KAMANJENAK 15

1Nijukumi fúmanjum fuceen fáamak di fatiya, foo fúkalaakalaa ban fúrindiiŋ síwoonoor. Di bajumi simaleeka sooni futok di sigaba saaken úsumut wooni futok di ugaba, wan eenomi úlamukaw. Mati woo eenomi fúmanjumaf fúlamukaaf fati Atijamit. 2Nijukumi waanomi nan fal fati siweer sátiene sanaamoore di sambun. Ñaa buku kaŋoolenumi énukuruŋey yákooleniaay, di ebaŋootey yooliyo, di eciikey epinaay yati kareesak kooliyo, man kujuume kupano di falaf fati siweer man kookene sisuusaas sati Atijamit. 3Man kulakoeene écim kácimak kati Muusa, arokaau ati Atijamit, di kácimak kati Jisahaaj, “Wóoy au Akiiyaau Atijamit ati Kánkum! Mukaanai múkalaakalaa ban múrindiiŋ síwoonoor máamak, Wóoy au, Áyi ati bándoorey! wanoosani wan ukaanemi ujonjoon ban di ulegeno. 4Wóoy Akiiyaau, ai aatut kákoli ban nálebien kareesak kooli? Mati au ceb úliroorumi. Mofam búrom moote ebil man mumiiceelaeti, mati mukaanai majoonaam múyiiseniyiisen.” 5Mo’omu múpurutomi, nilaañumi ijuk fukobaf fáñiiaaf fammi di bukinab bajakaab, foo eenomi Éguutey Yálirooraay yati Atijamit, man fúwambuloe! 6Simaleekaas sooni futokey di sigabaas saakumi úyiikaw wooni futokey di ugabaaw sípurulomi di fukobaf fáñiiaaf fukila. Bakaanoerab wañ wafiite nañ ban di sikaren úsususo úmarufa wati sáni. 7Ñaa wákon di waroŋaaw watuukimi ubakiiraw di usenumi simaleekaas futokey di sigabaas sibiin sati sáni sooni futok di sigaba sameeŋe di kañuumulak kati Atijamit, aroŋumi bee bándoorey. 8Fukobaf fáñiiaaf di fúrimi túk di fakooraf kápurumul di mawuŋam mati Atijamit di kápurumul di mákalaam moola. An aŋoolenut anoken di fukobaf fáñiiaaf bee nan úyiikaw wooni futokey di ugabaaw wati simaleekaas sooni futokey di sigabaas uwuujumi.

will be added

X\