KAMANJENAK 13

1Ínje nijukumi waaf nan sáaut énukuruŋ yákoolenie man épurulomi fús di falaf fáamakaf. Man yooke kúkaak futok di kugaba, di usiin wooni uñen, di wompoŋ wooni uñen wati jáyiaj waloopimi di usiinaw wooliyo, ban di fúkaaf fanoosani ciikiciik karees káñiie mati Atijamit. 2Énukuruŋey ekila yan ijukumi yoonoyoono nan esaama, bare úkamunuyo woonowoono nápaj nan wati tímba, butumuyo boonoboono nan bati jimukoor. Eyelaay yajuudiitimi di esenumi kánkumak kooliyo, di ejunkutey yooliyo yati jáyiaj, di fujuumaf fooliyo bee di énukuruŋey ekila. 3Fúko fákon fati kúkaak kooliyo fubabaj musont mampi maŋoolen mubujuyo, bare iñeme di mukoyumi. Kati dúniyaay búrom di wáaloiimi man kuriibenuyomi. 4Bukanak di kumiiceelaetumi eyelaay yajuudiitimi, mati man esenumi énukuruŋey uyu fujuumaf fooliyo. Bukanak kulaañumi kumiiceelaet énukuruŋey poop, eceeŋey di yóro mati, “Ai anokoore nan énukuruŋey uye? Ai aŋoolene atiikenuyo?” 5Énukuruŋey uyu esenisen buruŋ man esanken máamak kurim káñiie máamak mati Atijamit. Esenisen buruŋ di fujuum wanoosani wan emaŋumi bee ekaaney wáriiŋe muleeŋ mooni bukan kugaba di mugaba. 6Di etooŋumi kásaabul man esanken kurim káñiie máamak mati Atijamit, di kareesak kooliyo, di ban acinumi, di kácindomi búrom di bukinab bajakaab. 7Esenisen kánkum kati katiiken bukanak kati Atijamit ban di eŋooleniil. Di esenimi buruŋ bee di fiiloofiil, bukanoobukan, kasankenookasanken di mofoomof. 8Bukanak búrom kacinumi di dúniyaay uye pankumiiceelaet énukuruŋey ekila, buku búrom kan ureesiil uciikutimi di búkaay yati eroŋey yati Jisahaaj járaamulimi bala’a butuukab bati dúniyaay.” 9Anoosani abajumi uwos újamuma, najam! 10Ampi Atijamit ammi panasofi oo panasofi, koo koote esofi kújeetummi. Ampi Atijamit ammi panabuji di jilibaaj jabakaaj oo panabuji di jo Mo’omu eenomi bukanak kati Atijamit koote kamuuten di ekaan bukan kufiumaay. 11Nijukumi énukuruŋ yiceen man épurulo fús di tentaamey. Ebabaj usiin ugaba waanoe nan wati jisaha bare di esankenumi nan eyela yajuudiitimi. 12Di eŋarumi fujuumaf fati énukuruŋey yátiyaaraay di bújonlenab booliyo, ban di éjaatikenumi bukanak kati dúniyaay man kumiiceelaet énukuruŋey étiyaaraay, yan musontam mooliyo mukoyeenimi. 13Énukuruŋey egabunteney ekammi wajamurerutimi wajuupoe, di ekaanumi biyok sambun síwaloul fatiya bee di dúniyaay di fáculey yati bukanak búrom. 14Énukuruŋey egabunteney di ebuntumi bukanak kati dúniyaay búrom ñátum di ekaaney yati wajamurerutimi di fáculey yati énukuruŋey étiyaaraay. Emingenumi bukanak kati dúniyaay man kujoonen ebaŋoot siyesoor di énukuruŋey étiyaaraay yábukeneenimi ñátum di jilibaaj bare ecetut. 15Énukuruŋey egabunteney esenisen buruŋ man éfuuten fuyiif bee di ebaŋootey yati énukuruŋey étiyaaraay man eŋoolen esanken. Ebaŋootey di eregumi ampi alatumi bee amiiceelaetumi oo naate ebuji. 16Énukuruŋey ekila emingenumi bukanak búrom, añiil anifaan, kabajumi di kabajutumi, kumiiceel di kakaanutumi kumiiceel, man kubaj fúmanjum di uñeniil úridaw mba di kúriiŋiil. 17Takumbi an aŋoolen anoom mba anoomen leejaat nababaj fúmanjumaf fati énukuruŋey yo’oyu, kareesak ko’oku mba eciikey epinaay. 18Mambi an álaul mo’ome cenceeŋ ebaj malinlo. Ampi abajumi kálaulak naate kálaul wan eciikey epinaay efelumi yati énukuruŋey ekila, mati epinaay éyiisenyiisen kareesak kati an. Koo eenomi siceme futok di yákon bukan kúfeegiir di futok di yákon bee mati an (666).

will be added

X\