FILIPO 4

1Kutiom, muyuul bukan kan imaŋumi ban niraanouuraano máamak. Muyuul eenomi kásuumaak kúmboom ban nitebeneteben ubandom mati muyuul, ncaa súm mo’omu jootumi ejuume líŋ di Akiiyaau. 2Eudia di Suntuke, man ilawuul máamak man jijamoor jak. 3Ban au arokoorom afiumaay, ínje ilawi poop mbi uramben kuseekak buku mati kujunjuum lit di ínje burokab bati kafetenak furimaf fajakaaf, koo di Kulement di kurokoorom bukaaku búrom, kan ureesiil wommi baciikerab di búkaay yati karoŋumi. 4Jimaayoor nanoosani di Akiiyaau! Panilaañ isanken, súumuul. 5Jíyiisen kamuutenak kooluul bee di anoosani. Akiiyaau ebiley yoola elolof. 6Takumbi úyegetuul ubaj bugaal di wanoowani, bare di kúlawak kooluul ninsi jilaw Atijamit wan jiceeŋumi, mbi ihi jilaañen kasalak di wan akaanumi. 7Jikammojaat, kásuumaayak kati Atijamit, kafaŋumi síwoonooras sati anau. Pankupooy sísigiruul di úyegetuul nan man jiroŋumi di Apakenaau Áamakau Yensa. 8Di fúwuŋenaf, kutiom, jijuumen úyegetuul di uwe búrom walegen, wálebien, wajoone, wátiene, wajooŋoore, wajake, waatumi bee esali. Jiwoonoor mati wáliroore di wabaje fúkaw ban di úriiŋ esal. 9Jikaan wan jiliikenumi di ínje di wan jijamammi ban jijukammi nikaan. Atijamit ati kásuumaay mbi áami di muyuul. 10Ínje oomu di kamaayoor máamak di Akiiyaau mati inki jilaañenulolaañen fujuumaf fooluul bee di ínje. Malegen, kabiñoo noo jijuumanjuum, bare jibajeenut buruŋ bee káyiisenom mo. 11Ínje ilet di ereguul uru mati waaf nimaŋeene, mati ínje niliikenliiken fúko’om man ire di wan ibajumi. 12Ínje nimammanj waa eenomi kalako kañen kútiikaar, ban poop kaaken wafaŋumi man ujuupoe. Niliikenliiken di wayofomi wati eroŋ yanoosani, manteer bacaar báamak mba fupooñ, di poop ebajey juup mba ebajey jayiinkun. 13Paniŋoolen ikaan wanoosani kápurumul di oo áliŋeneammi. 14Bare hani moo, jikankaan jak kanaamoor di ínje di bugaalab búmboom. 15Muyuul kati Filipo di kúkouul jimanjooromanjooro nan ípurumulomi Makedonia bee di kapakenak uke di mútiyaaram, bajut fujoj fuceen fañuuraam bágodi man furamben rino muyuul, ñátum di eseney mba eyabey kawulak. 16Handeneen nan ilakoeenumi Tesalonika, di jirambenammi dihi jíboñulomi kawul wuuj ñákon. 17Kaanut nan kawulak ceb nimaŋe di muyuul, bare wan ifaŋumi man imaŋe man búrembenab booluul man bubeneno di wan jiyofumi. 18Niyayab wanoosani wan ceeŋumi, ban juupo juupo wuuj élingaay. Epafurodit náriiŋenanriiŋen kawulak kan jisenammi bajut walee to. Kawulak kukila kukankaan nan kawulak kabajumi kaputak kásuume kan useneimi bee di Atijamit. Di kaan búsimen ban Atijamit asofe ban búsuumoosuum. 19Atijamit úmboom panasenuul wanoowani wan jiceeŋumi riiboor di kawulak koola káriiŋumi síwoonoor, kápurumul di Apakenaau Áamakau Yensa. 20Wulaal ootaale esal di kálebien Atijamit Ampaolaal. Amen. 21Jisaafom anoosani ati Atijamit ammi di Apakenaau Áamakau Yensa. Kutiaak kammi di ínje taate kusenuusen usaafaw wooliil. 22Bukanak kati Atijamit búrom kusaafuusaaf, ban kafaŋumi man kusaafe koo eenomi kammi di bajamab bati Áyiau Áamakau. 23Emitey ekaan Atijamit asenuul majakam mati Akiiyaau Yensa Apakenaau Áamakau móomi di muyuul búrom.

will be added

X\