋ erumey kubilak kooliil, 11ban di kunummi Atijamit ati bukinab bajakaab mati jári’iil di musontaiil, ban kumaŋut kátiiwoor kukat bálamuk majakutiil. 12Maleekaay etokeney di yákoney yoo di éyumi ebiiney yooliyo di falaf fati Efurate. Nan kammomi mumelam mati falaf di muyondumi rat, bee kajoonen buruŋ bati kúyiak kápurumul di ban bala’ab búrabumemi. 13Nilaañumi ijuk úgun wooni úfeegiir wasikoe waanoe nan sifool. Woo di épurul di butumab bati eyelaay yajuudiitimi, di bati énukuruŋey yákooleniaay, di bati aboñaau abuntaau. 14Mati uwu ukankaan nan úgun, wakaanemi wajamurerutimi. Úgunaw uwe úfeegiiraw woo uje’emi bee di kúyiak kati dúniyaay búrom ujojeniil tákon bee mati futiikaf di funakaf fáamak fati Atijamit ati Kánkum. 15(”Jíyenten, ínje oomu di éjawuley nan ákuu! Anau ámooriutumi ban nakaanomi wañaw woola jakoojak, manteer takumbi alako búliŋet man apuño di bukanak!”) 16Úgunaw ujojenumi kúyiak tákon, tanat tan koonemi Amagedon di kasankenak kati Kúhiburak 17Maleekaay etokeney di egabunteney yoo di éyumi ebiiney yooliyo di járusey. Ñaa dóo di fukobaf fáñiiaaf nijammi furim facibuloe kápurumul di ejunkutey yati jáyiaj man foone, “Kaanikaan ban!” 18Di bajumi kálint kírititi kírititi di ñofen di liboor wij wij. Káliliŋenoorak kati yentaam kabajorerut kabiñoo di fúcitumaf nan anau atobojumi tentaam. Malegen káliliŋenoorak uke kati yentaamey kufaŋ man kújakaatie wuuj kati noo. 19Ésukey yáamakey yati Babilon yákalaami di ejisomi upan úfeegiir, sísukas sáamakas sati mofam búrom mati dúniyaay di silo. Atijamit nawoolomi ésukey yáamakey yati Babilon yákalaami ban nakaanuyomi man eraan kápurumul di éraanumaay yoola yameeŋenimi di kañuumulak koola. 20Fúrink fanoosani di fújim meej, hani fúlankiin fateboe leefuŋoolen fujuki. 21Di bajumi kalub kati bataala báamak, ban kálebiak kooliko kúriiŋe síkilo bukan kugaba di uñen, búloumumi títi bukanak kanumimi Atijamit mati búyiikab bati bataalaab ube, mati búyiik bákoolenie máamak.

will be added

X\