MATIU 8

1Nan Yensa awaloulomi di fúlankiinaf, jameeŋ yati bukan di eriibenoomi. 2Yaŋ too galab ániine an kafaañ kusofe líip nabilumi bee di Yensa, nákuntaajenumi fáculool, di aaney, “Arungaau, umaŋujaat, panuŋoolen utilulom.” 3Yensa nañuurumi kañenool man agoroomi, di aaney, “Nimammaŋ, tilulo.” Yaŋ too galab kafaañak di kukatenoomi. 4Yensa naanoomi, “Yénten takum ureg hani an ákon. Bare jaw taac man úyiisen fúkoi bee di ásimenaau ati Atijamit man ámeeloi. Jéetum búsimen man ásimen nan man aboñaau Muusa aregumi man anoosani afium mati nutilulitilul ukoy.” 5Nan Yensa áriiŋumi di ésukey yati Kapaanaum, arunga ati kutiika Kúrooman nabilumi fácul Yensa man alawoomi, 6“Arungaau, arokaom oomu ró síndeey man afintoe, babakoe di bugaal báamak.” 7Yensa naanoomi, “Panibil man isontenool.” 8Bare arungaau ati kutiikaak Kúroomanak nalaañenoomi, “Arungaau, ínje íriiŋut man iwaleni síndo’om. Ubonket wéy, sanken ceb tan oomuñaa ban arokaom panakoy. 9Mati ínje di fúko’om poop oomu di kañenak kati furungaf fanifaanom, ban kutiika kuceen kooku di kañenom. Eenjaat ákon, ‘Jaw,’ najaw, eenjaat aamu, ‘Bil,’ nabil. Eenjaat amiiceelom, ‘Kaan uwe,’ nakaan.” 10Nan Yensa ajamoomi, di wáalo’oomi. Najonlenumi di jameeŋey yariiboomi, nammi, “Ínje eem di ereguul, ijukurerut an di Kúyahuudak kafium kákalaae mo’omu! 11Ínje eem di ereguul, mati kajuupoe pánkupurumul ban bala’ab búrabumemi di ban bújonumemi man kulako furi di Iburehima, Siyaaka di Yankuba di káaningak kati di jáyiaj jati bukinab bajakaab. 12Bare kan kootumi kalako di jáyiaj jati Atijamit koo pankubeteni téeŋey di érimey, to’otu too kootumi káciiŋit di katooñoor.” 13Yensa nammi arungaau ati kutiikaak Kúroomanak, “Laañ, wan úyinenumi panukaani.” Nanan no’onu, arokaool áju’uteenumi nakoyumi. 14Yensa najawumi bee di eluupey yati Peter, boo natookutomi Peter alolool anaaraau man afintoe di eniilool man ébolie. 15Bare nan Yensa agorumi kañenool, káboliak kati eniiley di kurooŋomi sii. Aseekau nayitomi galab man acookooroomi. 16Káliim kukila bukanak di kújeetumul kajuupoe kan úgun usofumi. Ñátum di furim ceb Yensa nacesoorumi úgunaw di bukoo ban nasontenumi káju’utumi búrom. 17Yensa nakankaan mo’omu mambi wan aboñaau Yesaaya aregeneenumi úliroor, “Oo di fúko’ool naŋarumi újuusaoli ban nápuren úsumutoli.” 18Nan Yensa ajukumi jameeŋey yáamak yaŋomenoomi, ñaa naregiimi kútip bee di kapan kaaku kati falaf fati Galili. 19Aliikitena aceen ati sílingaas nabilumi man aanoomi, “Aliikitenaau, paniriibeni banoosani nuje’e.” 20Bare Yensa nalaañenoomi, “Usiitil ubabaj usun dampi ucin, basuwa bubabaj wúul dampi bucin. Bare Añiilau ati anau abajut tan aate káyokulo.” 21Ariiba aceen naanoomi, “Arungaau, mutooŋandam kob man ilaañ bóot bee kafokak kati ampaom.” 22Bare Yensa naanoomi, “Riibenom, kat man kacetumi kufok kooliil kacetumi.” 23Yensa nájupomi di busaanaab, kuriibaool di kuriibenoomi. 24Yaŋ too galab, fárus fáamak di lonkos yáamak di siyitoulomi ñátum di kánkum di falaf, manteer busaanaab bumaŋ eyoom. Bare Yensa oo noo di kámoori. 25Kuriibaool di kujawoomi man kúyilool, di kucibulomi, “Arungaau, pákenoli! Wulaal bukooku bo ecet!” 26Yensa nalaañiimi, “Wau kaane man jíkoli? Muyuul kan kafiumak kutiitiñaa!” Nayitomi amakumi fárusaf di lonkosey, yaŋ too galab di siyinumi tem. 27Kuriibaool di wáaloiimi di kuceeŋooromi, “Kama, umu an aanoe buu? Hani fárusaf di lonkosey di siyiiŋool!” 28Nan Yensa di kuriibaool kútipumi bee di kapan kaaku kati falaf fati Galili di mofam mati Gadaren, di kúkamboorumi di kúniine kugaba kan úgun wooke, kaam di épuruley di fufokaf. An ákaañeneriit álamum di kapan kukila mati koo bukan kákoolenie. 29Yaŋ too galab di kucibuloorumi, “Wáay, Añiilau ati Atijamit! Waa butumi boom di wúli? Mante nujawulojaw taate bee kásuutukenoli bala’a funakaf fati bagamab fúriiŋ?” 30Di bajumi kamat kati sikumba salakomi kafoop lói jayiinkun di bukoo. 31Úgunaw di ulawoomi, “Kaanjaat au bee kácesooroli, bonket úkatoli man unoken di kamatak kati sikumbaas usa.” 32Yensa nareguwomi, “Jijaw!” Di úpurumi di kúniinaak ko’oku ban di unokenumi di kamatak kati sikumbaas. Yaŋ too galab kamatak kati sikumbaas búrom di kuteyumi bee di kayuuyak di kuwuuj kulo di falaf, kuyoom dó yem. 33Kumataak di kuteyumi kujaw bee di ésukey yáamakey yalofumi di bo man kuregenumi waaf búrom di poop wabajoeenumi kúniinaak kan úgunaw wookeenumi. 34Kati ésukey búrom di kúfatouumi di kutookulomi Yensa. Bare nan kujukoomi di kulawoomi man ápur di mofam mooliil.

will be added

X\