KAMANJENAK 12

1Ínje nijujuk fúmanjum fáamak farajulomi di fatiya, aseek agaayoore bala’ab ban najummi di fuleeŋaf. Naloopimi bompoŋ babajumi soot uñen di sigaba. 2Man aakene búrooko, ban nacibulomi fatiya di jariey nan alakomi kawalen búrooko. 3Fúmanjum fuceen furajulomi di fatiya. Jíyenten, eyela yajuudiitimi yáamak yáyeme, yati kúkaak futok di kugaba di usiin uñen, di fúkaaf fooliyo fanoofani baloopene bompoŋ bati jáyi. 4Fúlojaf fooliyo di fuñakumi bucaab bákon di ucaabaw úfeegiiraw wati bootab bammi di kátula, ebetulomi bee di dúniyaay. Eyelaay yajuudiitimi di ejuum di fáculey yati aseekau oo aje’emi bee ebaj añiilau, mambi emer jiñiilaj joo di ewoliey tac. 5Aseekau nabilumi aroŋ jiñiil jíniine jaatumi bee erung mofam búrom mati dúniyaay ñátum egol yati mulap. Bare jiñiilaj joola di jiyalenimi fak di jíjeetumimi bee di Atijamit di ejunkutey yoola yati jáyiaj. 6Aseekau nateyumi bee di baŋaanab, tan Atijamit ajonjoorumi bee mati akila, tan aatumi kacookooriak wáriiŋe kunak éwili yákon di siceme sigaba di bukan kúfeegiir. 7Di bajumi futiik dóo di bukinab bajakaab. Mikael oo di simaleekaool di sitiikenumi eyelaay yajuudiitimi, yoo di simaleekaas sooliyo di sigalenumi. 8Bare eyelaay yajuudiitimi di eŋoolenimi di futiik fukila, yoo di simaleekaas sooliyo búrom sicesoorimi sípur jáng di bukinab bajakaab. 9Eyelaay yajuudiitimi di ébetulimi tentaamey, yoo eenomi eyelaay yáamakey yati naaniŋ yawonkeimi, Bágun di poop Seetaanaay, yabuntemi dúniyaay, yaleebimi bee di dúniyaay di simaleekaas sooliyo. 10Nijanjam furimaf facibuloe di bukinab bajakaab man foone, “Iñeme kapakenak kati Atijamit kúriiŋuloriiŋ! Atijamit náyiisenyiisen kánkumool nan Áyi. Apakenaool náyiisenyiisen fujuumool! Mati Seetaanaay yakammi ataakenaau ati bukanolaal di fáculey yati Atijamit fuk di balay, iñeme ébetulibet. 11Bukanolaal kuŋoolenuyomi mati fúsimaf fati Jisahaaj di mati káyiisenak kooliil, ban kúkoliut ecetey. 12Jimaayoor, wóoy bukinab bajakaab! Muyuul búrom kácindomi, jimaayoor! Bare búyiikab bulako di dúniyaay di falaf fáamakaf, mati Seetaanay ébetulibet bee di dúniyaay! Emammanj mati nanan nooliyo níloiut ban eñuumuñuumul máamak.” 13Nan eyelaay yajuudiitimi ejukumi mati ébetulibet bee baabe di dúniyaay, di esofumi kacesoorak kati aseekau aroŋumi jiñiilaj jíniinaaj. 14Bare aseekau nasenimi ulegaaw ugaba wati bíibiey yáamakey manteer mbi aŋoolen áyit apak di eyelaay yajuudiitimi uyu bee di baŋaanab, tan tikila naate kacookoori wáriiŋe simit sífeegiir di bútingum, takum yoo ébukenool. 15Eyelaay yajuudiitimi épuulenumi mumelam nan fal mambi mújeetumool taac. 16Bare yentaamey di erambenumi aseekau ume. Yoo di ejisomi wáj man emer mumelam mati falaf ufu búrom mápurulomi di eyelaay yajuudiitimi. 17Eyelaay yajuudiitimi di efuuñetumi di aseekau, man elaañumi bee katiiken kuñoolool, kasofumi kájaatikenak kati Atijamit ban di kukaan kúyiisenaak kati Yensa. 18Eyelaay ekila di ejummi ekoben di kásikak.

will be added

X\