FILIPO 1

1Ínje Paul, di Timoti, wúli kuroka kati Yensa Apakenaau Áamakau, ommi di eciik letaraay uye. Eciikiciik bee di bukanak kati Atijamit búrom, kafiummi di Apakenaau Áamakau Yensa kammi di ésukey yati Filipo, bee di kunifaan káamak di kurambena. 2Emitey ekaan Atijamit Ampaolaal di Akiiyaolaal Yensa Apakenaau Áamakau kuwuluul majakam di kásuumaayak kooliil di úyegetuul. 3Nisaleuusal Atijamit úmboom nanoosani nampi búyegetom bugoruumi, 4ban nanoosani nemmi di elawey bee mati muyuul búromuul, kúlawak kúmboom kukaaneankaan kásuumaay, 5mati man jijuumammi fat eeno di burokab bati káriiŋenak kati furimaf fajakaaf kabiñoo di funakaf futooŋandaf fan jíyinenumi bee mo jaat. 6Tíenantien mati Atijamit, ácitumi burok bajake ube di muyuul, pánariiŋenubo bee nan funakaf fati Yensa Apakenaau Áamakau fúriiŋumi. 7Muyuul bukooku di ésigirom nanoosani! Moo beemi senansen buruŋ man ikaan mo’omu bee di muyuul. Mati nunaamooraanaamoor majakam man Atijamit asenammi, moo eenomi nan ínje ilakomi dán bukanak kukuleimi di poop nan ípurulotomi, nilako káliŋen mati malegenam ban níriiŋen bukaaku furimaf fajakaaf. 8Atijamit cebool amanje malegenam man isankenumiñaa, nimaŋuumaŋ ban niraanouul máamak nan man Apakenaau Áamakau Yensa akammi di muyuul eeno. 9Kúlawak kúmboom koo eenomi mati kamaŋak kooluul mbi kufaŋ man kubenenoe, di poop panjimanj tíen ban di jílaul, 10mambi jiŋoolen jimuken bagoroorerab bafaŋumi man bujake. Moo panjipak di majakutam ban di jíliroor ban babajut kabet di funakaf fati Apakenaau Áamakau. 11Eroŋey yooluul mbi emeeŋ di ekaaney bagoroorer bajake bápurumeuumi di Yensa Apakenaau Áamakau. Mo’omu mújeetumulomi kálebienak di kasalak bee di Atijamit. 12Kutiom, ínje nimammaŋ man jimanj, mati wabajammi woo urambenammi man iŋoolen ifeten furimaf fajakaaf. 13Moo kammi, kutiikaak kupooyaak kati Kúroomanak di bukaaku kammi taate búrom kumammanj mati bakulerab búmboom boo mati ínje aroka ati Apakenaau Áamakau. 14Mati bakuleromab, moo mukammi kutiyaay kuriibaak kajuupoe kufaŋ man kubaje fúgolum di Akiiyaau, ban di kufaŋ man kurege bukaaku mati furimaf fati Atijamit bákoliut. 15Malegen bukaaku di bukoo kammi di káriiŋen mati Apakenaau Áamakau ñátum búlatoor di kabotoor, bare bukaaku ñátum di úyegetiil wátiene. 16Buku kúlamukaak kamaŋak kooliil kúrudiil dó. Mati kumammanj mati ínje tan emmi too nemmi bee káliŋen furimaf fajakaaf. 17Bare buku kutooŋandak di kulakomi káriiŋen mati Apakenaau Áamakau kápurumul wan kumaŋumi bee di kúkoiil, ban ríiŋut úyegetiil. Kumammaŋ man bugaalab búmboom bubeneno nan ilakomi dán bukanak kukuleimi. 18Bare kaanut waaf. Wabajumi fúkaw woo eenomi bukanak kúriiŋenriiŋen mati Apakenaau Áamakau manoomani, manteer kápurumul di úyegetiil wátiene mba walaene. Moo beemi panirulen di kamaayoor. 19Mati nimammanj fiit ñátum kúlawak kooluul sibenenoore di karambenak kápurumul di Búyegetab Bátienaab bati Yensa Apakenaau Áamakau, moo panipak. 20Babaj wan ifaŋumi man imaŋe di poop wan ígolume woo eenomi letipuñorer di wan ikammi. Iñeme panipeeto mambi íŋarul kálebienak bee mati Apakenaau Áamakau di eniiley yúmboom, manteer síñunduom pambisire to mba leebisireto. 21Mati ínje di fúko’om, ecetey ékoyumaam eroŋey. 22Irulenjaat di eroŋey yati dúniyaay uye, moo eenomi paniŋoolen ikaan burokab babaje fúkaw bee mati Apakenaau Áamakau. Ínje imanjut wei neete kamuken letiŋoolen ireg. 23Ure digaba digaalengaalen máamak di búyegetom. Daaru doone icet man ilaañ bee di Apakenaau Áamakau, doo panfaŋ man kóyumaam. 24Bare mati muyuul kóyumaam man iroŋ. 25Tíenantien mati mo’omu, ínje nimammanj mati panirulen di eroŋey. Panirulen di eroŋey di muyuul búrom manteer mbi iramben man jijaw fáculey di kásuumaak kati kafiumak kooluul. 26Nampi ílaañuumi bee di muyuul, panjifaŋ man jitebenelenoor mati wan Apakenaau Áamakau Yensa akaanammi. 27Wafaŋumi man ubaje fúkaw woo eenomi mukaanaam mati eroŋey yooliil moote ekaan nan man furimaf fajakaaf fati Apakenaau Áamakau fuceeŋuumi. Ñaa, manteer pambi’iŋoolen ibil bujukoor inki mba leebi’iŋoolen ibil, bare pambi’ijam mati muyuul jooju man jijuume líŋ di úyeget wákon, di emaŋ yákon di jitiik tákon bee mati epebey yati furimaf fajakaaf. 28Takumbi jimaŋ man kulatooruul kukoolenuul. Jikaanjaat mo’omu moo múyiisenumi bukoo mati pankukajeni, bare muyuul panjipak, hani Atijamit cebool di fúko’ool. 29Mati jisenisen kálebienak kúbutoaak mambi jirok bee mati Apakenaau Áamakau, lee di káyinenak ceb di oo, bare di bugaal bee mati oo. 30Wulaal panulakoaami di futiikaf ufe. Jijujuk ínje nilakoeenlako bugaal mati oo, ban jimammanj bee jaat ínje oomu di bugaalab.

will be added

X\