KAMANJENAK 10

1Nilaañumi ijuk maleeka yiceen yati kánkum káamak di éwaloul di bukinab bajakaab. Furola fuguubeneyo, ban funaabaf foom di fúkaaf fooliyo, buuluyo nan bala’ab, ban úkamunuyo nan sísaguma sati sambun. 2Man yooke jayit jáfetuli di kañenuyo. Kákamunuyo kúridak kooku man ejuumene di falaf fáamakaf, kaaku téeŋey, 3ban di ewonkumi cibulo nan búciiŋit bati jimukoor. Nan ecibulomi upajaaw futokey di ugabaaw di uyabumi man úlint. 4Nan upajaaw futokey di ugabaaw uyabumi uban, nan ilakomi bee eciikey ceb, bare nijammi furim kápurumul di bukinab bajakaab man foone, “Sof butumi takum ureg an wan upajaaw futokey di ugabaaw uregimi, ban takum poop uciikuwo.” 5Maleekaay yan ijukumi bajuumerab di falaf fáamakaf di téeŋey, di etebenumi kañenuyo kúridak bee fatiya. 6Ban ebaat kabaat di kareesak kati Atijamit, aroŋumi bee bándoorey, atuukumi dúniyaay, di bukinab bajakaab, di falaf fáamakaf, wanoosani wándomi búrom. Maleekaay yoone, “Waaf úje’eriit bee ekobi! 7Bare nampi maleekaay etokeney di egabunteney elitumi kábiilak kooliyo, wayofoaaw wan Atijamit asofeenumi di búyegetool pánuliroor, nan man áligeenumi kurokaool kan eenomi kuboñaak. 8Ñaa furimaf fan ijameenumi kápurumul di bukinab bajakaab di fulaañ fusankenom foone, “Jaw, yab jayitaj jáfetulimi di kañenak kati maleekaay yammi bajuumene kákamun kaaku di falaf, kaaku téeŋey.” 9Nijajaw bee di maleekaay man ireguyomi esenom jayitaj jabooñimi. Yoo di yoonammi, “Yab utokoñ pántali di fari, bare di butumi pánsuum nan múkum.” 10Niyabumi jayitaj jabooñimi di kañenak kati maleekaay itokoñ. Di súmmi nan múkum di butumom, bare nan imerumi di bilumi táli di farom. 11Ban nijammi mo’ome, “Noote káriiŋen inki kamanjen mati wábileuumi bee di bukan kajuupoe, di mof majuupoe, di usanken wajuupoe, di kúyi kajuupoe.”

will be added

X\