FILIPO 2

1Kaanjaat babaj káliŋen di Apakenaau Áamakau, kamaŋak koola kufintenfinten úyegetuul, bapaalaay di Búyegetab Bátienaab, ban di jibaj kajinlenak di kábotenioor titooruul. 2Kama jikaan man súumom máamak. Jilako di kajamoor di úyeget wákon di káyiisenak kati kamaŋ kákon. Di ekaan bukan kákon di úyeget wákon. 3Takum jiwoonoor mati kúkouul ceb mba kágabalenoor, bare kawalenoorak di esofey bukaaku kóyume kúkouul. 4Takum jiwoonoor mooluul ceb bare jiwoonoor bukaaku poop wan kukammi. 5Jibaj úyeget walegen titooruul, nan bati Apakenaau Áamakau Yensa. 6Handeneen nababaj búyesoorab bati Atijamit nanoosani, bare asofut amingen fúko’ool are’e di Atijamit. 7Bare oo di fúko’ool asofoorout oo waaf, ban naŋar fujuum fati aroka, nawolimi nan búyesoorab bati anau. 8Di búyesoorab bati anau, nawalenooromi, ban nakobumi manteer bee mo di ecetey, hani ecetey yoola di ébaarey yati búpinab. 9Mo’omu mukilumi, Atijamit natebenoomi máamak fatiya ban nabetool karees kafaŋumi man kuteboe ureesaw waawu búrom. 10Ñaa moo, di kánkumak kati kareesak kati Yensa fújuul fanoosani pánfukuntaajen, ammi di bukinab bajakaab, ammi baabe di dúniyaay uye, ammi di dúniyaay yaayu yammi di síndeneey yati tentaamenaay, 11ban fúredimpaf fanoosani panfureg wan búyegetab bufelumi mati Yensa Apakenaau Áamakau eenomi Akiiyaau, pánkuyiisen kálebienak bee di Atijamit Ampaau. 12Moo kaane, kutiom kuriiba kati búsusom, nan mansi jíkaanumumi furimaf fúmboom noo eeno nan ilakomi di muyuul. Ban iñeme ínje balee bo ñaa jifaŋ man jíkaanume di mo. Jirok bee mati epakey yooluul ñátum di kákoli di kaleleben. 13Mati Atijamit oomu di burok di muyuul, mansi asenuul emaŋey man ajamool di poop kánkum man jikaan wayeoomi. 14Jikaan wanoosani búrom bákuulujut mba kasanken muloba, 15mbi jíbajaati kabet ban di jítien, nan kuñiilak kálirooraak kati Atijamit, kan jilakomi titoorey yati bukan kajoonutumi di kájakaatimi. Muyuul joote karaagal man eroŋey yooluul ewuŋen titoorey yati bukanak kati dúniyaay uye. 16Joote eŋoon líŋ furimaf fati eroŋey, nampi Apakenaau Áamakau alaañumi manteer mbi iteben ubandom mati iteyut mba irokut ñaañaaña. 17Bare handeneen fúsimom foote káyuo nan kawul man íliren búsimenab bati burokab bati kafiumak kooluul. Ínje súumansuum ban panimaayoor di muyuul búrom. 18Moo mákonam, muyuul joote ésuumuul ban di jimaayoor di ínje. 19Nígolungolum di Akiiyaau Yensa bee éboñuluul Timoti iñemeeñeme, manteer naregomi wabajomi di muyuul mbi ibaj éliŋ yati búyeget. 20Ínje ibajut an aanoe nan Timoti, ampi aŋoolen acookooruul jak nan akila man akaanemi. 21Bukaaku búrom kooku di síwoonoor sati kúkoiil, lee sati Yensa Apakenaau Áamakau. 22Bare Timoti jimanjoomanj an ámanum. Oo di ínje noonosoono nan añiilau di ampaool, nurokoorerokoor káriiŋenak kati furimaf fajakaaf. 23Moo kaane ínje nígolungolum man íboñuluulool, nampi ijukumi buu eete ejaw eeno. 24Ban nifiunfium di Akiiyaau mati ínje di fúko’om eete ebil poop. 25Nisosof cenceeŋ man íboñuluul Epafurodit oo atiom ariiba alegen, arokoorom, ban poop apaalom atiika, an muyuul jíboñuloomi bee karambenom. 26Iñeme naraanouuraano máamak. Búyegetool bugagaal, mati ejamuul bújuusaool. 27Malegen naloeenlo bújuusa, manteer jaheemeen panaceteen. Bare Atijamit nabajumi káboteniak di akila, asenut akila ceb bare bee di ínje poop, takum ibaj kásuumaati bee di kásuumaati. 28Moo kaane ínje nifaŋ man imaŋe noo bee éboñuluul Epafurodit inki. Pánsuumuul nampi jijukoomi inki, ban ínje leekaanom síwoonoor. 29Jiwalenool jak di kásuumaak káamak, nan atiom ariiba di Akiiyaau. Jítienuul man jílebien bukan nan akila. 30Mati síñunduool nanennen to mati burokab bati Apakenaau Áamakau, ban jaheemeen panaceteen esenomey yati karambenak kan muyuul kúkouul jiŋoolenut jisenom.

will be added

X\