MATIU 9

1Yensa nájupomi di busaana nátipumi alaañ bee di ésukool. 2Bukan kuceen kutebuloteb bee di oo ániine abakoe bafintoe di silaakool. Nan Yensa ajukumi kafiumak kooliil, nammi ániinaau abakoaau, “Añoolom, beben búyegeti. Majakutam mooli mubonketibonket.” 3Kuliikitena kuceen kati sílingaas di koonooromi, “Tíj, ániinaau o’omu nasankene ñíi.” 4Yensa namanjumi wan kulakomi kawoonoorak di úyegetiil ban naceeŋiimi, “Wau kaane di joom di kawoonoor di úyegetuul jákaati mo’omuñaa? 5Wei ufaŋe man uhiilie man ireg ániinaau abakoaau mati majakutool mubonketibonket mba man iregool yito man ajaw? 6Bare ínje pániyiisuul mati Añiilau ati anau nababaj kánkum di dúniyaay man abonket majakutam mati bukanak.” Yensa nammi ániinaau abakoaau, “Yito, teb silaaki, ban nujaw bóot.” 7Ániinaau nayitomi ban najaw bóot. 8Nan jameeŋey ejukumi mo’omu, di kúkolimi. Di kulakomi esaley Atijamit mati man asenumi kánkumak kaanomi mo’omu bee mati bukanak. 9Nan Yensa alakomi ewuujey bo, nákambumi ániine an kuwonkemi Matiu di furokaf fati basaafab. Yensa naanoomi, “Riibenom.” Nayitomi man ariiboomi. 10Nan púrutomi jayiinkun, Yensa nalakomi furiaf di síndeey yati Matiu, kulaga basaaf kajuupoe di kasofutimi di waaf, di kuriibaool ró. 11Nan Kufarisaak kujukumi mo’omu, di kuceeŋumi kuriibaool, “Wau kaane aliikitenauul naam di furi dákon di kulaga basaaf di kasofutimi di waaf?” 12Nan Yensa ajamumomi, nalaañeniimi, “Bukan kájumi kuceeŋut asontena, bare káju’utumi ceb. 13Jijaw ban jiliiken di wan Atijamit ammi, ‘Nimammaŋ man jibaj kabonketak bee di bukaaku, kóyume ekaaney búsimenab bee di ínje.’ Mati ínje ijawulout bee ewonk bukanak kajoonaak, bare kasofutimi di waaf.” 14Funak fákon kuriibaak kuceenak kati Yaaya di kubilumi bee di Yensa man kuceeŋoomi, “Wau kaane wúli di Kufarisaak nukaanekaan balatab, bare kuriibai kúkaaneriitumo?” 15Yensa nalaañeniimi, “Mante panjiŋoolen jikaan man ati fuyabaf kupaalool súumaati’iil di nanan nan ati fuyabaf ammi di bukoo? Funakaf pánfuriiŋ, nampi ati fuyabaf aŋarimi di bukoo, ban ñaa pankukaan balatab. 16An átuutuleriit jipeket di kaloa kunkul man acik alook kéele, mati jipeketaj panjitutuulo di kéelaak, ban kajisak pankufaŋ man kúkalaae. 17An létawulen wayiney yunkul di ubaŋ wafanlene, akammojaat, wayiney pánepambenuwo ulee di wayiney, ulee di ubaŋaw. Bare pánawulen wayiney yunkul ubaŋ wunkul.” 18Nan Yensa alakomi kasankeniilak mo’omu, arunga nabilumi man ákuntaajenumi fáculool man ammi, “Ajaŋaau úmboom nacecet iñeme, bare ubonket ubil man uremben kañeni di oo, panaroŋ.” 19Ñaa Yensa di kuriibaool di kuyitomi man kujawoorumi di ániinaau. 20Aseek aceen too di bukoo, kásumut kati kañooak kátingoeriitumi nabaje, kásumutak kukila kooku di oo wáriiŋe simit uñen di sigaba, nájawumumi bálamuk Yensa, nálofulool man agorumi balisab bati kaloaool káamakak, 21naanooromi, “Igorujaat kaloaool káamakak ceb, panikoy.” 22Yensa nátiiwoorumi najukool ban naanoomi, “Añoolom, beben búyegeti! Kafiumak kooli kupakenipaken.” Yaŋ too galab nakokoy. 23Nan Yensa ajawumi bee di síndeey yati arungaau aceenau, nátookuromi kati kuyinlaak kalakomi elit, ban jameeŋ di elakomi kasuuŋut, 24nammi, “Jípur taate, mati jijaŋaaj jicetut, joo kamoor joom di ko.” Bare koo di kúluuoomi. 25Bare nan jameeŋey épurenimi bee téeŋey ceb, nanokenumi dán jijaŋaaj jommi tíasofulool kañenool, ban nayitomi alako tees. 26Mukaanaam mati mo’omu di muyiisoorumi nañ banoosani di upanaw ukila búrom. 27Nan Yensa alakomi ejaay, kúniine kugaba kápuume di kuriibenoomi man koom di kacibulo, “Añiilau ati Dauda, baj káboteni di wúli.” 28Nan agooŋumi di eluupey, kúniinaak kápuumaak di kubilumi bee di oo. Yensa naceeŋiimi, “Mante muyuul jíyinenyinen mati niŋooleŋŋoolen ikaan wan jimaŋumi?” Di kulaañenoomi, “Éey, Arungaau.” 29Yensa nagorumi kúciliil, di aaney, “Wan jifiumammi man ikaan panubajo.” 30Ñaa kúciliil di kúgaamulomi wasasas. Yensa nagamiimi mati takum kureg hani an ákon. 31Bare koo di kujawumi kuregenumi banoosani mukaanaam moola di upanaw ukila búrom. 32Nan Yensa di kuriibaool kulakomi ejaay buruŋiil, ániine an bágun booke bukaanool búnuŋa ájeetumimi bee di Yensa. 33Nan Yensa acesoorubomi, ániinaau o’omu nalaañumi asanken inki, ñaa bukanak búrom kalakotomi di wáaloiimi máamak man kommi, “Wúli ujukurerut jáng mukaanaay maanoe nan mo’omu di mofam mati Isirael.” 34Bare Kufarisaak di kommi, “Arungaau ati úgun asenoomi kánkum kati kacesoor.” 35Yensa ninsi nájawunjawum bee di sísukas sayiinkunas di sáamakas, mansi alakomi kaliikiten di kukobak kooliil di poop káriiŋeniil furimaf fajakaaf mati jáyiaj jati Atijamit. Ban poop ninsi nalakomi kasonten bukanak kan újuusa di úsumut wanoowani usofumi. 36Nan Yensa ajukumi jameeŋey, búyegetool di bumeeŋumi di káboteni bee di bukoo, mati koo kukankaan nan bukan kagaale máamak ban kuyetut kurambenooro nan sisaha sabajutumi amata man soonomi eeno. 37Yensa nammi kuriibaool, “Ejaley busereŋab ékalaakalaa, bare kujalaak kuyajut. 38Moo kaane jilaw Atijamit akilumi ejaley man abenenuul kujala bee di kalaakool.”

will be added

X\