FILEMON 1

1Ínje Paul, akulimi mati Yensa Apakenaau Áamakau, eem di eciik letaraay uye kanaamoor di atiolaal ariiba Timoti. Eciikiciik bee di Filemon arokoorolaal 2di Afia áliinolaal ariiba di Arukipo apaalolaal atiika, di fujojaf fammi di eluupi. 3Emitey ekaan Atijamit Ampaolaal di Akiiyaau Yensa Apakenaau Áamakau kuwuluul majakam di kásuumaayak kooliil. 4Nisasal Atijamit úmboom nanoosani niwoolomi au, Filemon di kúlawak kúmboom. 5Mati ínje karulen di ejamey kafiumak kooli di Akiiyaau Yensa di kamaŋak kooli bee mati bukanak búrom kati Atijamit. 6Nilawilaw nan man unaamooraami kafiumak kooli nan kuriibaak, mbi kúŋaruluul kálaulak káamak kati kawulak kanoosani kan ubajaami di Apakenaau Áamakau. 7Kútiom, kamaŋak kooluul kújeetumulojeetum bee di ínje kamaayoor káamak di eñab búsusom. Sísigiras sati bukanak kati Atijamit siunkuleniunkulen kápurumul di muyuul. 8Mati mo’omu manteer nibaj kapeeto di Akiiyaau man iŋoolen ireguul wan ceeŋumi man ukaani. 9Bare mati nimaŋuumaŋ, ínje nifaŋ man ilawuul máamak—Ínje Paul, aboña ban iñeme kukulankul poop mati Yensa Apakenaau Áamakau. 10Nilawilaw máamak mati Onesimo, akila nakankaan añoolom. Ínje ibilumi ikaan ampaool nan ilakomi dán bukanak kukuleimi. 11(Noo abajut fúkaw bee di au, bare iñeme nababaj fúkaw bee di au di ínje.) 12Ínje oomu di kalaañenool bee di au, an eenomi ésigirom. 13Pánsuumeenom man alakoeen di ínje, mambi arokeenom ñátum di bálamukab booli, nan emmiñaa bakulerab mati furimaf fajakaaf. 14Bare letikaan waaf au basenutom buruŋ. Ban imaŋut urambenom mati bamingene, bare mati numammaŋ ekammo. 15Timaa wakilumi man Onesimo atey nanan nátemie, mambi uŋoolen ubajool bee nanoosani. 16Iñeme letakaander amiiceel ceb, bare panawuuj amiiceel. Akila nakankaan nan atiom ariiba an ifaŋe man imaŋe. Bare au faŋe ínje, nan amiiceel di poop nan ariiba di Akiiyaau. 17Jisofanjaat ínje nan arokoori, walenool jak nan man uwalenomi eeno. 18Akajenjaat di au, mba naaken waafi, regom butum buu noo’ooraale di au. 19Ínje, Paul, iciiki uwe ñátum di kañenom, panigaleni—takum oone waafi neeke hani yuuti. 20Éey, atiom, bonket man urambenom uwe ñátum di bálamukab bati Apakenaau Áamakau. Unkulen ésigirom di Apakenaau Áamakau. 21Ínje nibabaj fúgolum, nan ilakomi eciikuuley letaraay uye, mati panjikaan wan ilawuumi, malegen panjikaan wuuj wan iregumi. 22No’onu nákonan, mbi ucookoor kalimbis kati kujaaburuŋ bee mati ínje, mati nígolungolum mati Atijamit panayiiŋ kúlawak kooli man ílaañul bee di muyuul galab. 23Epafura, apaalom an kúkuloorolimi mati Apakenaau Áamakau Yensa, násaafuli, 24ban poop bee di kurokoorom kan eenomi Maruk, Arisitariko, Demas di Luuk. 25Emitey ekaan majakam mati Akiiyaau Yensa Apakenaau Áamakau móomi di muyuul.

will be added

X\