KAMANJENAK 11

1Niyabumi egol éliikuma, ban di koonammi, “Yito man ujaw uliik fukobaf fáñiiaaf fati Atijamit di fúsimenaf, ban nupin bukanak kándomi kamiiceelaetumi dó. 2Bare takum uliik fankaf fammi téeŋeraay yati fukobaf fáñiiaaf, mati fusenisen bee di kamanjutumi Atijamit. Pankutampoor ésukey yáamakey yálirooraay wáriiŋe muleeŋ bukan kugaba di mugaba. 3Pániboñul kúyiisenaom kugabaak, kakaanoe wañaw wati kurookal man kumanjen di kánkum wáriiŋe kunak éwili yákon di siceme sigaba di bukan kúfeegiir.” 4Buku kúyiisenaom kugabaak eenomi úbaaraw Uwoliiwaw ugabaaw di újuumenumaaw wati síwuŋenumaas sigabaas woo ujuumeimi di bújonlenab bati Akiiyaau ati dúniyaay búrom. 5Ampi ágaloore bee kábukeniil, sambunas sípureupur di utumaw wooliil man simer kulatooriil. Mo’ome moo ampi ágaloore bee kábukeniil aate ecet. 6Kubabaj kánkum kati man kuwamben fatiya, takumbi emitey elub káfiren kalubak di kunakak kati kamanjenak. Kubabaj kánkum kati káruŋul mumelam mulaañ fúsim, ban di kubaj kánkum kati éŋarul kásumut kanoosani nanoosani nan súumiimi. 7Nan kubanumi káyiisenak kooliil, énukuruŋey yákooleniaay yaatumi épuruley di busunab básankimi babajutumi tan búkabe pambieŋooleniil ban di ebujiil. 8Ban wiiŋiil pánwoomi bafintoe di buruŋab bati ésukey yáamakey, ésukey ekila karees kúgunenuma kan koonemi Sodom mba Misira, ésukey yan Akiiyaiil afaaŋeneenimi di ébaarey yati búpinab. 9Wáriiŋe kunak kúfeegiir di bútingum, bukanak búrom, fiiloofiil, kasankenookasanken, ban mofoomof koote ebil kujuum man kujiker wiiŋiil. An letabaj buruŋ man afokiil. 10Bukanak kati dúniyaay pánsuumiil mati ecetey yati buku kugabaak. Pankukaan karuukenak, ban di kukaan káaning man kusenoor muwula, mati kuboñaak kugabaak kalakoeenumi kásuutukeniil. 11Bare kunak kúfeegiir di bútingum nan kubanumi, fuyiif fasenemi eroŋey fápurumulomi di Atijamit man funokeniil, ban di kuyitomi kujuum jaj. Ban anoosani ajukiimi yaaley yoola di ejisumi cúj. 12Ñaa kuboñaak kugabaak di kujammi furim facibuloe fápurumulo di bukinab bajakaab man foone, “Jíremboorul taate!” Di fáculaf fati kulatooriil, di kuremboorumi bee di bukinab bajakaab di furola. 13No’onu di bajumi káliliŋenoor kati yentaamey káamak, bucaab bákon di ucaabaw uñeney wati ésukey yáamakey di bulomi wúp bukaño. Bukanak kooni síwili futok di sigaba di kucetumi di káliliŋenoorak kati yentaamey. Kapakumi saalas sooliil di sijisumi máamak ban di kusal wan úyegetiil ufelumi mati mákalaam mati Atijamit ati bukinab bajakaab. 14Búyiikab bugabuntenab buwuwuuj. Jíyenten, búyiikab búfeegintenab bábileuumi iñemeeñeme. 15Maleekaay etokeney di egabunteney di elitumi kábiilak kooliyo. Di bajumi furim fateboe di bukinab bajakaab, man foone, “Jáyiaj jati dúniyaay jibilumi jikaan jáyiaj jati Akiiyaolaal di jati Apakenaau Áamakau oola, ban naate erung bee bándoorey.” 16Ban kunifaanak kabananey di kubakiirak, kalakoemi di sijunkutiil sati jáyiaj di bújonlenab bati Atijamit di kulomi kúfima kuyahumi wuuliil tentaam man kumiiceelaetumi Atijamit, 17di aaney, “Wúli kooku bo esali, Akiiyaau Atijamit ati Kánkum, ati iñeme di ati noo, mati nuŋaŋŋar kánkumi káamakak ban nutontooŋ bee erung. 18Bukanak kamanjutumi Atijamit kuñuumuñuumul di au, bare iñeme nanan nooli nati kañuumulak níriiŋuloriiŋ, nanan nati kagamenak kacetumi di nati ecaamey kurokai. Panucaam kuboñai di bukani, ban kákolimi kareesi, añiil anifaan, ban panukajen kukajenaak kati dúniyaay. 19Ñaa fukobaf fáñiiaaf fati Atijamit fammi di bukinab bajakaab di fúwambulimi, ban jiceesaj jati kasofoorak dóo di fukobaf fáñiiaaf foola. Di bajumi kálint kírititi kírititi di ñofen di liboor wij wij, ban káliliŋenoor kati yentaam, di bataala báamak di búloumumi.

will be added

X\